مسجل خطر ( الجزء التاسع )

مسجل خطر ( الجزء التاسع )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا فيما سبق حينما ذهبت لبنى مع دليله لمكتب ياسين لشراء سياره جديده لدليله ، واظهر ياسين انبهاره بدليله ، وتركت لبنى ياسين ودليله بمفردهما بالمكتب وذهبت لتحضر مشاريب .
دليله قالت لياسين : انا كنت جايه حب اعرف اسعار السيارات ايه ياسين باشا .

ياسين : محنا قولنا بلاش باشا دى ، وبعدين حضرتك تنزلى اى معرض من بتوعى اختارى العربيه اللى تعجبيك وتمشى واعتبريها هديه متواضعه منى ليكى .

دليله : مينفعش طبعا ، ازاى اقبل هديه غاليه اوى كدا .

ياسين : دى حاجه بسيطه اوى ، وكمان النبى قبل الهديه .

دليله : لا انا لو ينفع ابدل بعربيتى القديمه وادفع الفرق بالتقسيط لو ينفع .

ياسين : طيب علشان متزعليش انا هبدل عربيتك القديمه بعربيه جديده من عندى ، والفرق اعتبريه هديه بسيطه منى ليكى .

دليله : مينفعش الكلام دا ، جوزى هيرفض طبعا وهيبهدلنى .

ياسين : وجوزيك ايه هيعرفه ، هنقول ان انتى بدلتيها بعربيتك والفرق هتدفعيه بالتقسيط على خمس سنين مثلا  ، وبكدا محدش هيقدر يتكلم خالص .

دليله : بس انت كدا خسران ، ومش عارفه انت بتعمل كدا ليه .

ياسين : عوزه الحقيقه ولا اى كلام ، لو عوزه اى كلام هقول مثلا انى بعمل كدا علشان اكسب زبون والكلام الفاضى دا .

دليله : طيب والحقيقه .

ياسين : الحقيقه ان اول ما عينى وقعت عليكى اعجبت بيكى من غير مقدمات .

فى هذه اللحظه دخلت لبنى المكتب وكان معها مشروبات وقالت : هو انا قطعت كلامكم .

ياسين : بصراحه اه ، وعلى فكره مخصوم منك اسبوع على كدا .

دليله : لا ارجوك لبنى حد يستاهل كل خير .

تبسم ياسين ابتسامه ماكره ، فلقد عرف ان دليله ابتلعت الطعم وحينها قال : خلاص انتى كلامك اوامر  ، شلنا الخصومات وكمان يا لبنى ليكى شهر مكفأه علشان خاطر عيون دليله هانم .

تبسمت لبنى وقالت : انا لو اعرف كدا دا انا اجبها هنا كل يوم .

ذهبت دليله ولبنى واختارت دليله سياره قد عجبتها ، واستبدلتها بسيارتها القديمه ، وكانت سعيده جدا بسيارتها الجديده ، وعادت بها لمنزلها .

عادت لبنى لمكتب ياسين وقالت : ايه رأيك يا برنس ؟

ياسين : طول عمرك استاذه ، الله ينور .

لبنى : احنا ممكن بالورق اللى معانا دا نقول ان دليله استغلت اسم جوزها وخلتنا نبيعلها العربيه اللى تمنها ثلاثمائه الف جنيه ، مقابل عربيه تمنها خمسين الف جنيه ، وطبعا هنقول انها هى وجوزها الظابط ضغطو علينا علشان نقبل دا وسعتها تبقى قضيه رشوه وممكن يتنقل .

ياسين : نظرك على قديك اوى .

لبنى : مش فاهمه ، تقصد ايه .

ياسين : دليله دى كنز واتفتح لينا ، وبدل ما نحرقها فى الاول بالشكل دا ما نستغلها ، اللى انتى بتقوليه اخره لفت نظر ويمكن نقل ، بس انا عاوز اسجنه بتهمه مباشره وقويه ، ودليله شكلها طماعه وبتحب الفلوس والمظاهر ، وانا هخليها تسلملنا رقبه جوزها على طبق من فضه .

لبنى : طول عمرك استاذ يا باشا .

فى مساء ذلك اليوم حينما عاد هلال الى منزله تحدثت اليه دليله وقالت له : عندى ليك مفاجأه تجنن يا هلال .

هلال : خير ربنا يستر ، انا بقلق لما بلائيكى فرحانه كدا ، ههههههه .

دليله : اخص عليك يعنى انا نكديه .

هلال : بهزر معاكى ، قولى ايه المفاجأه شوقتينى ؟

دليله اخرجت مفاتيح السياره الجديده ليشاهدها هلال ، فقال هلال : مش فاهم ايه دا .

دليله : انا غيرت عربيتى بعربيه جديده ملهاش حل .

هلال : كدا من غير اما تقوليلى ، وجبتى الفلوس منين .

دليله : مهى دى المفاجأه ، المعرض خد عربيتى القديمه وقسط الفرق بتاع العربيه الجديده على خمس سنين ، والقسط صغير وهدفعه من مصروف البيت اللى بتدهولى .

هلال : الكلام مش مقنع ، والمعرض دا يقسط تمن عربيه على خمس سنين ، هو فى حد بيعمل كدا .

دليله : فاكر صحبتى لبنى اللى حكتلك عليها قبل كدا ونقذتنى من الحيوان اللى كان بيعاكسنى وهى اتدخلت ، اهى بقى شغاله تبع المعرض دا وعلشان خطرها عملولى نظام التقسيط دا .

هلال : اوعى تكونى استغليتى منصبى يا دليله ، انتى عرفه محبش اسمى يجى فى اى حاجه غلط

دليله تدايقت من كلام هلال وقالت : متخفش يا باشا محدش يعرفك اصلا حتى صحبتى لبنى متعرفش انى متجوزه اشهر ظابط فى البلد .

هلال : متزعليش يا دليله ، كل الحكايه انى مابحبش احط صبعى تحت سنان حد ، فى ناس كتير عوزانى اغلط علشان يخلصوا منى .

دليله : متخفش يا باشا انت فى الامان ، ثم تركت هلال ودخلت الغرفه لتنام .

لم يكن هناك تفاهم دائم بين هلال وزوجته دليله ، فكل واحد منهم له ميول وافكار مختلفه عن الاخر ، فهلال انسان جاد فى عمله يشعر بالفخر بنفسه ويعتز بها ، اما دليله فهى محبه للمظاهر والاموال وتريد ان تعيش عيشه رفاهيه ، وكان ظهور ياسين فى مثل ذلك الوقت جعل دليله اكثر سخطا على زوجها هلال ، بداء الامر بين دليله وياسين بالاتصالات فكانت دائما تشتكى لياسين من زوجها وانه لا يهتم بطلباتها الماديه ، وبالطبع كان ياسين يزيد من الفرقه بينها وبين زوجها ، فلقد عاملها مثل البرنسيسه ، فكان يشعرها بانها ملكه ويجب ان تعيش فى قصر وتتعامل كالملكه ، بداءت دليله وياسين يتقابلون فى الاماكن العامه ، وبداء كل منهما يتحدث عن حياتهم الشخصيه ، كان ياسين دائما يحضر الى دليله الهدايا باهظة الثمن ، فهو يعرف كيف يبهر دليله دائما ، وفى احدى الايام كانت دليله مع ياسين فى احدى المطاعم وقدم لها سيده وقال عنها انها صديقه عزيزه له وتريد ان تتحدث معها ، وقدمها باسم السيده هاله .

فقالت هاله لدليله : انا بصراحه كنت عاوزه اشوفك من فتره ، ياسين باشا كلمنى عنك كتير يا قمر .

دليله : قمر ايه حضرتك ، احنا هنيجى ايه جنب جمالك .

تبسمت هاله وقالت لها : انا حاسه اننا هنبقى اصحاب اوى ، وهنا قال ياسين : انا عندى مشوار مهم هستاذن وهبقى اكلمك يا دليله ، اسمعى لهاله هانم كويس واكيد هتكسبى كتير ، ثم ذهب ياسين وترك هاله ودليله بمفردهما ، بالطبع لم تفهم دليله شيء فى البدايه وشعرت ببعض التوتر وهنا تحدثت هاله وقالت : بصى يا قمر ومن غير مقدمات ولا لف ودوران ، تخدى كام وتسلملنا هلال جوزيك ؟

انصدمت دليله من كلام هاله ، ووقفت على الفور ، وقالت لها : انتى بتقولى ايه ، انتى مجنونه صح .

تبسمت هاله وامسكت يد دليله بالقوه واجبرتها على الجلوس مره اخرى وقالت لها : اهدى بس واقعدى كدا ، انا بقول عليكى عقله ، على العموم هديلك فرصه تفكرى ، ونقول مثلا هتخدى خمسه مليون جنيه .

اندهشت دليله من المبلغ المعروض عليها ، وشعرت هاله بذلك وحينها قررت ان تعجزها عن التفكير فى الامر فقالت : ولا اقوليك انتى تستهلى اكتر من كدا ، هديكى عشره مليون جنيه ، فكرى ولو وفقتى بلغينى عن طريق ياسين ، هستنى جوابك ، سلام يا قمر ، ثم ذهبت هاله وتركت دليله فى حاله انبهار تام ، كانت دليله  مغيبه لمده دقيقه تقريبا ، وعندما افاقت قامت وذهبت الى بيتها ، فكان العرض الذى قدمته هاله جعلها شارده الذهن نهائيا .

ظلت دليله بضعه ايام محتاره بشده ، فهى لم تعرف ما المفروض ان تفعله للحصول على هذا المبلغ الكبير ، وهى ايضا تعلم ان مقابل هذا المبلغ سيكون الامر صعب جدا ، ولكنه مبلغ كبير سيجعل منها شخص اخر ، لاحظ هلال ان زوجته ليست على طبيعتها ، وحاول معرفه ماذا حل بها ، ولكنها انكرت اى شيء ، وقالت انها فقط مرهقه قليلا ، بعد مضى اسبوع تقريبا ، اتصلت دليه بياسين لتخبره ان يخبر هاله بانها موافقه على فعل اى شيء للحصول على العشر مليون جنيه ، فلقد حسمت دليله امرها اخيرا ، قررت ان تحصل على المال وتبيع زوجها وابو ابنتها الوحيده .

اجتمعت دليله وهاله وكان معهم ياسين وبداءت دليله تستمع لهاله التى قالت : بصى يا دليله ، احنا هنشيل جوزك قضيه رشوه ، بس علشان تبقى محبوكه وميعرفش يطلع منها محتجين نحطله ادله كتير ، اولا هتخدى شنطه فيها حوالى نصف مليون وتعينيها فى الشقه عندكم ، وكمان انتى هتحطى مبلغ مليون جنيه باسم بنتك سهيله ، ولما هتتسئلى فى النيابه هتقولى ان جوزك هلال طلب منك تحطى المبلغ دا باسم سهيله فى البنك ، وكمان محتجين صوره تجمع بين جوزيك وواحد من الناس اللى متهمين بقضيه رشوه من فتره ، طبعا لما يبقى متصور مع جوزك وكل الادله التانيه دى ، سعتها هتبقى محبوكه عليه اوى .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda