أحبت فنسيت انها أم ( الجزء الخامس )

أحبت فنسيت انها أم ( الجزء الخامس )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا فيما سبق حينما تقدم شريف للزواج من دعاء وطلبت دعاء من والدها ان تصارح شريف بقصه امها .
ننتقل بالاحداث الى الجانب الاخر من الروايه حيث نجد ان عمر ومعه امه مها قد وصلوا امام منزل نوسه ليطلبوها للزواج من عمر ، قبل ان يخبط عمر على باب منزل نوسه قال لامه : يا اما مش كنا جبنا كيسين فاكهه وصندوق حاجه ساقعه بدل الشكولاته اللى جيبنها دى .

مها : كيسين فكه ايه يا ابن الموكوس هو احنا ريحين نزور مريض فى المستشفى ، ياض اتعلم واتنصح لازم نعرفهم اننا ولاد ناس ومستوى اعلى منهم بكتير .

عمر : مستوى ايه ياما هو احنا هنعملهم على بعض ، دا احنا بنكح تراب ، دا انتى سلفه حق الشكولاته دى ، انا شايف اننا بعد ما نتفق نغفلهم وناخد الشوكلاته نرجعها للمحل وناخد الفلوس ، انا داخل على جواز ومحتاج مصاريف .

مها : نغفل ايه يابنى ربنا يهدك ، اسكت وخبط على بيت الموكوسه دى خلينا نخلص ، جوازه سوده من اولها .

بالفعل خبط عمر على الباب وفتح له بخيت ابو نوسه ، رحب بيهم بخيت وطلب منهم الدخول .

دخل عمر ومعه امه مها ، وجلسوا مع بخيت المنجد وهنا تحدثت مها وقالت : بص يا بخيت احنا جيين علشان نطلب ايد بنتك نجيبه ، اقصد نوسه لابنى عمر ؟

بخيت قام بوضع رجل على رجل بشيء من الفخر وقال : اه نوسه قلتلى حاجه زى كدا ، بس هو انت شغال يا عمر ولا امك هتصرف عليك ومراتك .

عمر : انا شغال فى ورشه ...... وقاطعته فى الكلام امه مها وقالت : جرى ايه يا بخيت يا حرامى القطن ، انت مالك قاعد ومنشكح اوى ومحسسنى اننا قعدين مع وزير ، هو انت ناسى اننا عرفين كل واحد هنا فى المنطقه اصله وفصله ، ولا انت ناسى اننا عرفين انك كنت بتسرق فى القطن بتاع الناس ، دا احنا لو دورنا فى يتك قصدى فى عشتك دى هنلاقى كل التنجيد اللى فيه من القطن المسروق ، ولا متكونش ناسى اننا عرفين لما نسوان الشارع اللى ورانا مسكوك وضربوك وقلعوك هدومك وفضحوك من خمس سنين لما شفوك وانت سارق قطن من عندهم .

عمر مسك يد امه وقال لها : ايه يا ام عمر براحه على الراجل مش كدا ، ثم اقترب من اذنها وهمس لها قائلا : ايه ياما انتى عوزه تبوظى الجوازه ولا ايه اهدى شويه .

فهمست له امه وقالت : انت مش شايف الراجل المعفن قاعد نافش ريشه ازاى ونسى نفسه وعمال يبيع ويشترى فيك .

عمر : خلاص ياما اهدى علشان خطرى .

مها : حاضر علشان خطرك بس .

تبسمت مها فى وجه بخيت وقالت : اوعى تكون زعلت يا بخيت انا كنت بهزر معاك ، بس ونبى يا خويا نزل رجليك دى اللى حططها فى وشنا عيب وكمان الاشف بتاع رجليك يقرف .

انحرج بالطبع بخيت من كلام مها ولكنه كان يريد ان يزوج ابته فلقد مر بها العمر ويريد التخلص منها وتزويجها حتى يرتاح من همها ومشاكلها ، لذلك كان يتقبل اى شيء تقوله مها .

بخيت : احنا اهل يا حجه مها ، احنا مش معرفه يوم ، دا احنا عرفينك من ساعت ما انطلقتى من جوزك اللى اتجوزتيه بالسر وجت مراته التانيه عملتلك فضيحه والناس كلها اتفرجت عليكى .

بالطبع كان يريد بخيت من كلامه هذا ان يرد على ما قالته مها من قبل ، وبالطبع انحرجت مها وشعرت بالاهانه ولكنها سكتت ولم تتحدث بكلمه .

هنا دخلت نوسه ومعها مشاريب للموجودين ، فتبسم عمر لها ، وقام ليأخذ عمر منها صنيه المشاريب ليحملها عنها ، فقالت له امه : اتقل يا عريس مالك ملهوف كدا ليه ؟

فقال بخيت : سبيه يا حجه مها عريس وفرحان بعروسته .

وعندما حمل عمر الصنيه من نوسه فاوقع المشاريب على الارض ، فقالت له نوسه بشكل تلقائى : حاسب يا مدهول انا لسه ماسحه الارض وحطه فرش جديد .

فقال ابوها : حصل خير يا نوسه ، معلش يا عمر عروستك بتدلع عليك وبتدلعك .

مها : وماله خليها تدلعه ، دا حتى لسنها بينقط عسل ، ثم اقتربت من ابنها وهمست وقالت له : من دلوقتى وبتقولك يا مدهول ، اومال لما تتجوزو هتقولك يا ايه .

فهمس اليها عمر وقال : تقول اللى هى عوزاه ياما .

مها : يا فرحتى بيك يا سبع ، فعلا راجل طالع لابوك بالظبط ، جتكم القرف انتو الاتنين .

جلست نوسه مع الحاضرين وبداءو الاتفاق على الزواج ، بالطبع وافق عمر على جميع طلبات ابو نوسه الذى اسرع وطلب ان يتم الزواج فى اقرب وقت ممكن ، وبالفعل اتفقوا على اتمام الزواج خلال سته اشهر على الاكثر .

ونعود بالاحداث الى فهمى ابو دعاء الذى سئل عن الدكتور شريف ووجد انه واهل اشخاص محترمين جدا ، فاخبر دعاء ابنته انه موافق عليه وكنه ترك لها حريه الاختيار بالموافقه او الرفض ولقد اخبرها انه سئل عنه ووجده شخص جيد بالفعل ، وحينها قالت دعاء لوالدها : وانا هقرر لما احكيله حكايه مها وهشوف رد فعله ايه وبعديها هقرر هتجوزه ولا لاء .

جلست دعاء مع الدكتور شريف بكافتريه المستشفى وبداءت حديثها وقالت : بص يا دكتور شريف انا حبه اكون صريحه معاك واعرفك كل حاجه عنى وسعتها هسبلك القرار انت لسه عاوز تتقدمى ولا لاء .

شريف : انا مش فاهم حاجه يا دكتوره ممكن توضحيلى اكتر .

دعاء اخذت نفس عميق ، فليس من الساهل ان تقول لاحد ما حدث معها منذ صغرها ، وما مرت به هى وابيها من قبل ، ولكن كان يجب ان تصارح شريف بالامر ، ولقد اتخذت القرار ولا تستطيع الرجوع عنه ، وهنا بداءت دعاء بسرد قصتها وقالت لشريف : انا لما كان عندى خمس سنين ، الست اللى المفروض انها امى ، سابتنى فى البيت لوحدى وسابت رساله لبابا بتقوله فيها انها حبت واحد تانى وهى عوزه تتجوزه ، وطلبت من بابا الطلاق ، وفعلا دا حصل وبابا طلق ماما وهى راحت تشوف حيتها وسبتنى مع بابا وهو اللى اعتنى بيا وربانى لغايه ما بقيت دكتوره زى ما انت شايف ، طبعا الموضوع دا يخجل اى احد ، وانا حبيت اكون صريحه معاك واعرفك الحقيقه قبل ما تتورط فى اى حاجه ، وطبعا انا بحلك من اى كلمه واعتبر الزياره اللى حصلت عندنا فى البيت كانها لم تكن ، وربنا يرزقك ببنت الحلال اللى تستهلك يا دكتور شريف .

ثم تركت دعاء الدكتور شريف وقامت وذهبت لاستكمال عملها ، ولم تعطيه فرصه للتحدث حتى او للقبول او الرفض فهى توقعت الرفض من البدايه فهى تعلم ان هذا الامر الذى فعلته امها منذو سنوات سوف يلزم العار بها حتى وان كان ليس لها ذنب فى الامر .

بعد ان انهت دعاء عملها مثل أي يوم طبيعى ، عادت الى منزلها ، ولكنها وجدت باب شقت والدها مفتوح ، وهناك اصوات لاشخاص بالداخل ، بالطبع فذعت دعاء لانها قلقت ان يكون والدها قد شعر بالتعب او اى من ذلك القبيل ، فاسرعت بالدخول الى الشقه ، ولكنها تفاجأت ، فلقد وجدت الدكتور شريف جالس مع والدها ويضحكون وكان معهم سيده كبيره فى السن وفتاتان .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda