أخو البنات ( الجزء الثامن )

أخو البنات ( الجزء الثامن )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا فيما سبق حينما صادف نور رجل وساعده على معرفه اى علاج يريد وعرف الرجل ان نور طالب بكليه الطب .

فى اليوم التالى ، بينما نور يعمل كعادته بالقهوه ، جاء شاب يسئل عنه ، فقابله نور وسئله من يكون وماذا يريد فقال الشاب : انا بسام ، اللى انت كلمته امبارح وقولتله على اسم العلاج .

نور تبسم وقال : اه اهلا بيك يا استاذ ، اخبار السيد الوالد ايه ؟

بسام : بخير الحمد لله ، وكمان من امبارح مابطلش كلام عنك ، عمال يمدح فيك وفى اخلاقك واحترامك ، بصراحه انا غرت منك ، انا والدى مش بالساهل يحب حد كدا ، انت عملت فيه ايه .

تبسم نور وقال : ابدا والله والدك راجل محترم وبشوش ، ويتحب ويدخل القلب ، ربنا يباركلك فيه يا رب وميحرمكوش من بعض .

بسام : بص بقى يا عم نور ، انا كنت جايبلك فلوس مقابل خدمتك بس والدى قالى انك هترفض .

نور : عيب يا استاذ بسام انت جاى تشتمنى ، فلوس ايه ، والدك فى مقام والدى ، وانا معملتش حاجه تستاهل كل دا .

بسام : اهو الحج بقى كان متأكد من انك هتقول كدا ، علشان كدا طلب منى حاجه ، بص يا عم نور ، انا بشتغل فى اكبر سلسله مطاعم فى مصر ، ومدير المطعم اللى انا شغال فيه بيعزنى اوى ، وعمره ما هيرفضلى طلب ، وانا هطلب منه تيجى تشتغل معانا ، هتاخد مرتب ضعف اللى بتخده هنا بمرتين او ثلاثه ، غير انك هتتعامل مع ناس من مستوى تانى خالص ، وطبعا هتعمل علاقات معاهم هتنفعك بعدين ، قولت ايه ؟

تبسم نور فرحا بما سمعه وقال : دا جميل عمرى ما هنسهولك ، بس انا هشتغل ايه هناك ؟

بسام : يا عم متقلقش هخليك تقدم الاكل للناس ، وانتى طبعا علشان بتدرس فى كليه الطب هتقدر تحفظ اسامى الاكلات الانجليزيه بسهوله .

نور وقلبه ينبض بقوه من الفرح والسعاده : انا متشكر اوى يا استاذ بسام ، واكيد هكون عند حسن ظنك باذن الله .

بسام : بلاش استاذ دى ، قولى بسام ، وبعدين الحج موصينى عليك بالجامد ، هات رقم تليفونك وهتصل بيك النهارده باليل باذن الله وهقولك هتيجى تستلم الشغل امتى .

نور : تمام ، ثم اعطى نور رقم هاتفه لبسام .

عاد نور هذا اليوم لمنزله وهو يكاد يطير من الفرح ، قابل امه فى البدايه حينما دخل ، فشعرت بسعادته وسئلته سبب سعادته فقال لها : ادعيلى يا ست الحبايب ، لو اللى فى دماغى حصل ، الدنيا معانا هتتظبط اوى ، وهسعدك بمبلغ فى البيت لمصاريف اخواتى .

اميره : انا طول الوقت بدعيلك ، حتى لو لسانى نسى يدعيلك ، قلبى بيدعيلك يا ابن قلبى ، دا حتى اخواتك بيغيرو منك بيقولولى انتى مابتحبيش غير نور .

تبسم نور وقال : بصراحه عندهم حق ، انتى مفضوحه فى حبك ليا اوى يا ست الحبايب .

ضحكت اميره وقالت : ماشى يا نور ، انا هبطل احبك .

نور : متقدريش يا حبيبه قلبى .

اميره : لا هعصر على قلبى ليمونه ، وهبطل احبك ، علشان ما تتغرش عليا يا ابن قلبى .

تبسم نور وباس يد امه وقال : الا انتى ، انا مقدرش استحمل ان حبك ليا يقل ، انتى قلبى وعمرى كله يا ست الكول .

امير : يا واد انت عارف انى حتى لو حولت قلبى مش هيطاوعنى ، هتقولى بقى ايه مفرحك .

ضحك نور وقال : هقولك بس مش دلوقتى ، هحكيلك على كل حاجه ، بس هو لو انا كنت كذبت عليكى قبل كدا فى حاجه هتسمحينى يا ام نور ؟

اميره : اول مره تقولى يا ام نور ، انا كدا كدا مسمحاك مهما عملت ، وبعدين مهما كدبت بعرف انك بتكدب .

نور وهو مبتسم : انتى مش سهله خالص ، يلا هقوم ارتاح شويه عوزه منى حاجه ؟

اميره : اقعد احضرلك الاكل تاكل .

نور : انا جسمى متكسر وجعان نوم ، المهم هقوم اشوف اسماء واسراء وبعدين ادخل اوضتى .

دخل نور غرفه اخوته البنات ، وبداء يسئلهم عن احوالهم فقالت له اسراء : بقولك ايه متشوفلى مبلغ محترم معاك عوزه اشترى طقم جديد اروح بيه الكليه .

نور تبسم وقال : عيونى حاضر ، بس اصبرى عليا شويه ، هدبرلك مبلغ محترم .

اسراء : تسلم يا معلم .

نور تحدث مع اسماء وقال لها : وانتى يا ست اللمضه ، سكته ليه مش عوزه حاجه ؟

اسماء : عوزاك طيب يا حبيبى ، وعوزه الستر من ربنا .

نور : ربنا يسترها علينا يا رب .

فاستكملت اسماء كلامها وقالت : وعوزه شنطه وجزمه وجيبه وبلوزه جداد ، وعوزه حق كتاب وكمان عوز مبلغ كدا احطه فى الشنطه الجديده اللى هتجبهالى .

ضحك نور وقال لها : لا حقيقى قنوعه يا بت ، هههههه اصبرو شويه وباذن الله ربنا هيفرجها .

فى مساء ذلك اليوم ، اتصل بسام بنور واخبره بان يحضر الى ذلك المطعم ، وقفل معه بعد ان اخبر بسام لنور بعنوان المطعم .

فى اليوم التالى ذهب نور للمكان الذى اخبره عليه بسام وقابله بالفعل ، وافق المدير على تعشغيل نور بالفعل ، فهو شاب حسن المظهر ، ولبق بالتحدث ، بداء نور عمله فى نفس اليوم ، وحينما عرف المبلغ الذى سوف يتحصل عليه من ذلك العمل فرح بشده فهو اضعاف ما كان يأخذه من عمله بالقهوه .

بعد ان انهى نور عمله رجع الى منزله ليبشر امه بانه حصل على عمل بمكان جيد وبراتب كبير ، وبالطبع اعترف انه كان قد كذب عليها بطبيعه عمله القديم ، وسامحته امه لانها كانت تعلم انه فعل ذلك لمساعدتها ، بداء نور بعمل وحتى انه كان يحصل على ما يسمى بقشيش من الزبائن الذين يقدم لهم الطلبات ، كان نور سعيد حتى جاء ميعاد قبض الراتب واخير قبض نور راتبه ، اخذ نور يشترى الكثير من الاشياء وعاد بها للمنزل ، دخل نور المنزل وهو محمل بالاشياء التى اشتراها لامه ولاخوته البنات ، فرحت اسماء واسراء بما احضره نور بالطبع ، كان نور سعيد بفرحتهم ، حتى انه اعطه كل واحده منهن مبلغ من المال ، وحينما شكروه ودخلوا غرفتهم قالت له امه : ايه المصاريف دى كلها يا نور ، مش تلم ايدك شويه علشان يبقى فلوس لمصاريف الكليه بتعتك .

نور : متقلقيش يا امى ، خير ربنا كتير .

اميره : انت حتى مشترتش لنفسك اى حاجه .

نور : انا مش محتاج اى حاجه ، المهم انتى واخواتى .

اميره : متنساش مذكرتك وتعليمك ، انت هتلحق تذاكر امتى .

نور : متقلقيش انا بذاكر وانا شغال ، الوقت اللى الشغل بيخف فيه بفتح كتاب واذاكر منه ، وكمان بذاكر شويه قبل ما انام .

اميره : باين عليك الارهاق ، خلى بالك من صحتك شويه .

نور : متقلقيش يا امى كل حاجه هتبقى تمام ، سبيها على الله .

استمر نور بعمله ، وكان يستطيع ان يوفق بين عمله ودراسته ، كان نور ينجح بكليته ، اما ساره واسراء فحان وقت تخرجهم اخيرا ، لقد نجحت اسماء واصبحت صحفيه والتحقت باحدى الجرائد لتعمل به ، اما اسراء فكانت موفقه ووجدت فرصه لها باحدى القنوات التليفزيونيه الفضائيه ، فكانت مقدمه برامج ، اصبح الوضع المادى لهم جيد الى حد كبير ، فكلما مرت الايام تحسن وضعهم كثيرا ، فكل من اسماء واسراء اصبح لهم عائد شهرى من عملهم ، وظل نور يوفق بين عمله ودراسته ، وظل الوضع قائم على هذا الحال .

لم يمر سنتان تقريبا واصبح الوضع مختلف ، فلم يبقى لنور سوى سنه واحده على التخرج ، وحينما يصل الطالب الى هذه المرحله يصبح الطالب بكليه الطب مؤهل لاستكمال اخر مرحله له وهو يعمل باحدى المستشفيات وليس بالجامعه ، اما اسماء فاصبح لها اسم فى عالم الصحافه حتى انها تزوجت من زميل لها يعمل بالصحافه واحولهم الماديه متوسطه ، اما اسراء فانفصلت نهائى عن عائلتها ، فبعد ان اصبحت من مشاهير الاعلام ، حتى انها انفصلت عن عائلتها واصبحت تعيش بمفردها فتره حتى تزوجت من ابن صاحب قناه التليفزيون وكان اسمه سامر ، وبعد وفات والده اصبح هو واخته فجر اصحاب القناة ، لم يعرف زوج اسراء عائله اسراء حتى ، فكانت اسراء تدعى انها من عائله عريقه وكانت لا تريد من احد معرفه حقيقه عائلتها .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda