الست بدويه ( الجزء الثانى عشر )

الست بدويه ( الجزء الثانى عشر )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا فيما سبق حينما اقترحت رجاء ام ساسو على بنتها الذهاب الى احد الشيوخ قد حدثتها زوجه عمها عنه من قبل .

ساسو : يا ماما مش ناقصه فضايح ، عوزه تفضحينى ؟

رجاء : مفيش فضايح ولا حاجه ، انا هتصرف ومش هعرفها اننا ريحين ، هقولها لوحده معرفه .

قامت رجاء بالاتصال بعمه ساسو وعرفت منها اسم ذلك الشيخ المزعوم وعنوانه .

نزلت رجاء مع ساسو ، وفى اثناء الطريق سألت ساسو امها وقالت : هو الشيخ اللى ريحيله ده اسمه ايه يا ماما ؟

رجاء : مرات عمك بتقول اسمه الشيخ عبدلله ، والناس عرفينه باسم الشيخ الفاجر .

ساسو : فاجر ، انتى بتقولى ايه يا ماما ، هو فى حد يبقى اسمه الفاجر ، ده اكيد مش شيخ اكيد نصاب او دجال ؟

رجاء : اسكتى يا بت متقوليش كده ، دا بيقولوه شيخ واصل ومطلع ، وعارف الطالع والمستخبى ، بيقولوا مخاوى جن بيعرفه كل حاجه .

ساسو : والله لو طلع نصاب ، لاخلى بابا او عمى يسجنه .

وصلت ساسو وامها رجاء الى منزل ذلك الشيخ الملقب بالفاجر ، وبمجرد ان دخلو الشقه التى يقابل بها زبائنه شعروا بشيء من القلق والخوف ، كان سكرتير ذلك الشيخ رجل زو ملامح غليظه ، وطلبت رجاء منه ان يدخلوا لمقابله الشيخ الفاجر لامر مهم وضرورى ، وسمح لهم بالفعل ودخلوا غرفه بها اضاءه خافته ، ووجدوا رجل فى الاربعين من عمره ، نائم على جنبه ، وظهره باتجاههم ، لم يروا وشه وقال لهم : ما تقعدوا يا هوانم .

امسكت رجاء يد ابنتها وطلبت منها ان تقعد معها على فرشه موضوعه على الارض ، ولكن كانت ساسو كما نعلم شخصيه مغروره متكبره لا تردخ بسهوله ، رفضت ان تجلس على الارض .

حينها تحدث الفاجر وهو مازال نائم ولم يعطيهم وجهه وقال : جرى ايه يا ساميه يا بنت رجاء ، مستكبره تقعدى على الارض ، اقعدى برضاكى ولا اخليكى تنزلى على ركبك ؟

ساسو وهى متعصبه للغايه قالت : انت عرفت اسمى ازاى ، وعرفت اسم امى منين ، وازاى تكلمنى بالشكل ده ، انت متعرفش انا اهلى مين ، ويقدروا يعملو فيك ايه ؟

الفاجر : لا يا ختى ، عارف انتى مين كويس ، وعارف ان عيلتك متفرعه فى الشرطه ، بس كمان عارف ان انتى محتجانى ومحدش هيقدر يسعدك قدى ، اللى وقعه معاها ست جامده وواصل ، وشكلها ليها علاقات قويه بعالم الجن ، يعنى لو مقعدتيش زى الجزمه اللى فى رجليك دى ، وتتكلمى معايا كويس وتعرفى انى الوحيد اللى اقدر انقذك ، او تغورى من الباب اللى دخلتى منه وتشوفيلك صرفه بقى مع الست اللى نويه تخلص عليكى .

دب الرعب بقلب ساسو حينما سمعت طريقه حديث ذلك الرجل ، فهو يتحدث بثقه شديده تجعل اى شخص يخاف ويفكر قبل ان يتصرف باى تصرف يكون نتائجه خطيره .

شدت رجاء ابنتها لتجلس بالقوه وردخت ساسو لطلب امها وجلست ، وهنا قال الفاجر : عملتى طيب ، انك قعدتى ، اتعلمى طول ما انتى قعده معايا تكونى مطيعه وبتسمعى الكلام .

ساسو : ماشى يا فاجر .

انتفض الفاجر من مكانه وجلس وقال لها : انتى من دلوقتى تقوليلى يا سيدنا ، فهمه يا بنت رجاء .

فتحدثت رجاء وقالت : طبعا فهمه يا سيدنا ، المهم تلحقها ، انت متعرفش بيجرلها ايه ؟

الفاجر : لا عارف ، مهى نزله هرش من ساعه ما دخلت ، ثم اخرج الفاجر كيس صغير به مسحوق ابيض لا نعرف ماذا يكون ذلك المسحوق ، وقام بوضع القليل منه على كوب من الماء كان بجواره ، واخذ يقلبه ثم اخذ ماء ذلك الخليط والقى به على رأس ساسو .

بالطبع انكرت ساسو هذا الفعل فى بدايه الامر ، وقالت له : انت بتهبب ايه ؟

فاجابها الفاجر بصوت غليظ وبغضب : احفظى ادبك يا ساميه ؟

وقبل ان تجيبه ساسو بغضب توقفت عن الكلام ، فلقد لاحظت انها لم تعد تريد ان تهرش برأسها ، فرحت ساسو بما حدث ، وقالت لامها : الحقى يا مامه راسى مابقتش وكلانى .

رجاء : الف بركه يا بنتى ، دى بركات سيدنا .

ثم نظرت رجاء باتجاه الفاجر وقالت : اامرنا يا سيدنا ، كل طلباتك مجابه ؟

الفاجر : شوفوا مع السكرتير بره ، واللى يطلبه ادفعوه .

قامت رجاء وطلب من ساسو ان تقوم ولكن ساسو طلبت منها الجلوس وقالت للفاجر : عوزه اعرف مين اللى عمل فيا كده ، وعمله ليه ، وخلاص انا كده محصنه منه ولا لاء ؟

تبسم الفاجر وقال لها : تعجبينى يا بت يا ساميه ، ثم اغمض عيونه وظل صامت قرابه عشر دقائق ، ثم تحدث وقال : هى زى ما قولت من شويه وحده ست ، بس هى متعرفكمش ولا انتم تعرفوها ، وعملت ده بسبب حد انتى ازتيه ، وشكلها مش نويه تسيبك فى حالك ، هى مش ست ساهله خالص ، ولو عوزانى اقفلك قصدها ده هيكلفك كتير اوى .

ساسو : انا ميفرقش معايا الفلوس ، اللى عوزه خده ، بس انا عوزه اربيها ، عوزه تشوف الويل ، مش عوزاها تشوف النوم ، لان اكيد هى ورى موضوع الضفادع .

رجاء : ايه حكايه الضفادع دى يا ساسو ؟

ساسو : هقولك عليها بعدين يا ماما .

الفاجر : طيب انا هديكى عنوان بتها ، كل اللى عوزه منك هترمى شويه مايه من ازازه هدهالك قدام بتها .

ساسو : المايه دى فيها ايه ؟

الفاجر : مش شغلك انتى تنفذى اللى بقوله وخلاص ، انتى عوزه تقلقى راحتها وتعذبيها ، وانا عليا التخطيط ، وانتى تقولى حاضر وبس .

ساسو : حاضر يا سيدنا .

خرجت ساسو وامها رجاء من عند الفاجر ، واخذت معاها ازازه صغيره التى تكلم عنها الفاجر ، وتوجهت ساسو وامها رجاء الى عنوان الست بدويه الذى اخبرهم الفاجر عنه .

وصلت ساسو ورجاء الى المكان المنشود ، كانت رجاء خائفه ، وطلبت من ساسو ان تبقى بالسياره ولكن رفضت ساسو وصممت ان تنزل معها وتشجعها .

كان الوقت تقريبا الساعه الثانيه عشر ظهرا ، تقدمت ساسو ورجاء بالقرب من منزل الست بدويه بخوف وحذر ، وبالفعل وصلوا ولم ينتبه اليهم احد ، هذا ما كانوا يعتقدونه .

تصادف ان سماح اخذت بعض الغسيل لنشره فوق سطوح منزل الست بدويه ، وهى تنشر الغسيل لمحت سياره ساسو وعرفتها ، وحينها نظرت بحرص فوجدت ساسو وامها رجاء يقتربون من بيت الست بدويه .

فزعت سماح فهى تظن انهم هنا من اجلها ، خافت ونزلت مسرعه تخبر الست بدويه ، ولكن كانت الست بدويه مزالت نائمه ، وخافت ان تقلقها ، وحينها اسرعت الى بطوط واخبرتها ، واقتربت بطوط من احى شبابيك المنزل وشاهدتهم بالفعل ، ونادت على طفل كان يلعب بالشارع ، واعطته عشره جنيهات وقالت له : شايف الاتنين ستات اللى هناك دول ؟

الطفل : اه يا ابله مالهم .

بطوط : عوزاك تلم العيال اصحابك فى الشارع ، وتعملوا عليهم حافله ، عوزاك تبهدلهم وتضحك الناس عليهم .

الطفل : بس كده حاضر .

ذهب الطفل ليجمع اصحابه ، فى ذلك الوقت كانت ساسو وامها قد انهوا مهمتهم ، وقبل ان يتحركوا للعوده الى سيارتهم وجدوا انفسهم محاصرين من مجموعه كبيره من الاطفل ، كل طفل منهم ممسك باكياس مملوءه بالماء ، والاهم من ذلك لم تكن تلك المياه نظيفه بالمره .

لم تفهم ساسو او رجاء ماذا يحدث ، ولكنهم شعروا بالخطر ، وهنا قررت ساسو الهرب ، وفجأه جريت ساسو وهى تقول لامها : اجرى يا ماما .

رغم ان ساسو جريت مسرعه للدخول الى السياره ، ولكن كما نعلم جميعا ان الطفل المصرى لديه الكثير من المواهب المدفونه ، وتظهر تلك المواهب فقط فى الازمات والمواقف الصعبه ، فرغم سرعه ساسو فى الجرى الا انها نالت عده ضرابات باكياس المياه على رأسها وظهرها وكان الموقف فى منتهى السخريه ، ولكن ما حدث مع ساسو كان هين لما حدث مع امها رجاء .

لم تكن رجاء تتوقع يوم ان ابنتها سوف تجرى وتتركها بمفردها بهذا الشكل ، فرغم ان كل ما حدث كان بسبب ابنتها ، الا ان ابنتها لم تقدر اى شيء ، وحين اتت الازمه تركتها وهربت .

اقيمت حفله مائيه على رجاء ، فهى ظلت واقفه لا تتحرك ابدا ونالت معظم اكياس المياه ، كانت رجاء تتحرك ببطء الى السياره وجميع ملابسه غرقانه من تلك المياه ، كان المشهد يدعوا الى السخريه والحزن فى نفس الوقت .

وصلت رجاء اخير لسياره ابنتها وكبت السياره ، واسرعت ساسو وتحركت بالسياره ، كانت رائحه المياه قد فاحت بشده ، اخذت رجاء تبكى وساسو تبكى جنبها وهى تقود السياره ، وحينما ارادت ساسو ان تطبطب على امها من باب المواساه ، ابعدت رجاء يد ساسو عنها وقالت لها : امشى يا وطيه ، تسبينى وتجرى يا وطيه ؟

ساسو : اعمل ايه يا ماما هو انتى مشفتيش العيال كانوا عملين ازاى ، وبعدين انا قولتلك اجرى ، انتى مجرتيش ، طيب اعمل ايه ؟

رجاء : مش مكسوفه من نفسك ، تجرى وتسيبى امك ، وبعدين مش انتى الغلطانه ، انا الغلطانه انى جيت معاكى وسمعت كلامك ، انتى حلال فيكى اى حاجه ، طول عمرك مغلبانى ، وانا بسامح ، بس خلاص قلبى ده هدوس عليه بالجزمه ومش مسمحاكى تانى يا ساميه يا بنت رجاء .

ساسو : يوه بقى يا ماما متبقيش اوفر كده ، خلاص حصل ايه يعنى ، هو دوش سخن هتخديه كل الريحه دى هتروح ، بس بصراحه رحتيك وحشه اوى يا ماما .

رجاء وهى متعصبه : انتى هتنقطينى يا بت ، ما تتلمى جتك القرف .

سكتت رجاء وساسو دقيقه ، ثم تحدثت رجاء وقالت : تفتكرى يا ساسو المايه اللى مش نضيفه دى ، تفتكرى دى مايه ايه ؟

ساسو وهى تبكى : مش عارفه يا ماما ، بس هى مايه رحتها وحشه اوى ، ولا شفتى العيال الصغيره منظرها عامل ازاى ؟

رجاء : اسكتى متفكرنيش ، العيال حافيه ومريله ، دا فى عيل لما خلص اكياس المايه اللى فى ايده ، قعد يحدفنى بالتراب والطوب ، وفى طوبه جت فى رجلى وجعانى لغايه دلوقتى .

ساسو : دوول مش اطفال يا ماما ، دول قرود .

ظلت ساسو ورجاء يبكون طول الطريق حتى وصلوا لمنزل ساسو .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda