شارع الخواجه ( الجزء السابع )
 |
شارع الخواجه ( الجزء السابع ) |
الخطه اللى حطها الثلاثه بداء سالم الصياد بتنفذها بسرعه ، العائق
الوحيد ازاى يوصل الشنطه لاوضه يوسف ، بس دماغه الشيطانيه خلته يلاقى الطريقه
المناسبه .
في يوم جت وحده تزور فريده في بيتها ، اسمها مني كانت صحبه فريده من
صغرهم ، وكان معاها شنطه سفر صغيره ، ودخلت منى لفريده وبعد الترحيب قالت منى : بت
يا فريده عوزاكى في موضوع حساس شويه .
فريده : طيب تعالى ندخل اوضتى .
منى : هو يوسف هنا .
فريده : لا يا حببتى متخفيش .
دخلت منى وفريده اوضه نوم منى ، وقعدت منى جنب فريده وقالتلها : انا
عوزه اشيل عندك الشنطه دي يا فريده ، وشورتلها على شنطه السفر .
فريده : الشنطه دى فيها ايه ؟
فتحت منى جزء من سوسته الشنطه وبينت اللى جوها ، او بالاصح اللى على
الوش ، وكانت هدوم حريمى .
فريده : خلاص يا بنتى هو انا مكدباكى مثلا ، ولا انتى هتضرينى .
منى : طبعا لا انتى صحبتى ، اعز صحبه ليا ، بس انتى عرفه انا على وش
جواز ، وانا اللى شغاله وبجهز نفسى ، وابويا لو شافنى جيبه كل الهدوم دى هيطين
عشتى ويخلينى ارجعهم ، وانا جيباهم بالتقسيط .
فريده : ولا يهمك ، صحيح عمله ايه مع خطيبك .
منى : اهو شويه نتصالح وشويه نتخانق ، هو عاوز يتجوز بعد ست شهور ،
وانا لسه بجهز نفسى .
فريده : ربنا يسعدكم يا رب ، هاتى الشنطه اعنها عندى هنا في الاوضه .
منى : اه بس خبيها كويس ، دى هدوم حريمى وخاصه ، ومينفعش يوسف جوزك
يشوفى .
فريده : لا ياختى متخفيش ، يوسف محترم ويعرف الاصول كويس .
منى : عارفه ياختى عرفه ، ياما كان نفسى اتجوز واحد زيوه .
فريده : بعينك .
قامت منى وقالتلها : اسيبك انا بقا ، يلا اشوفك على خير .
فريده : ما لسه بدرى ، اقعدى شويه .
منى : لا يدوب اروح اعمل الاكل لابويا واخواتى .
فريده : طيب مع السلامه .
مشيت منى ، وحطت فريده الشنطه تحت السرير .
خرجت منى من بيت العربى وراحت على طول على معرض سالم الصياد ، ودخلت
مكتبه وقعدت وقالتله : كله تمام يا باشا .
سالم : حد شك فيكى ؟
منى : عيب عليك هو انا صغيره .
سالم طلع من الخزنه مبلغ وحطهولها قدمها وقالها : طيب خدى دوول .
منى مسكت الفلوس وقالتله : كام دوول يا باشا ؟
سالم : 20 الف جنيه زى ما اتفقنا .
منى : اه اتفقنا ، بس بصراحه ضميرى وجعنى ، اصل فريده دى صحبت عمرى ،
وكمان يوسف راجل جدع والناس كلها بتحبه .
سالم : اااااااااه ، طيب خدى دوول كمان ، وحط قدمها فلوس وقالها :
دوول خمسه الاف جنيه ، علشان يريحوا ضميرك .
منى : متحط عليهم كمان خمسه يا باشا وضمير اعتبره مات .
سالم : الطمع وحش يا منى .
منى : لا حلو يا باشا ، اصلى عاوز اتجوز ولسه جهازى مخلصش .
سالم : تمام مفيش مشكله .
طلع سالم كمان خمسه الاف جنيه واداهم لمنى وقالها : اعتبريهم هديه
جوازك .
منى : تعيش يا رب ، هتيجى تحضر فرحى .
سالم : عيونى ، بس لما تعملى الفرح .
منى : قريب يا باشا ، يلا افوتك لمصالحك .
قامت منى مشيت ، وسعتها سالم اتكلم لنفسه وقال : غورى في داهيه ، مش
عارف الناس دى بتستعجل على موتها ليه .
مسك سالم تليفونه واتصل بواحد وقاله : البنت اللى خارجه من عندى في المعرض
دى ، خليك وراها واول ما تلاقى فرصه كويسه اخبطها بالعربيه خلص عليها ، عوزها ميته
وتبان قضاء وقدر .
قفل سالم الاتصال وقال لنفسه : منا لازم اخلص منك انتى دليل براءه
يوسف ، وكمان طمعك اكيد هيخليك تطلبى منى فلوس تانى وهتفتكرينى صيده ساهله ،
والصياد محدش يصطاده .
وبعد كده اتصل سالم بعيسى وقاله : كله تمام ، شوف حد من عندك يبلغ عن
يوسف .
عيسى : لا يبلغ ايه ، احنا هنوصلها للمخبرين كاخباريه ، وتبان انها
طبيعيه ، وكله بالقانون .
سالم : مش سهل انت خالص يا عيسى .
عيسى : وانا هاجى جنبك ايه ، ده الشيطان لما بيشوف عمايلك بيروح يصلى
.
ضحك سالم وعيسى والفرحه مليه نفوسهم على الخطه اللى طبقوها على يوسف
العربى .
الساعه كانت 9 مساءا ، ويوسف مكنش لسه رجع من شغله ، واتأخر وقلقت
فريده عليه ، فاتصلت بيه تعرف هو فين وقالها ان زميله تعب في الشغل وخده يوصله
للبيت ، وان بيته بعيد في الارياف واحتمال يتأخر اوى .
حوالى الساعه 11 مساء ، كان في خبط جامد على باب شقه العربى ، والكل
قام مفزوع ، وجريوا على الباب يفتحوه ، وكان اللى على الباب مباحث المخدرات ، ولما
سألهم العربى هما مين قاله الضابط : انه مباحث ومعاه امر بالتفتيش .
دخل العساكر تفتش الشقه حته حته ، وطبعا واحد منهم لقا الشنطه ولما
شال الهدوم اللى على الوش لقا مخدرات ووداها للضابط وقاله : لقيت الشنطه دى يا
باشا .
الضابط بص للعربى وقاله : الاوضه دى بتاعت مين ؟
رد شادى : دى بتاعت اخويا يوسف ومراته .
الضابط : فين يوسف بقا .
فريده : دى مش شنطه يوسف يا باشا ، دى بتاعت وحده صحبتى اسمها منى .
الضابط : الكلام ده تقولوه في النيابه ، فين يوسف .
فريده : منعرفش يا باشا .
الضابط : تمام انا هعرف اجيبه بطرقتى .
خرج الضابط ومعاه رجالته ، وسعتها فريده قالت للعربى : والله يا عمى
دى شنطه الزفته منى ، وجبتها وخلتها عندى علشان فيها هدومها وخيفه ابوها يخليها
ترجعها .
العربى : اتصلى يا فريده بمنى دى وشوفيها فين .
اتصلت فريده على تليفون منى صحبتها ، ورد عليها ابوها وقالها انها
ماتت في حادثه وان عربيا دهستها .
سعتها صرخت فريده وقالت : يانهار اسود ، يا نهار اسود ، الحقنى يا عمى
، بيقولولى منى عربيه خبطتها وماتت .
سعتها ندى صرخت وقالت : يعنى اخويا يوسف ضاع .
شادى وهو بيزعق لفريده : منك لله ضيعتى اخونا .
العربى قعد وهو بيقول : ان لله وان اليه راجعون ، لله الامر من قبل
ومن بعد ، كنت عارف انهم مش هيسبوك يا يوسف ، دى خيه ووقعوك فيها يا ضنايا .
شادى : انت تقصد ايه يابا .
العربى : بينه يا ابنى ، عوزين يخلصوا من يوسف وينتقموا منه ، يحطوله
شنطه مخدرات ، ويخلصوا من البت منى علشان متشهدش عليهم ، واخوك يختفى من وشهم .
فريده : وايه العمل يا عمى .
العربى : اتصلى بيوسف يا فريده وقوليله ميرجعش البيت خالص ويستخبى
لغايه ما ندبر امورنا ، وفهميه كل حاجه يا فريده ، وقوليله ابوك بيقولك اياك
يمسكوك يا يوسف ، واوعى تسلم نفسك .
فريده : حاضر يا عمى .
اتصلت فريده بيوسف وحكتله كل حاجه وقالتله ان ابوه عوزه يستخبى كام
يوم لغايه لما يلاقوا حل ، وسمع يوسف كلام ابوه فعلا .
طبعا الموضوع انتشر في الحته كلها ، في ناس صدقت ان يوسف بيتاجر في المخدرات
، وفى ناس كتير اوى رفضت تصدق الكلام ده ، وكان اول واحد مصدقش الكلام ده عن يوسف
هو عمر الطيب ، وراح بسرعه على بيت العربى وقعد معاهم وقال للعربى : بص يا عمى انا
جاى علشان نشوف اساعد يوسف ازاى .
العربى : يعنى انت يا عمر مصدقتش اللى اتقال على ابنى يوسف .
عمر : انا لو شفته بعنيا يا عمى ، هكدب عنيا واصدق يوسف .
العربى : ربنا يستر اصلك يا عمر .
عمر : انت متعرفش يوسف عندى ايه يا عمى ، انا مديوله بكتير اوى .
الى هنا يكون نهايه حديثنا اليوم
ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم
وتعليقاتكم .
لو اى حد حابب ينشر الروايه بصفحته او باى جروب يتفضل ، بس فضلا
انسبهالى لانها مجهودى .
اترككم فى رعايه الله
yasser oda