انتقام الابن 2 ( الجزء التاسع )

انتقام الابن 2 ( الجزء التاسع )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا قبل كده لما ياسين قال للمهندس محمود انه هيقع فى مصيبه قريب اوى .

طبعا كان لازم المهندس محمود يسأل ياسين عن سبب الكلام اللى قاله ده ، وقاله : وضح كلامك انت تقصد ايه ؟

ياسين : انا بتكلم عن مشروع شركتك يا باش مهندس المدينه اللى انت بتبنيها جديده .

محمود : ملها ؟

ياسين : اكتر من نص المبانى هتنهار قريب اوى .

محمود وهو متعصب : انت بتقول ، انت مين اصلا علشان تقول كده ؟

ياسين : على فكره يا باش مهندس ، انا مهندس من اللى شغالين في شركتك ، وحولت اقول لمدير المشروع بس هو مسمعليش .

محمود : وليه قولت ان المبانى هتقع ؟

ياسين : المبانى مش مطابقه للمواصفات ، في نقص كبير في مواد البناء ، ده غير المواد المنتهيه الصلحيه اللى استخدمت .

محمود اتعصب على ياسين لانه مصدقش اللى ياسين بيقوله وقاله : انت كداب ، اللى زيك هما اللى عوزين يسيئوا لعيله الفيشاوى ، انت مطرود من شركتى ، واطلع بره القصر دلوقتى قبل ما اجيب الحرس يشيلوك ويرموك بره .

ياسين : انا طالع يا باش مهندس ، بس انت اللى هتدور عليا بعد ما تحصل المصيبه .

محمود بعصبيه : اطل بره قولت .

ياسين اتحرك وخرج فعلا بره القصر ، وخرجت وراه ساره ووقفته وقالتله : ايه الكلام اللى انت قولته جوه ده يا ياسين ؟

ياسين : انا قولت الحقيقه .

ساره : يعنى ايه المبانى اللى انت قولت عليها هتقع ، انت فاهم انت قولت ايه ؟

ياسين ابتسم وقالها : عمك هيدور عليا لما يصدقنى ، بس سعتها هيكون اللى حصل مايتعوضش ، على العموم متشغليش بالك انتى ، ادخلى كملى حفلتك ، صحيح نسيت اقولك كل سنه وانتى طيبه ، وابتسم ياسين ومشى .

تانى يوم ياسين طبعا مرحش الشركه ، هو اعتبر نفسه مستقيل قبل ما يطرده محمود الفيشاوى بنفسه ، وفضل ياسين من غير شغل فتره مستنى يسمع خبر يخلى محمود الفيشاوى يدور عليه بنفسه .

بعد شهر من حفله عيد ميلاد ساره حصل حاجه صعب تتوصف ، المشروع السكنى اللى كانت بتعمله شركه الفيشاوى فجأه وبدون مقدمات انهار المشروع وانهد اكتر من نص المبانى وحصل حالات وفيات كتير بين العاملين وكمان اصابات كتير اوى بين العمال في المشروع .

طبعا خبر زى ده كان حديث البلد كلها ، الدنيا اتقلبت ومتعدلتش ، والشرطه والنيابه اتدخلوا علشان يحققوا في الموضوع ، والاسوء ان كل ده خلى اسهم شركات الفيشاوى في الارض .

محمود الفيشاوى كان مصدوم من الخبر ، مكنش عمره يتوقع ان ده يحصله ، واول مره في تاريخ عيله الفيشاوى تيجى الشرطه علشان تقبض على رئيس مجلس اداره شركه الفيشاوى اللى هو طبعا المهندس محمود الفيشاوى نفسه .

انتشر خبر القبض على المهندس محمود في البلد كلها ، مهو ده خبر الموسم ، طبعا حتى البورصه اتأثرت بالخبر ده ، كل شركات الفيشاوى كانت بتنزل او بتدمر بمعنى اصح .

طبعا اسطول من المحامين اتحركوا ورا المهندس محمود ، وقدروا انهم يجبوله افراج بكفاله مع منعه من السفر ، وده بسبب ان انهيار المشروع لما راح ضحيتها ناس كتير طبعا بقى قضيه رأى عام وسعتها حتى علاقات عيله الفيشاوى مكنتش تقدر تعمل اكتر من اللى حصل ، ولازم قدام الناس يتعامل المهندس محمود على انه مجرد مواطن عادى .

خرج المهندس محمود ورجع قصر الفيشاوى وكل العيله اجتمعت في القصر علشان يشوفوا هيعملوا ايه في المصيبه دى .

قعد محمود مع افراد عيل الفيشاوى علشان يتكلموا ، وسعتها على الفيشاوى قال : انا مش فاهم اللى حصل ده حصل ازاى ، كل المبانى دى تقع كده فجأه .

محمود : وكيل النيابه قال ان تقرير المعمل بيقول ان مواد البناء منتهى الصلحيه وغير مطابقه للمواصفات .

احمد ابن على قال : كدب ، كل الكلام ده كدب ، اكيد في حد عاوز يوقعنا ، اكيد في حد ورا كل اللى بيحصل ده .

ريم : كلام احمد مظبوط ، اكيد في حد مصلطهم يعملوا كده ، انا مش فاهمه ازاى اتجراءو علينا بالشكل ده ؟

ادم : طيب مش يمكن فعلا مواد البناء فاسده ، والموردين خدعونا .

احمد : ايه الكلام الفارغ اللى انت بتقوله ده ، طبعا محدش يقدر او يفكر انه يعمل معانا كده .

سعتها اتكلمت ساره وقالت : كلام ادم مظبوط ، لان ده نفس الكلام اللى قاله ياسين لعمى محمود في حفله عيد ميلادى .

سعتها بص محمود ل ساره وقالها : انا عاوز اللى اسمه ياسين ده ، اتصلى بيه يجيلى حالا .

ساره : حاضر يا عمى .

مسكت ساره تليفونها واتصلت على ياسين ، ولما رد عليها قالتله : ايوه يا ياسين عمو محمود عوزك تجيله القصر دلوقتى .

ياسين لما سمع كلام ساره ابتسم ، اخيرا خطته بتكمل ، وسعتها رد عليها رد مكنتش ساره متوقعاه ، ياسين قالها : احترامى ليكى ولعمك يا ساره طبعا ، بس عمك طردنى من القصر لما حولت انبهه ، ولو هو عاوزنى يجيلى شقتى ، هى طبعا مش زى قصر الفيشاوى بس اهى تفى بالغرض .

ساره لما سمعت رد ياسين اتوترت ، مهى مش عارفه هتقول لعمها رد ياسين ازاى ، علشان كده قالت ل ياسين : معلش يا ياسين علشان خاطري انا ، ممكن تيجى القصر ؟

ياسين : خاطريك على عينى وراسى ، بس اسف انا مش جاى القصر الا لما يجى محمود الفيشاوى لغايه عندى .

ساره عرفت ان مفيش فايده وسعتها قالتله : ماشى يا ياسين هقوله .

قفلت ساره الاتصال مع ياسين وقالت لعمها محمود : اسفه يا عمى ، ياسين رفض يجى القصر ، بيقول انه حاول قبل كده ينبهك للى هيحصل بس انت مصدقتهوش وطردته ، ولو حضرتك عوزه رحله لشقته .

كلام ساره صدم كل الموجدين ، محدش فيهم فاهم ازاى اللى اسمه ياسين ده يرفض طلب المهندس محمود كبير عيله الفيشاوى ، واول حد انفعل على كلام ساره كانت ريم اللى قالت وهى منفعله : ازاى واحد ملهوش لزمه زى ده يرد كده على طلب بابا .

محمود : استنى يا ريم ، للاسف انا محتاجله ، وعلشان كده هرحله ، لازم اعرف اللى حصل ده سببه ايه ، مفيش وقت خالص .

سكتت ريم وسكت كل الموجودين في الاجتماع من العيله كلها ، مهو مفيش حد من الموجودين كان يقدر يعترض على كلام كبير العيله ، ولما سكت الكل ووقف المهندس محمود علشان يروح ل ياسين وده بعد ما ياخد عنوانه من ساره ، سعتها في صوت اتكلم ، صوت حد من العيله بس مكنش في الاجتماع ، الصوت ده قال ل محمود : غلط يا محمود ، مينفعش كبير عيله الفيشاوى يتنازل ويروح لاى حد مهما كان مين ، ابعت رجلتك تجيبه لو مش برضاه يبقى غصب عنه .

بص محمود وكل الموجودين على مصدر الصوت ده ، كان لشخص قاعد على كرسى متحرك ، كان خليل باشا نفسه اللى جه من اوضته اللى كان بيشوف الاجتماع عن طريق شاشه عرض لكاميرات علشان تنقله اجتماع العيله ، ولما شاف الوضع بالشكل اللى حصل سعتها قرر يجى للاجتماع علشان يمنع محمود من انه يروح للى اسمه ياسين بنفسه حفاظا على شكل ومكانه عيله الفيشاوى .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda