انتقام الابن 2 ( الجزء الثامن )

انتقام الابن 2 ( الجزء الثامن )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا قبل كده لما اتعرف ياسين على ساره وابتدوا يبقوا اصحاب .

العلاقه بين ساره وياسين مع مرور الايام بقت اقوى والصداقه بنهم كبرت ، ساره وثقت في ياسين اوى لدرجه انها كانت بتحكيله على كل اسرارها ، مكنتش بتخبى عنه حاجه ، وياسين كان مستمع كويس اوى ، وكان بيشجعها انها تحكيله كل حاجه ، وزاد الموضوع وبقت ساره تحكى لياسين كل حاجه عن عيلتها ، ساره كانت كنز بالنسبه لياسين عرف عن طرقها حاجات كتير اوى عن عيله الفيشاوى وعرف منها طباع وعيوب شخصيه كل واحد في عيله الفيشاوى .

في يوم اتصلت ساره بياسين وعزمه على حفله عيد ميلادها اللى هتتعمل في قصر الفيشاوى ، وسعتها ياسين اعتذر ليها بس هى رفضت اعتذاره واصرت انه لازم يحضر الحفله ، وطبعا ياسين كان عاوز يحضر الحفله لان دى فرصه كويسه اوى علشان يدخل في عيله الفيشاوى ، بس في الاول عمل نفسه مش عاوز يحضر علشان يظبط الخطه كويس وفى الاخر طبعا وافق واستعد علشان يحضر الحفله ويشوف عيله الفيشاوى اللى هينتقم منهم باى طريقه ممكنه .

عيله الفيشاوى مكنوش زى الناس العاديه اللى بيحتفلوا باعياد ميلاد افراد العيله علشان يفرحوا بيه والكلام الطبيعى ده ، لا السبب الوحيد اللى بيخليهم بيحتفلوا باعياد الميلاد انهم بيستفادوا منها ، عيله الفيشافى معظم ثفقاتهم الكبيره بتتم في اعياد الميلاد دى ، طبعا ده غير الناس المهمه اللى بيكونو حضرين الحفلات دى ، وكمان من عاده عيله الفيشاوى انهم بيوزعوا هدايا على المدعوين ، ايوه زى ما بقولكم كده ، هما اللى بيوزعوا هدايا ومش اى هدايا ، لا دوول بيوزعوا هدايا تمنها ملايين .

الفكر هدى كانت فكره المهندس محمود ، بدل ما يعرض على مسئول او موظف مهم في بنك او شركه او اى مكان عوزين منه خدمه بدل ما يديلوه فلوس شكلها زى الرشوه والكلام ده ، فهو فكر يوصل للناس دى الرشاوى بشكل مختلف ، على شكل هدايا غاليه اوى ، يعنى مثلا يهدى لزوجه مسئول او موظف مهم في مكان معين يهديها خاتم الماظ يكون تمنه اكتر من خمسه مليون او عشره مليون جنيه وده تمن الخدمه اللى يقدمها جوزها ليهم وبعده تبقى شكلها حلو وطبعا مفيش اى تهمه جنائيه لان كل اللى حضرين بياخدوا هدايا بس طبعا باسعار وتمن مختلفه كل واحد على قد الخدمه اللى بيقدمها وكمان كل موظف على قد مركزه واهميته .

علشان كده مهما نحاول نفهم عيله الفيشاوى صدقونى صعب تفهموهم هما اشخاص عيشين في عالم تانى عالم ملكهم ومسموح لهم يعملوه فيه اللى شيفينه صح ، والصح بالنسبالهم هو اللى فيه مصلحتهم واللى يخدمهم ، والغلط هو اللى يعطلهم وميخدمش مصالحهم .

اتعملت حفله عيد ميلاد ساره ، بس ساره نفسها كانت مجرد سبب ووجهه مش اكتر زى ما قولنا ، ووصل ياسين قدام قصر الفيشاوى ، وعلشان يدخل القصر لازم يعدى على جيش من الحراسات الخاصه ، مهو الناس اللى جوه مش مجرد اشخاص عاديين ، لا هما صفوه المجتمع واشهر ناس في البلد .

مكنش ينفع اى حد يروح يحضر الحفله دى طبعا ، كل واحد قبل ما يدخل لازم يسلم كرت الدعوه بتاعه ، حتى كرت الدعوه كان معمول بشكل خرافى ، مكتوب بمايه الدهب وبشكل مبهر اوى ، بس ياسين مكن شمعاه كرت دعوه ولما جه يدخل الحراسه رفضت طبعا ، وسعتها خاب امله انه يدخل ، واتصل بساره علشان تدخله بس ساره مكنتش بترد على التليفون ، وكان سبب عدم رد ساره على التليفون انها مكنتش سمعه التليفون بتاعها من الاساس وده بسبب ان صوت الموسيقى والاغانى عالى اوى ، ولما يأس ياسين من رد ساره عليه قرر انه يمشى .

في الوقت ده كانت ساره منتظره ياسين ، وكانت ناسيه انها مبعتتش ليه دعوه علشان يدخل القصر والحفله ، وهى افتكرت انه مش عاوز يجى لما اتاخر وعلشان كده مفكرتش تتصل عليه .

بصت ساره في تليفونها بالصدفه وشافت ان ياسين اتصل بيها كتير اوى ، سعتها حولت تتصل عليه وتكلمه ، بس الصوت كان عالى في المكان اللى وقفه فيه ، علشان كده اتحركت بعيد عن الصوت العالى واتصلت على ياسين اللى كان ابتدى يمشى من قدام القصر .

ياسين كان لسه هيركب عربيته وسمع صوت تليفونه ، ولما بص في التليفون لقى ان ساره هى اللى بتكلمه ، رد عليها بسرعه وسعتها سألته ساره هو فين فعرفها انه جه بس الحرس منعوه لانه معهوش دعوه للحفله ، سعتها ساره اتأسفتله وقالتله انها كانت ناسيه موضوع الدعوه دى ، وطلبت ساره من ياسين انه يروح يدخل القصر وهى هتكلم الحرس علشان يدخلوه ، هو بس يقولهم على اسمه .

فعلا راح ياسين لحرس القصر وقالهم على اسمه وسعتها سمحوله انه يدخل للقصر .

اول لما دخل ياسين القصر حس بشعور غريب ، حس انه زى ما يكون حد ماسك قلبه بايده وبيعصره عصر ، كان ياسين حاسس بالوجع اوى من ساعت لما دخل القصر ، وشعوره بالكراهيه للقصر ده زادت اكتر واكتر .

دخل ياسين وقبلته ساره وطبعا كان لازم يدارى وجعه ويبين ابتسامه على وشه علشان ساره متحسش بحاجه ، وخصوصا ان ساره هى مفتاح وصوله لباقى عيله الفيشاوى .

ابتدى ياسين كالعاده يستمع لكلام ساره وعلى وشه الابتسامه ، وطبعا كان بيضحك على اى نكته او حاجه بتقولها حتى لو مكنتش مضحكه ، مكنش ينفع يقولها ان معظم كلامها مجرد سخافات وانها مش مميزه زى ما هو مبينلها ، وفجأه وسط كل اللى بيحصل ساره تقول ل ياسين : انا عوزه اعرفك على بابا .

سعتها ياسين وافق وقالها : تمام .

راح ياسين مع ساره ووقفت بيه قدام اتنين كانوا وقفين مع بعض ، الاول كان على ابو ساره والتانى يبقى محمود اخوه .

رغم ان على يبقى الابن الكبير لخليل باشا الا انه مكنش كبير العيله ، كبير العيله هو محمود واللى اختاره خليل يكون كبير العيله من بعده .

ساره : بابا اقدمك المهندس ياسين صديقى .

على بص لياسين وقاله : اهلا بيك ، وبص لساره وقالها : بس انا اول مره اشوفه معاكى .

ساره : اه منا اعرفه من مده مش كبيره .

سعتها اتكلم محمود وقال : غريبه انك تعزمى حد لسه عرفاه في قصر الفيشاوى ، مش شيفه نفسك استعجلتى يا ساره ؟

ساره معرفتش ترد على عمها محمود ، مهيا وكل العيله محدش فيهم يقدر يعترض على اى حاجه يقولها المهندس محمود كبير العيله .

سعتها ياسين هو اللى اتكلم وقال : يمكن تكون ساره اتاخرت كتير في دعوه للقصر ده يا باشم مهندس محمود ، يمكن لو انت كنت تعرفنى من فتره كان سعتها قدرت الحقك قبل المصيبه اللى انت وقعت فيها خلاص .

كلام ياسين كان صدمه ومفجأه لكل اللى وقفين ، ساره وعلى ومحمود مكنوش فهمين ايه اللى يقصده ياسين .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda