انتقام الابن 2 ( الجزء العاشر )

انتقام الابن 2 ( الجزء العاشر )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا قبل كده لما دخل خليل باشا علشان يحضر اجتماع عيله الفيشاوى .

طبعا كل الموجودين وقفوا لما شافوا خليل باشا ، وعلشان نفهم ليه خليل اختار محمود مكانه كبير العيله ده علشان محمود كان اكتر واحد مناسب في عين خاليل لرئاسه العيله من بعده ، والحق يتقال محمود انسب من على بكتير ، لان محمود نسخه من ابوه خليل وعنده نفس الجبروت والثقه ده غير انه مهندس وعلى قدر كبير من الذكاء ، كل الحاجات دى رشحته يكون الكبير وكمان في حاجه مهمه اوى ان خليل بيحب محمود اكتر من اخوه على .

خليل خلى محمود كبير العيله وهو عايش علشان لو معملش كده كان ممكن العيله تتقسم وتتفكك بعد موت خليل ، علشان كده خلاه كبير العيله علشان محدش يعترض عليه لما يموت خليل باشا ، بس كل ده ميمنعش ان خليل فضل على مكانته وان محمود كان ديما ياخد رأيه في اى مشكله تقابله وكان بيسمع لكلامه وبيعمل بيه .

وطبعا محمود سمع كلام ابوه واستدعى رجاله من الحراسه وقالهم يرحوا يجيبوا ياسين من بيته ولو بالقوه .

في الوقت ده ياسين كان في بيت وبعد ما رفض يروح القصر اتصل على ساره بعديها بخمس دقائق بس ، وقال ياسين ل ساره : ايوه يا ساره ، انا فكرت في كلامك ، مينفعش تطلبى منى حاجه واقولك عليها لاء ، علشان كده وعلشان خطريك انا جاى القصر .

ساره فرحت بكلام ياسين علشان مكنتش عوزه ان رجاله عمها يجيبوا ياسين بالعافيه ، ومكنتش تقدر تعترض خصوصا ان دى اوامر جدها خليل باشا ، ولما شكرت ياسين في التليفون قالت لعمها قبل ما رجالته تمشى : خلاص يا عمى مفيش داعى انك تبعت حد ، ياسين كلمنى وقالى انه جاى هنا لغايه عندك .

استغرب اللى موجودين ان ياسين غير رأيه بسرعه كده ، حتى ريم قالت : انتى عرفتيه ان في رجاله جايه تخده فطبعا خاف وعرف مقامه وقال انه جاى ، وضحكت ريم بسخريه .

سعتها ردت ساره وقالت : لا يا بنت عمى ، انا مقولتلوش حاجه ، هو اللى اتصل من نفسه وقال انه هيجى علشان خاطر عيونى .

ريم ابتسمت بسخريه وقالت : صحيح كل واحد بيبوص على قد مقامه .

ساره اتضيقت من كلامها وقالت : انتى تقصدى ايه ، انا بنت على الفيشاوى ، يعنى زيى زيك هنا .

وقبل ما ترد ريم اتكلم المهندس محمود وقال : هو ده وقت اللى انتم بتقولوه ده .

ساره : منتا سمعت يا عمى هى قالت ايه ؟

محمود : انا قولت خلاص كله يخرص .

كله سكت ومحدش يتكلم ، وكله قعد يستنى وصول ياسين بدون كلام ، كانه مقعدين في عذاء .

ياسين مكنش غير رأيه علشان خاطر ساره زى ما قال ، هو من الاول كان مستنى اليوم اللى يطلبه فيه محمود الفيشاوى ، بس في الاول كان لازم يتقل عليهم زى ما بيقولوا ، وكمان هو عارف ان عيله الفيشاوى متكبرين ومش هيقبلوا انه يهنهم ويرفض انه يجى ، والاهم انه عاوز يعمل علاقه كويسه بمحمود الفيشاوى وعاوز يدخل في عيله الفيشاوى ولو استمر على رفضه فسعتها ممكن محمود يعتبره عدو ليه وده مش في مصلحه ياسين ، علشان كده ياسين اتصل بساره وقالها انه جاى قصر الفيشاوى .

اخير وصل ياسين لقصر الفيشاوى ، وكالعاده وقفه واحد من حراسه القصر وسأله : انت مين وجاى تقابل مين ؟

ياسين : انا المهندس ياسين وجاى اقابل المهندس محمود الفيشاوى .

الحارس : ايوه اتفضل يا باش مهندس ، احنا عندنا تعليمات انك اول ما توصل تدخل على طول .

دخل ياسين من بوابه القصر ووصل للبوابه الداخليه ، وطبعا كان عليها حراسه واتسأل عن اسمه ولما عرفوه فتحوله الباب على طول ، وكان مع ياسين واحد من الحراسه علشان يدخله لغايه اجتماع عيله الفيشاوى .

ياسين اول لما دخل ولقى كل افراد العيله هو كان عارفهم قبل كده وجامع عنهم معلومات ، الا شخص واحد مكنش عارف ده مين ، طبعا كان خليل باشا نفسه ، مش كتير اللى بيشوف خليل ، كان منعزل عن العالم الخارجى نهائى ، ومحدش يعرف عنه حاجه لدرجه ان ناس كتير افتكروه مات ، وياسين نفسه كان فاكر ان خليل مات ، علشان كده خليل بالنسباله كان شخص مجهول ، ميعرفش عنه حاجه غير اللى حكاله عنه جده سيد ومهتمش يدور وراه لانه افتكره ميت .

دخل ياسين وعينه بتبص على كل الموجودين ، ولما عينه وقعت في عين خليل حس انه بيكره الشخص ده ومش عارف ليه السبب ، بيكره اكتر من كل عيله الفيشاوى ، اكتر من محمود نفسه ، حس ان قلبه مقبوض بمجرد ان عينه جت في عين الراجل العجوز ده .

لما دخل ياسين محمود قاله انه يقعد ، ولما قعد قاله محمود : انا عوز تحكيلى كل حاجه ، انت ازاى كنت عارف ان مبانى المشروع هتقع ؟ وايه سبب وقعنها ؟

ياسين : انا خدت بالى ان معظم مواد البناء اللى كانت في المشروع منتهيه الصلحيه من زمن كبير وخصوصا الاسمنت والحديد وانت عارف يا باش مهندس ان دول اساس كل حاجه .

محمود : وبعدين حصل ايه ؟

ياسين : انا حولت اقول للمهندس اللى بيشرف على المشروع بس لقيت منه انه بيصدنى ، ولما الحيت عرفت ان دى تعليمات واحد من صحاب المال .

اتعصب احمد وقال ل ياسين : انت بتقول ايه انت اتجننت ؟

محمود قاله : مش عاوز حد يتكلم هنا غيرى .

بص محمود ل احمد وقاله : مش شايف ان كلامك في مبالغه ، لو الاسمنت والحديد منهينا لصلحيه بردو مش سبب ان المبانى تقع بالسرعه  دى ولوحدها من غير ما يحصل اى هزه ارضيه ؟

ياسين : مهو لو الاسمنت والحديد كانوا منهينا لصلحيه بس كان كلام حضرتك سعتها هيبقا مظبوط .

محمود : مش فاهم تقصد ايه ؟

ياسين : الاسمنت والحديد اللى استخدموا في المشروع غير صالح للاستخدام ، لانه مش مطابق للمواصفات من الاساس ، الاسمنت ده بيتأكل لما ينضاف ليه مايه .

محمود : ايه الكلام اللى انت بتقوله ده ، احنا مش في فيلم خيال علمى هنا ، انت بتقول كلام مش منطقى اصلا .

ياسين : انا كنت عارف انك هتقول كده ، وطلع ياسين من جيبه كيس فتحه وفرغه على التربيزه وقال : ده اسمنت من اللى اتحط في المشروع ، انا خدت منه عينه علشان اتأكد من الكلام اللى بقولهولك ، ومد ياسين ايده وخد ازازه مايه من على التربيزه وقال دى مايه عديه وحط شويه من المايه على الاسمنت وخلطهم بايده وقال هنستنى عليه وقت ، طبعا الاسمنت ده كميه قليله اوى علشان كده مش هياخد وقت كتير .

بعد ربع ساعه لاحظ المهندس محمود ان كميه الاسمنت قلت عن الاول ، طبعا هو مكنش مصدق عينه ، ويدوب بعد ساعه واحده مكنش في اثر للاسمنت نهائى .

الصدمه خلت كل الموجودين ميتكلموش ، وسعتها ياسين قال : الاسمنت ده مخلوط باسمنت تانى عادى ، علشان كده خد الوقت الطويل ده علشان المبانى تقع .

محمود : انت عرفت كل المعلومات دى ازاى وليه منبهتناش .

ياسين : من كام سنه كان في حاجه غريبه حصلت لمصنع كبير لانتاج الاسمنت في بلد اجنبيه ان انتجهم حصل فيه مشكله وان الاسمنت بتعهم اتفاعل مع المايه وحصله عمليه تأكل ، وسعتها المصنع ده دفع مبالغ كبيره علشان يتخلص من الانتاج بتاعه لانه كارثه طبعا ، واتخلصوا من المنتج ده في الدول الناميه ، واظن ان الاسمنت ده من نفس النوع .

وانا حولت انبهك بس انت مسمعتليش ، وحتى لو كنت سمعتلى مكنش بايدك حاجه تعملها الموضوع كان انتهى .

محمود : مين من العيله اللى عمل كده ؟

احمد : انت مصدق التخاريف ده يا عمى ؟

ياسين : طبعا يا محمود بيه باين ان المهندس احمد اللى سبب الكارث هدى ، يمكن مكنش يعرف ان الاسمنت متأكل بس اكيد كان يقصد انه يجيب مواد منتهيه الصلحيه ، واللى وصله المواد دى ضحك عليه ، وطبعا ده علشان فرق السعر اللى خده المهندس احمد .

انفعل احمد وقام من مكانه ومسك مسدسه وحطه في دماغ ياسين وقاله وهو متعصب : انت مين مسلطك تعمل التمثليه دى انتق قبل ما افرغ المسدس في دماغك .

ياسين متحركش من مكانه كان هادى اوى ، وسعتها محمود قال ل احمد بعصبيه : ايه اللى انت بتعمله ده ، انت اتجننت ترفع مسدسك على واحد قاعد معايا .

احمد : يا عمى ده كداب ، في حد مسلطه يقول الكلام ده ؟

محمود : نزل المسدس قولت .

نزل احمد المسدس ، وسعتها على اتكلم وقال لمحمود : انت طبعا مستحيل تصدق الكلام الفارغ ده يا محمود ؟

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda