انتقام الابن 2 ( الجزء الحادى عشر )

 انتقام الابن 2 ( الجزء الحادى عشر )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا قبل كده لما نزل احمد المسدس وعلى قال لمحمود ان اكيد مش مصدق الكلام اللى قاله ياسين .

محمود بص ل احمد وقاله : ليه عملت كده يا احمد ؟

احمد بعصبيه : عملت ايه يا عمى ، انت هتصدق كلام المجنون ده ؟

محمود : تمام هو مجنون ، ممكن تقولى ايه الحقيقه ، النيابه قالت ان مواد البناء منتهيه الصلحيه وغير مطابقه وهى سبب اللى حصل ، وانت المسئول عن توريد الاسمنت والحديد للمشروع ، يبقى لو مش انت اللى عملت في المشروع كده يبقا مين ؟ قولى جوبنى ؟

احمد : يا عمى لو الكلام ده صح يبقى انا كمان اتغشيت ، اكيد المورد غشنى .

محمود قام من مكانه وراح وقف قدام احمد وبص في عينه وقاله : عذر اقبح من ذنب ، رغم انى مش مصدق انك اتغشيت ، بس لو حتى اتغشيت يبقى اختيارى ليك كان غلط ، ومينفعش تكون من عيله الفيشاوى .

احمد : انا هصلح كل حاجه يا عمى .

محمود : خلاص مبقاش ينفع الكلام .

احمد : يعنى ايه ؟

شاور محمود لواحد من رجالته ، وسعتها ومسك احمد وخد منه سلاحه ، وبعديها شاور لرجلين وخدو احمد بالقوه ، واحمد حاول يقاوم ويبعدهم عنه بس مقدرش ، وابوه على اتكلم مع محمود بعصبيه وقاله : انت مودى ابنى فين ، محمود ده ابنى انت عارف يعنى ايه ابنى .

سعتها حط محمود ايده الاتنين على وش على وقاله وهو متعصب : ابنك خان العيله كله وانت عارف قانون العيله يا على .

على : لا يا محمود ، كله الا ابنى يا محمود .

ساره مكنتش فاهمه حاجه ، وفضلت تسأل ابوها على الرجاله دى وخده اخوها ورحين بيه على فين .

على كل اللى عمله انه حضن بنته ، وكل نظراته لاخوه محمود ولابوه خليل باشا مخلوطه بين الغضب والحقد والكراهيه ، ممكن نقول ان ده اول يوم قدر ياسين ينتقم فيه علا من عيله الفيشاوى ، الكراهيه اللى دبت في اليوم ده بين افراد العيله كان اول مسمار في نعش عيله الفيشاوى .

على مقدرش يقول لبنته ايه اللى هيحصل لاخوها ، ازاى يقولها ان اخوها هيتحط في مدفن من مدافن العيله وهو حي ، هيقولها ان عمها قتل اخوها ودفنه حى ، هيقولها ان هو مش قادر يعارض اخوه ، هيقولها ان جدها موافق على اللى بيعمله ابنه محمود في حفيده احمد ، طبعا مقدرش يقولها غير ان اخوها سافر بعيد عن البلد ومش هيرجع تانى ابدا .

حتى لو على مقلش لبنته ساره حقيقه اللى حصل ، بس ساره مكنتش مقتنعه بفكره سفر اخوها او نفيه حتى ، هى حست ان اخوها حصله حاجه خطيره ، ومن اليوم ده العلاقه بين ساره وياسين اتغيرت ، مبقتش تقدر تنسى ان ياسين هو سبب اللى حصل مع اخوها .

مش بس العلاقه بين ساره وياسين اتغيرت لا ، العلاقه بين ياسين وكل افراد عيله الفيشاوى اتغيرت للعكس تماما ، مثلا محمود بقى شايف ياسين بشكل تانى ، مقتنع انه الشخص المناسب اللى لازم يحل محل احمد ابن اخوه ، اما على فشاف ياسن على انه مشترك في موت ابنه زى محمود بالظبط ، وكان على مصمم انه ينتقم من ياسين باى شكل .

ساره زى ما قولنا علقتها بياسين اختلفت ، مبقتش تشوفه زى الاول صديق ليها وشخص عاجبها لا ، مشاعرها بقت ملغبطه معاه .

بالنسبه ل ريم الموضوع اختلف معاها ، عجابها ياسين واللى عمله ، عجبها اخلاصه لعيله الفيشاوى علشان كده ابتدت تبصله بطريقه مختلفه .

اما ادم فده ليه دماغ لوحده ، هو مش فارق معاه الشغل والشركات ، بس مع الوضع الجديد وبعد اختفاء احمد اجبره ابوه انه يبقا معاه في اداره الشركه ، ودا اسواء حاجه حصلتله ، لدرجه انه علشان يهرب من الواقع ده ابتدى يستعمل الطوابع المخدره ، وهى عباره عن طوابع بتلزق على جسم الواحد ومفعولها زى مفعول المخدرات ، وطبعا ادم كان بيعمل كده علشان يهرب من الواقع اللى عايش فيه ومن احلام ابوه اللى محبوس فيها .

اما خليل باشا فهو مرتحش نهائى ل ياسين ، ولما اتكلم مع محمود في الموضوع ده سعتها محمود طلب منه بديل عن ياسين بس للاسف مكنش في بديل ، بس خليل طلب من محمود انه يكون حذر منه على قد ما يقدر .

مع مرور الوقت ياسين بقا ليه صلحيات كبيره اوى في شركه الفيشاوى ، بمعنى اصح بقا الرجل التانى بعد محمود ، خصوصا ان على دخل في حاله اكتأب من بعد موت ابنه احمد ، وان ادم مبقاش مؤهل لاداره المجموعه بسبب الطوابع اللى بيلزقها وخلت عقله ديما مشوش ووصل لمرحله انه بقا يشوف تهيؤات من كتر الطوابع .

العلاقه بين ياسين وريم اتطورت اوى ، لدرجه ان ريم اتعلقت بياسين ، يمكن لان ابوها طلب منها كده ، محمود كان مقتنع ان ريم اكتر حد في عيله الفيشاوى قدرت تورث جيناته وجينات ابوه خليل باشا ، هى شخصيه عمليه اوى وبتنفذ تعليمات كبير العيله ، ولما حس محمود ان ابنه مبقاش ينفع يدير الشركه من بعده ، وان ريم رغم ذكاءها بس معندهاش الخبره اللازمه انها تبقا رئيسه الشركه ، وفى نفس الوقت ياسين كان متألق اوى في الشغل ، سعتها فكر محمود ان يضم ياسين لعيله الفيشاوى ويجوزه بنته ريم اللى طلب منها انها تكون مسيطره على ياسين ، لو قدرت تكون هى المتحكمه فيه بعد ما تتجوزه سعتها كانها هى اللى بتدير شركه الفيشاوى وتكون هى المتحكمه في اداره العيله من بعد ابوها محمود .

علشان كده في البدايه ابتدت ريم تظهر اعجابها بياسين وتحاول تكسب حبه ، لدرجه ان ياسين وقته بقا مقسوم ما بين الشركه من ناحيه وبين ريم من ناحيه تانيه .

طبعن جواز ريم من ياسين كان مستحيل ، اولا محمود احتمال كبير اوى يكون هو ابو ياسين ، وسعتها ريم تبقا اخت ياسين ، وحتى لو مش اخته مستحيل ياسين يقدر يتجوز وحده من عيله الفيشاوى ، لانه عمره ما كره حد قد ما بيكره العيله دى .

بس ياسين كان بيمثل انه متماشى مع ريم ومعجب بيها وده طبعا علشان يكمل انتقامه ، بس اللى مكنتش موافقه على كل اللى بيحصل هى ساره ، لما لحظت ساره العلاقه اللى بقت تربط ريم بياسين كل اللى جه في بالها ان ريم بتعمل كده علشان تاخد ياسين منها ، وده طبعا لان ريم ديما بتاخد اى حاجه بتكون مع ساره ، علشان كده ساره قررت تستعيد ياسين منها ، وفعلا حصل بين ساره وريم خناقات بسبب ياسين ، وتدخل ساره خلت العلاقه بين ياسين وريم مش على احسن حال .

في الوقت ده حصلت حاجه مكنتش ساره متوقعاها ، ساره ابتدت كل يوم تستنى ياسين قدام الشركه علشان يخرج معاها ، وطبعا علشان متديش فرصه لريم انها تقابله ، وفى مره من المرات ركب ياسين عربيه ساره ومشى معاها ، وفى اثناء الطريق وقفت ساره ى اشاره مرور ، وكان ياسين اتخنق من تطفل ساره المتزايد طبعا ، وساره بتكلم ياسين بصت جنبها شافت حاجه غريبه اوى ، شافت واحد قاعد في عربيه وبيبصلها ، الغريبه ان الشاب ده وشه كان غرقان دم ، والاغرب ان الشاب ده هو نفس الشاب اللى قتلته ساره من فاتره في الطريق المهجور اللى قابلت فيه ياسين سعتها .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda