عوالم خفيه ( الجزء الخامس )
 |
عوالم خفيه ( الجزء الخامس ) |
قبل استكمال احداث قصتنا ، لمشاهده الجزء السابق ( اضغط هنا ) ، توقفنا قبل كده لما حلمت رشا ان منال كانت السبب ان النار تمسك فيها .
كل ما الوقت يعدى كانت رشا بتتعرض لمواقف صعبه ، زى ما يكون فى حاجه
عوزه تمنعها من تكمله القصه ، علشان كده كل ما تقراء فى القصه الموضوع بيبقى صعب
عليها اكتر ، والمشكله ان رشا تعاند اكتر وتصمم تكمل الروايه .
قعدت رشا تقراء فى الروايه وتكمل احداثها ، وكان ياسر بيقول : تانى
يوم قبلت امل فى نفس الوقت بتاع امبارح تقريبا ، وبعد كده فضلت تحكيلى باقى
الحكايه وقالت :
منال مكنتش وحده بسيطه وسهله زى ما الناس كانت فاكره ، هي كانت عوزه
تخلص من كل العيله ، ومحدش كان يعرف السبب سعتها ، وبعد ما خلصت منال من رجاء ،
كان الدور على غاده ، وطبعا منال زى العاده اتسحبت واتمسكنت لغاده علشان تقرب منها
على قد ما تقدر .
منير جوز غاده كان شغال فى الدهب ، وغاده كانت عرفه كل حاجه عن جوزها
، وكانت عرفه ان جوزها مش كل شغله قانونى ، ومحدش تانى فى العيله كان يعرف الكلام
ده ، ومنال باللى كانت بتعمله من مسكنه قدام غاده سعتها غاده قالت لمنال طبيعه شغل
جوزها ، ومكنتش تعرف ان منال كانت مستنيه الفرصه دى ، وفعلا معداش يومين غير
والبوليس كان قابض على منير ، ولما النيابه دورت ورا منير فى كل حاجه عرفوا عنه
بلاوى ، لغايه ما اتراكمت القضايا على منير واتحبس وخد حكم يخليه يقعد العمر كله
فى السجن .
طبعا غاده كانت منهاره ، ومكنتش تعرف ان منال هى اللى بلغت على جوزها
، ومنال فضلت تتمسكن لغاده زى ما هى .
منال كانت مش بس عوزه تخلص من غاده وجوزها زى ما خلصت من رجاء وجوزها
لا ، هى كانت عوزه توقع غاده فى ريم ، وده اللى حصل ، لما فى ليله راحت منال لاوضه
غاده وكانت الساعه 2 بعد نص الليل وكانت ماشيه تتسحب ، وخبطت على اوضه غاده ودخلت
عندها وقالتها انها عرفت مين اللى بلغ على منير جوزها ، وان اللى بلغ هو نصر جوز
ريم ، وطبعا هو عمل كده علشان ميبقاش فى راجل غيره فى القصر ويبقا هو المتحكم فى
كل حاجه .
غاده فى الاول مصدقتش الكلام ده ، كانت دماغها مليانه باسأله كتير ،
واهم سؤال ازاى عرف نصر بطبيعه شغل منير ، بس الصدفه هى اللى خدمت خطه منال ، وده
حصل لما كانت ريم وجوزها نصر بيكلموا غاده وبيقترحوا عليها ان نصر يساعد غاده
ويدير كل شغل جوزها منير ، سعتها غاده فكرت ان نصر واختها طمعنين فيها ، وسعتها بردو
فكرت ان ممكن فعلا نصر هو اللى بلغ عن جوزها منير وان ريم شريكه معاه فى الموضوع .
غاده مردتش على اقتراح ريم وجوزها ، بس كل ما يعدى يوم قلبها يسود على
اختها وجوزها وبتفكر ازاى تنتقم منهم باى شكل ، غير طبعا ان منال بقت اهل الثقه
ليها وشيفاها انها الوحيده اللى خايفه على مصلحتها .
اللى زود الموضوع ان منير مقدرش يستحمل انه يفضل فى السجن عمره كله ،
وفعلا جه الخبر انه انتحر فى السجن ، وبقا نصر وريم عند غاده مش بس حبسوا جوزها ،
دوول كانوا السبب فى موته .
ومن سعتها وبقا اى تصرف تعمله ريم او يعمله نصر بحسن نيه تفسره منال
لغاده على انه شر هيصيب غاده ، وفى الاخر منال قالت لغاده ان ريم وجوزها بيفكروا
يقتلوها علشان يورثوا املاك جوزها منير ، غاده صدقت على طول وطلبت من منال انها
تنصحها تعمل ايه ، وسعتها منال طلبت منها تخلص هي من ريم وجوزها قبل ما يقتلوها .
الموضوع مكنش سهل على غاده انها تقتل اختها ريم ، بس وقت ما بيحس
الواحد ان حياته قصاد حيات اى حد تانى بيختار حياته طبعا ، حتى لو كان الحد التانى
ده اخوه من لحمه ودمه .
المرادى منال سعدت غاده ، حطت منال منوم لريم وجوزها علشان تسهل على
غاده اللى هتعمله ، وفعلا نامت ريم ونام جوزها فى سريرهم ومحسوش بحاجه ، ودخلت
عليهم غاده وكتمت نفاسهم بمخاده لغايه ما ماتت ريم ومات جوزها ، ورجعت غاده
لاوضتها بعد كده وكانها معملتش حاجه .
تانى يوم ريم وجوزها نصر اتأخروا عن ميعاد صحيانهم من النوم ، ولما
طلعت خدامه تصحيهم محدش فيهم قام ، وسعتها اتصدم الجميع لما سمعوا صراخ الخدامه
وهى بتنادى وبتقول ان الست ريم هانم ونصر بيه ماتوا .
الدنيا اتقلبت وجه دكتور واكد انهم فعلا ماتوا ، وطبعا كان الطبيعى ان
الدكتور يقول انهم ماتوا بشكل طبيعى ومفاجيء ، مفيش عليهم علمات قتل او عنف ،
وسعتها اتعمل تصريح دفن علشان تدفن ريم وجوزها .
فعلا بعد ما وصلت ريم وجوزها نصر للمقابر اللى هيتدفنوا فيها ، وقبل
ما يتدفنوا ، البوليس ملا المكان ، ومنع عمليه الدفن ، واتحفظ على جثه ريم وجثه
نصر علشان يتعرضوا على الطب الشرعى ، فى بلاغ متقدم من مجهول ان الاتنين ماتوا
مقتولين .
معداش كام يوم الا وكل حاجه انكشفت ، غاده اعترفت على نفسها انها قتلت
اختها وجوزها نصر ، بس الغريب ان غاده مقلتش ان منال هى اللى حطت المخدر لريم
وجوزها ، هى كانت بتردلها الجميل انها سعدتها وكانت مخلصه ليها ، طبعا ده اللى
كانت مفكراه غاده ، بس الحقيقه اللى هى متعرفهوش ، ان منال هى اللى بلغت البوليس
عن جريمه قتل ريم وجوزها نصر ، مش بس كده كانت السبب الرئيسى ان البوليس يتهم غاده
، علشان منال كانت مصوره غاده وهى بتقتل ريم ونصر وغاده مكنتش وخده بالها ، وبعتت
منال الصور دى للبوليس علشان تخلص من غاده .
وبعد فتره صغيره اتحكم على غاده بالاعدام ، واللى حصرها اكتر ان قبل
تنفيذ حكم الاعدام بيوم ، راحت منال وقابلت غاده ، طبعا غاده كانت مفكره ان منال
جيه تزورها قبل ما يعدموها علشان هى وفيه ليها وكمان علشان تشكرها انها مقلتش عنها
حاجه فى التحقيق ، بس اتصدمت غاده لما منال عرفت غاده ان ريم وجوزها نصر مكنوش
عوزين يقتلوها ولا حاجه ، وان منال هى اللى بلغت عن جوزها منير وكانت سبب موته ،
وهى اللى خلتها تقتل ريم ونصر وهما معملوش اى حاجه وحشه فيها .
سعتها غاده مستحملتش الخبر ، وتانى يوم لما جه وقت حكم الاعدام
اتفاجيء السجان ان غاده ماتت بشكل طبيعى نتيجه سكته قلبيه ، وطبعا وكانت منال هى
سبب موت غاده .
هنا اتوقفت امل عن الكلام وطلبت منى انها تمشى علشان الوقت اتأخر ،
وانا وافقت وسبتها تمشى ، ونمت الليله دى كمان فى العربيه على امل انى اقابل أمل
بكره وتكملى باقى حكايه القصر الغريب ده .
حتى رشا وقفت قرايه ، حست انها تعبت من القرايه ، وكانت محتاجه للراحه
، قامت رشا ودخلت اوضتها علشان تنام ، هي كانت متعوده تطفى كل الانوار علشان تعرف
تنام ، ولما طفت النور زى كل يوم ونامت على سريرها ، وكان عقلها مشغول باللى قريته
، وبعد وقت قصير غلب النوم عيون رشا ، بس مكنش لوقت طويل ، علشا بعد حوالى نص ساعه
تقريبا صحيت رشا على صوت حركه فى الاوضه بتاعتها ، ومدت رشا ايديها علشان تنور نور
الاباجوره اللى جنبها ، بس بدل ما تحط ايديها على زرار الاباجوره لقت ايديها
محطوطه على حاجه تانيه ، زى ما يكون ايد حد ، ايد مفيهاش لحم وجلد ، ايد متكونه من
العظم بس ......
الى هنا يكون نهايه حديثنا اليوم
ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم
وتعليقاتكم .
لو اى حد حابب ينشر الروايه بصفحته او باى جروب يتفضل ، بس فضلا
انسبهالى لانها مجهودى .
اترككم فى رعايه الله
yasser oda