عوالم خفيه ( الجزء الاول )

عوالم خفيه ( الجزء الاول )

من ساعت ما عملت جروب عوالم خفيه وانا فكرت اعمل روايه تكون بنفس الاسم ، بس كل شويه أجل الموضوع ده ، بس خلاص جه وقته ، انا اخترت اسم معظم ابطال الروايه من ادمن الجروب وكمان من اسماء اعضاء الجروب ، بس الاشخاص اللى فى الروايه ملهمش اى صله بالواقع .

حكايتنا بتبتدى مع رشا ، رشا دى شخصيه غريبه شويه ، من النوع اللى بتعشق قرايه القصص والروايات ، والمفضل عندها قصص الرعب ، هى من النوع القديم اللى بيحب يقراء الروايات المكتوبه ومنشوره فى كتب ، بتحب تمسك الورق وتشم ريحه الورق اللى لسه فتحاه فى الكتاب ، حاجه كده غريبه زى ما بقولكم ، بس الاغرب ان رشا بتعيش احداث القصص ، وهيا بتقراء اى روايه بتبقا شايفه كل الاحداث اللى بتقراها ، واللى بيميز رشا انها عمرها ما خافت ابدا ، القصص اللى ممكن نشوفها احنا مرعبه هيا شيفاها كوميديه ، وعمرها ما حست بالخوف ونفسها تلاقى قصه او روايه تخوفها .

رشا كانت بتعرف مكتبات واسواق بيع كتب روايات كتير ، بس اهم مكتبه هى بتروحلها بتاعت راجل عجوز اسمه عم طه ، دى مكتبه صغيره فى شوارع القاهره ، مكتبه مش معروفه اوى يعنى ، ورشا عرفت مكانها بالصدفه وه بتلف تدور على قصص متكونش قرتها قبل كده ، اللى بيميز مكتبه عم طه ان المكتبه بتعته ورثها من ابوه ، وكل الكتب اللى فيها قديمه من زمان ، وعم طه عمره ما اشترى قصص جديده وحطها فى المكتبه ، بس القصص والروايات اللى فى مكتبته ، متلقهاش عند حد غيره .

دخلت رشا مكتبه عم طه ، لقت عم طه قاعد على الكورسى ونايم تقريبا ، فقربت منه رشا وبتهزه علشان يصحا وبتقوله : عم طه ، عم طه ، انت نايم كده ليه ؟

بس عم طه مصحيش سعتها ، ووقتها رشا قلقت على عم طه ، افتكرت انه حصله حاجه ، فقعده تهزه جامد وتقل : قوم يا عم طه انت مت ولا ايه ؟

ولما زقت رشا عم طه جامد سعتها قام من النوم ، اصل نومه تقيل شويه ، واتفزع عم طه من رشا وقام من نومه وقالها : فى حد يصحى حد كده ؟

رشا : انت لسه حى يا عم طه ، انا افتكرتك مت .

عم طه : مت ايه انتى بتفولى فى وشى ، انا لسه بدرى عليا .

رشا : ماشى يا عم الصغير ، انا غلطانه متزعلش .

عم طه وهو مبتسم : ايه كنتى خيفه عليا ، هتزعلى لو مت .

رشا : طبعا هزعل دى عوزه كلام ، هلاقى حد اخد منه روايات فيه ، لسه هدور على مكتبات للروايات القديمه تانى .

عم طه : بقا ده كل اللى يهمك .

رشا : اكدب عليك يعنى ، ولا اكونش بحبك يا راجل يا عجوز ؟

عم طه : هيفضل لسانك ده يحدف طوب كده طول عمرك ، قولى جيه ليه ؟

رشا : هكون جيه ليه ، عوزه روايه جديده مقرتهاش ، اقصد قديمه هو انت عندك حاجه جديده اصلا .

عم طه : والله منا رادد عليكى ، خشى خدى اللى هتخديه وسيبى الفلوس وامشى .

ابتسمت رشا ودخلت المكتبه تدور على روايه متكونش قرتها ، وهى بتدور بين الكت والروايات ، ايديها خبطت روايه فوقعت من على رف الكتب ، مسكتها رشا علشان تحطها على الرف ، بس وهى بتحطها لمحت اسم الروايه ، كان مكتوب عليها روايه عوالم خفيه .

استغربت رشا من اسم الروايه وقالت لنفسها : ايه الاسم ده ، مش ده اسم مسلسل لعادل امام ، حتى الاسامى بقت تتكرر ، ولا دى روايه المسلسل ، وقلبت رشا ضهر الروايه علشان تشوف اسم المؤلف ، فلقت مكتوب عليها اسم المؤلف ياسر عوده .

رشا قالت لنفسها : مين ياسر ده ، ده مش مؤلف المسلسل ، حتى الرسمه اللى على الروايه تحس انها رعب ، انا هوجع دماغى ليه ، وراحت حطت الروايه على الرف واختارت رويتين تانين ، ومشيت رشا علشان تخرج من المكتبه بعد ما تدفع حق الرويتين .

بس نعمل ايه فى الفضول اللى مسك دماغها ، فضولها رجعها تانى للرف بتاع روايه عوالم خفيه ، ومسكت الروايه وخدتها .

وقفت رشا قدام عم طه ودفعت حق الروايات اللى خدتها ، وبعدين سألت عم طه وقالتله : انت تسمع عن مؤلف اسمه ياسر عوده يا عم طه ؟ اصل انا اول مره اسمع عنه ؟

بس عم طه كان حالف انه ميكلمش رشا ، وفعلا مردش عليها ، فمهتمتش رشا وخدت الروايات ومشيت علشان تروح بيتها .

روحت رشا بيتها ، وفى الليل قالت تبتدى تقراء اى روايه من اللى لسه جيباهم ، احتارت تبتدى بمين ، بس فكرت تبتدى بعوالم خفيه علشان لو طلعت وحشه يبقا فى وراها روايات تانيه علشان متزعلش .

المهم مسكت الروايه وفتحتها ، اول ما فتحت رشا الروايه انصدمت ، دى مش روايه مطبوعه ، دى روايه مكتوبه بخط الايد ، طيب ازاى ده ، حست رشا ان الروايه دى هتبقا اسوء حاجه هيا قرتها ، وفعلا مسكت الرواويه ورمتها على الارض وهى زهقانه وغضبانه اوى ، وفضلت قعده سكته لمده ربع ساعه تقريبا مش بتعمل حاجه او حتى بتتحرك نهائى .

كانت متعصبه بس هديت ، وراحت ومسكت الروايه اللى رمتها وقررت انها تقراها يمكن متطلعش وحشه زى ما هيا مفكره ، وابتدت رشا تقراء الروايه ولقت ان اول صفحه مكتوب فيها : انا ياسر عوده اللى كاتب الروايه دى ، بس قبل ما يقراها اى حد عاوز احظره ، كل اللى فى الروايه دى حقيقى وحصل معايا انا شخصيا ، لو قررت تقراها اعرف انك بتتعرض لخطر كبير ، الروايه دى جواها لعنه بتصيب اى حد فضوله يخليه يقراها ، والفضول ممكن يكون سبب نهايتك .

بعد ما قرت رشا الكلام ده ، استغربت وقالت لنفسها : دا المؤلف ده شكله اما مجنون او اهبل ، اكيد علشان كده محدش يعرفه او سمع عنه ، ده مش عاوز الناس تقرا روايته ، والله انا مشفتش حد غبى زيه قبل كده .

رشا زى ما قولنا من النوع اللى مايخفش ابدا ، والفضول بتعها وعندها خلاها ماتسمعش كلام مؤلف الروايه ، وقررت تقراء روايه عوالم خفيه ، بس مكنتش تعرف ايه اللى مستنيها ، ومكنتش تعرف ان الروايه جوها لعنه هتصيب اى حد يقراها ، مهو ساعات الفضول بيودى صاحبه فى داهيه .

بداءت رشا تقراء الروايه وكان مكتوب : انا ياسر واحد من الملاين اللى عيشين ، بحب السفر وازور اماكن كتير ، عاوز اجمع قصص حقيقيه واحطها فى روايات ، وعلشان كده بسافر لاى بلد وادور فيها عن القصص الغريبه اللى حصلت ، لغايه ما وصلت لقريه اسمها قريه الملاعين ، دى قريه موجوده بين حدود دولتين ، اول ما شفت اسم القريه حسيت انى هلاقى فيها اللى كنت بدور عليه ، ودخلت القريه بسرعه وانا فرحان باللى هشوفه ، بس مكنتش اعرف ان فضولى ده هيخلينى اعيش باقى حياتى فى عذاب .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda