عوالم خفيه ( الجزء السادس )

 عوالم خفيه ( الجزء السادس )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا قبل كده لما حست رشا بحركه فى الاوضه ، ومدت ايديها علشان تنور نور الابجوره ، وبدل ما تمسك كوبس الاباجوره لقت نفسها حطه ايديها على ايد عظميه بدون جلد او لحم .

طبعا الموقف ده صعب على اى حد ، كلنا عرفين ان رشا مابتخفش ، بس فى اوقات لازم اى حد فينا يحس فيها بالخوف ، وده اللى حصل بالظبط ، لاول مره خافت رشا ، يمكن تكون متفزعتش واحسسها بالخوف كان قليل ، بس ده ميمنعش انا كانت خيفه .

رشا اول حاجه فكرت فيها انها تقوم بسرعه تنور الانوار ، مهيا معرفتش توصل لكوبس الاباجوره ، ولما قامت رشا علشان توصل لنور الاوضه الرئيسى كانت عماله تخبط فى الاثاث ، من خوفها وقلقها مبقتش عارفه هي فى اى مكان فى الاوضه ، كانت زى ما تكون تايهه ، عماله تحسس على الحيطه علشان توصلها ، وكانت مستعجله ، وكل شويه تتخبط فى حاجه ، بس فى الاخر وصلت رشا لكوبس النور ، ونورت رشا نور الاوضه ، وراحت بسرعه علشان تشوف ايه الايد العظميه اللى مسكتها ديه ، بس للاسف ملقتش حاجه .

رشا مكنتش فاهمه ايه اللى حصل ، طيب هي كانت بتحلم ولا دى حقيقه ، ووصلت لمرحله الشك فى نفسها وفى عقلها وفى الحاجات اللى بتحصلها ، ده طبيعى كلنا بيحصل معانا كده ، اوقات تبقا متأكد من حاجه حصلت ، وبعدين تشكك فى حدوثها ، ويفضل الشك يكبر فى قلبك ، لغايه ما توصل لمرحله متبقاش عارف اللى شفته ده كان حقيقه ولا حلم .

قعدت رشا ساعه تقريبا تفكر فى اللى حصل وحسه بالخوف ، بس قدرت تقنع نفسها ان اللى حصل ده خيال او حلم ، قدرت رشا تتغلب على الموضوع ، ورجعت لسررها علشان تنام ، فى الاول كانت قلقانه شويه بس بعديها اقتنعت ان مفيش حاجه ، وطفت رشا الانوار ، وبعد عشر دقايق رجع النوم لرشا ، وغمضت علشان تنام وفعلا نامت .

رشا كانت فكره ان يومها انتها ، بس كان لسه فى بقيه ، معداش نص ساعه وظهرت الايد العظميه دى مره تانيه ، طبعا النور كان مطفى ، ورشا مشفتهاش بس حست بيها لما لقت الايد دى محطوته على وشها ، حاجه تفزع لما تحس بان فى ايد عظميه لمسه وشك وضغطه على فمك ومخلياك مش قادر تتكلم او تصرخ ، مسكت رشا الايد العظميه علشان تبعدها عنها ، بس قوة رشا مكنتش تقدر على الايد ديه ، بس رشا مسكتتش وفضلت تعافر وتحاول لغايه ما قدرت ترمى الايد دى بعيد عنها .

رشا بعد ما رمت الايد ، نزلت من على السرير تجرى علشان تخرج من الاوضه ، مفكرتش تنور النور زى المره اللى قبليها ، كل اللى فكرت فيه انها تخرج من الاوضه دى وخلاص .

رشا فضلت تجرى وتتخبط فى الحيطان وتوقع وتقوم وتجرى لغايه لما خرجت من الاوضه ، وبعد كده نورت انوار الشقه وكانت رشا المرادى مرعوبه فعلا .

رشا فضلت قعده فى البلكونه ومنوره جميع انوار الشقه ، ولما النهار طلع ، سعتها قررت رشا انها لازم تتخلص من اللى بيحصلها ، وكان لازم يبقا فى حل للموضوع ده ، علشان كده لازم هي تكمل باقى الروايه كلها علشان تعرف تحل المشكله اللى وقعه فيها .

مسكت رشا الروايه وبداءت تكمل قرايه وكان مكتوب فيها على لسان مؤلف الروايه ياسر : تانى يوم قابلت أمل فى نفس الميعاد تقريبا ، وكملت امل حكايه قصر سوار هانم وقالت : معظم العيله ماتوا بعد اللى حصل ، مبقاش غير سوار هانم وحفيدتها همس ، وسوار هانم كانت تعبت من كل اللى حصل ، مهى فقدت بناتها وازواجهم فى وقت قصير اوى ، وصحتها مبقتش تستحمل كل اللى حصل ده ، والغريب صحتها كانت بتدهور بسرعه ، مكنش حد عارف ان السبب هى منال ، كانت بتسمم سوار هانم ببطء شديد ، ووصلت سوار هانم لمرحله انها مابقتش تفارق سريرها .

هنا انا قطعت امل وقولتلها : يعنى سوار هانم ماتت مسمومه ؟

ردت عليا امل وقالت : كان المفروض تموت مسمومه ، بس حصل حاجه مش متوقعه خلت منال تغير خطتها وتعجل بموت سوار هانم وحفيدتها همس .

حصل ده لما كانت سوار فى حاله غيبوبه تقريبا ، وكانت منال وابنها بلال فى اوضه سوار هانم ، وسأل بلال امه وقالها : هى ست سوار هانم هتموت زى اللى ماتوا يا ماما ؟

فردت عليه منال وقالت : ايوه يا حبيبى ، هتغور زى اللى غاروا .

بلال : ليه يا ماما دى طيبه اوى وديما تجبلى هدوم جديده .

منال : يا حبيبى محدش فى العيله دى طيب ، كلهم عوزين الحرق ، انا قتلتهم كلهم علشانك ، علشان تورث انت كل حاجه ، هما كفايه عليهم اللى عشوه ، دلوقتى جه وقتك ، انا ممكن علشانك مش اقتل اللى فى القصر ده ، انا ممكن اقتل اهل القريه كلهم علشانك انت يا حبيبى .

مكنتش تعرف منال ان سوار هانم فاقت من الغيبوبه وسمعت كل كلامها ، طبعا سوار هانم مكنتش مصدقه اللى سمعته ، ومقدرتش تمسك نفسها ، وفضلت تهدد منال انها هتسلمها للبوليس وانها لازم تاخد عقابها على اللى عملته .

منال كانت لازم تتصرف سعتها ، وجبت همس حفيده سوار هانم ، وحطت همس مع سوار هانم فى الاوضه ، وولعت فى الاوضه ، والنار مسكت فى كل حاجه فى الاوضه لغايه ما اتفحمت سوار هانم وحفيدتها همس معاها .

حدثه زى ده كان لازم البوليس يحضر فيها ، سوار هانم كانت حد مشهور ومعروف ، ومنال انكرت انها كانت بالقصر وقت الحادثه ، والغريبه قدرت تقنع اهل القريه كلهم انهم يشهدوا معاها بالكلام ده بعد ما وعدتهم انها هتكافأهم مكافأه كبيره لو شهدوا معاها ، وفعلا خرجت منال وبقت هى صاحبه القصر وكل الاملاك هي وابنها بلال .

منال كانت ست ذكيه اوى ، قدرت تحقق كل اللى عوزاه ، وكانت عمله حساب كل حاجه ، بس مهما كنت ذكى سعات الظروف بتغلبك ، منال مكنتش عمله حساب ان الحقد اللى ماتت بيه سوار هانم وهمس حفيدتها هيعيش ومش هيموت ، وان الحقد ده هيخلق لعنه تصيب القصر والقريه كلها كمان .

سعتها انا اتكلمت وقولت لامل : ليه حصل ايه ؟

امل : الموضوع بداء لما منال واهل القريه ابتدوا يشوفوا وحده شكلها غريب فى اماكن ضلمه فى القريه وكمان كانت بتظهر لمنال فى القصر ، واللى عرفوه بعد كده ان اهل القريه والقصر هما بس اللى بيشوفوا الست دى ، وبعد كده الموضوع اتغير ، بقت تحصل حالات موت كتير فى القريه من غير تفسير ، والحاجه المشتركه بين كل اللى بيموتوا انهم بيموتوا وعلى وشهم حاله فزع وخوف .

لما حالات الموت بقت كتير اوى فكر ناس كتير من القريه انهم يهربوا من القريه ويروحوا لاى حته تانيه ، بس المصيبه ان اى حد فيهم كان يخرج وينام فى اى مكان بعيد عن القريه يصحى تانى يوم يلاقى نفسه جوه القريه مره تانيه ، ومن سعتها محدش يقدر يخرج من القريه وبقا اسمها قريه الملاعين .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda