هلال ( عوده الغول ) الجزء الثالث عشر
 |
هلال ( عوده الغول ) الجزء الثالث عشر |
هلال قرب من عربيه سمر وقالها : احنا اتقابلنا قبل كده فكرانى ؟
سمر اطمأنت ونزلت من عربيتها وقالتله : ايوه فكراك انت اللى نقذتنى
قبل كده .
هلال : ايوه وكنت محتاج منك خدمه .
سمر : انا دورت عليك كتير علشان اشكرك واكفأك على اللى عملته معايا بس
معرفتش اوصلك انا معرفش عنك حاجه حتى معرفش شكلك اصلا .
هلال : انا واقع في مشكله ، في حد ظلمنى ولبسنى تهمه مش بتعتى وكنت
محتاج مسعدتك .
سمر : انا مش فاهمه حاجه ؟
هلال شال التلفيعه اللى على وشه ، واول لما سمر شافته عرفته ، هو نفس
الشخص اللى قتل اخوها وعرفت من الاخبار انه هرب ، سمر خافت سعتها من هلال ، ولسه
هتفتح باب عربيتها علشان تدخلها بس هلال منعها وحط ايده على الباب وقالها : لو
سمحتى اسمعينى الاول وبعدين اعملى اللى انتى عوزاه .
سمر كانت خايفه من هلال ، وردت عليه بخوف وقالتله : انت عاوز منى ايه
، عاوز تقتلنى زى ما قتلت اخويا ؟
هلال : انا مقتلتهوش ، في حد قتله وبيشيلنى الليله كلها .
سمر : والمفروض انى اصدقك يعنى ؟
هلال : ايوه لازم تصدقينى ، انا بقول الحقيقه .
سمر : اللى زيك لازم يتعدم .
هلال : هسألك سؤال وجوبينى وهسيبك تمشى بعديها لو عوزه .
سمر : سؤال ايه ؟
هلال : انتى اللى يهمك ان انا اللى اتعدم ، ولا اللى قتل اخوكى هو
اللى يتعدم ؟
سمر : اللى قتل اخويا طبعا ، بس كل الدنيا اتأكدت ان انت القاتل .
هلال : طيب في قاتل يعرض نفسه للخطر علشان ينقذ وحده ميعرفهاش زى ما
عملت معاكى قبل كده ؟ وفى قاتل بعد ما يهرب من السجن بدل ما يهرب بره البلد مثلا
او يستخبى في مكان بعيد علشان الحكومه متمسكهوش ، يعرض نفسه للخطر ويقابل اخت
القتيله علشان يطلب مسعدتها علشان يثبت براءته ؟
سمر سكتت ثوانى وبعدين قالت : يمكن كل اللى بتعمله ده مجرد تمثليه مش
اكتر .
شال هلال ايده من على باب العربيه وقال ل سمر : عوزه تمشى اتفضلى مش
همنعك ، بس لو جواكى شك حتى لو واحد في الميه يبقى اسمعينى .
سمر فتحت باب العربيه وركبت العربيه ومشيت بيها فعلا بس مكملتش عشره
متر ووقفت ، كلام هلال زرع في قلبها الشك ، وكمان تصرفاته انه سابها تمشى فعلا
واللى عمله قبل كده معاها كل ده خلاها تقف وتفكر ان في احتمال يكون صادق وان
القاتل الحقيقى عايش حياته ومدفعش تمن جرمته .
رجعت سمر بعربيتها ووقفت عند
هلال اللى مكنش اتحرك من مكانه ونزلت من عربيتها وقالتله : انا سمعاك اتكلم .
وهنا اتكلم هلال وحكلها كل حاجه حصلت معاه من ساعه لما شاف حادثه
اخوها لغايه لما اتسجن ولبس التهمه كلها .
سمر : يعنى انت عاوز تفهمنى ان في حد خلى كل الادله تدينك انت ؟
هلال : اللى حكتهولك هو الحقيقه ، حتى الكشك وصحبه اللى كانوا موجودين
اختفوا .
سمر : وهتثبت براءتك ازاى ؟
هلال : كان في وحده مع اخوكى يوم الحادثه ، انا عارف شكلها كويس ،
وكنت عوزك توصلينى ليها .
سمر : طيب ازاى انا معرفهاش ، بصراحه شريف مكنش بيحكيلى على اللى
بيحصل معاه نهائى ... وسكتت سمر وبعدين زى ما تكون افتكرت حاجه وقالت : انا افتكرت
لما اخويا مات فتحت صفحاته على الفيس وتويتر والانستجرام علشان كان وحشنى واتفرج
على صوره ، وكان متصور مع بنت معرفهاش وبعديها بفتره لما فتحت الصفحات دى تانى
لقيت ان صوره مع البنت دى اتمسحت .
هلال : يبقى هى اللى بدور عليها ، يعنى انتى متعرفيش ترجعى الصور دى .
سمر : الصور دى معايا على التليفون ، انا حفظتها في تليفونى اول مره
فتحت فيها الصور دى استنا اطلها من على التليفون .
مسكت سمر تليفونها وفتحت الصور وورتها ل هلال ، وسعتها هلال قالها هى
نفس البنت اللى كانت مع اخوكى ، ابعتيلى الصور دى على تليفونى انا عندى اللى
يعرفلنا مين البنت دى .
وكمان ابعتيلى عناوين صفحات اخوكى يمكن تنفعنا في حاجه .
سمر : تمام بس انا معرفش الارقام السريه للصفحات دى ، انا كنت بتفرج
على الصور من الصفحات بتحتى .
هلال : متقلقيش اكيد ماجد عنده حل للمشكل هدى ابعتيلى العناوين بتعتها
.
سمر : معرفش مين ماجد ده بس هات رقمك ابعتلك كل حاجه .
سمر خدت رقم هلال وبعتتله كل اللى هو طلبه وبعديها هلال قالها : هتصل
بيكى واعرفك كل جديد ، وانتى كمان لو عرفتى او افتكرتى حاجه كلمينى .
سمر : تمام ، بس عوزه اقولك ان لو انت اللى فعلا قتلت شريف انا هسلمك
للحكومه بنفسى .
هلال : وانا موافق .
مشيت سمر ومشى هلال اللى اول لما وصل لشقته اتصل بماجد وطلب منه انه
يجيله ولما وصل ماجد ووراه صور البنت اللى كانت مع شريف وعناوين صفحات شريف
للتواصل الاجتماعى وطلب منه يعرفله مين البنت دى ويحاول يوصل لاى حاجه من الصفحات
ديه .
ماجد : ماتقلقش يا برنس اعتبر كل حاجه حصلت .
هلال : طيب ازاى ؟
ماجد : بالنسبه للصوره احنا حبايبنا في كل حته ، هنعمل نشره للصوره دى
واكيد هنوصل لصحبتها ، وبالنسبه للصفحات احنا عندنا واحد هكر شغال تبعنا بس ايه
دماغه دى شيطانيه هيعرف يوصل ويفتح الصفحات ويعرفلك كمان مين اللى فتحها ومسح
الصور اللى فيها .
هلال : الله ينور عليك ، هستنا منك تبشرنى يا ماجد .
ماجد : ماتقلقش يا برنس .
هلال مكنش في ايده حاجه يعملها غير الانتظار ، فضل قاعد في الشقه
بتعته يومين كملين ، كل اللى بيعمله انه مستنى ماجد يجى يعرفه لاى حاجه وصلها
جديده .
بعد يومين جه ماجد اخير لشقه هلال : ولما قعد مع هلال سعتها هلال قاله
: وصلت لحاجه ؟
ماجد : عيب عليك يا برنس ، اكيد طبعا وصلت لحاجات كتير ، منا مدام جيت
يبقى جيلك بالاخبار كلها .
هلال : وصلت لايه ؟ عرفت مين صحبه الصوره ؟ عرفت عنونها ؟
ماجد : انا وزعت صوره البنت دى على حبايبنا زى ما قولتلك ، وخلت الهكر
يشتغل على الصفحات بتاعت شريف ، بالنسبه للهكر قدر يدخل الصفحات ويرجع الصور ويعرف
مين اللى بيفتح الصفاحات دى وده وصلنا لنفس النتيجه اللى عرفناها من الناس اللى دوروا
على صحبه الصوره هى نفسها اللى بتفتح الصفحات .
هلال : مين هي ؟
ماجد : اسمها روداينا ناصف ، ابوها يبقى مدير مصنع من مصانع راجل
الاعمال المشهور علام صاحب مصانع الادويه .
كانت متجوزه عرفى من غير علم ابوها ب ابن علام اسمه سيف ، واللى
وصلناله انها عمله علاقه مع شريف ابن المستشار ، وان سيف وشريف اتخانقوا خناقه
كبيره في الملهى الليلى في ليله الحادثه وشريف ضرب سيف وخد روداينا وخرج بيها من
الملهى وعرفنا ان سيف طلع وراهم زى المجنون .
هلال : يعنى اللى شفته بيقتل شريف يبقى سيف ده .
ماجد : في كمان حاجه عرفناها هى غريبه اوى .
هلال : ايه الحاجه دى ؟
ماجد : فاكر لما سألت عن سمر بنت المستشار ؟
هلال : اه فاكر مالها ؟
ماجد : انا قولتلك ان سمر كانت مخطوبه ولما عرفت ان خطبها على علاقه
بوحده وسبته ، اهو خطبها ده يبقى اللى اسمه سيف ابن رجل الاعمال علام .
الى هنا يكون نهايه حديثنا اليوم
ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم
وتعليقاتكم .
لو اى حد حابب ينشر الروايه بصفحته او باى جروب يتفضل ، بس فضلا
انسبهالى لانها مجهودى .
اترككم فى رعايه الله
yasser oda