الشغاله الجديده ( الجزء الثالث )

الشغاله الجديده ( الجزء الثالث )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا فى الجزء السابق لما ملك طردت نسرين ومرتضى معرفش يعمل مع ملك حاجه غير انه يسيب البيت ويمشى .

مرتضى خرج من البيت وهو زهقان ومخنوق ، مكنش عارف هيروح على فين ، حتى مخدش معاه عربيته مشى على رجليه فى القريه اللى فيها البيت .

مرتضى فضل يلف على رجليه فى القريه من غير هدف ، لغايه لما تعب فقعد على بسطه قدام بيت من بيوت القريه ، وبعد كام دقيقه لقى راجل كبير من اهل القريه قعد جنبه وقاله : السلام عليكم .

مرتضى : عليكم السلام .

فقال الراجل : انا عمك ناصر ، انت غريب عن البلد يا ....

مرتضى : اسمى مرتضى ، وايوه غريب على البلد .

ناصر : منا عرفت على طول ، اصل اهل البلد هنا كنا نعرف بعض ، وخصوصا انا بقى اعرف الكبير والصغير ، حتى العيال الصغيره اعرفهم ولاد مين كمان .

مرتضى فهم ان عم ناصر ده رغاى وبيحب الكلام الكتير ، فاول حاجه فكر فيها انه يحاول يخلع منه بسرعه .

ولسه مرتضى هيقوم عم ناصر مدلوش فرصه ، عرفين زى ما يكون عم ناصر ده ما صدق ان لقى حد غريب يتكلم معاه ، فضل عم ناصر يتكلم قرابه نص ساعه بدون فواصل ، ولا حتى بدون فاصل اعلانى ، بيتكلم مع مرتضى عن ناس هو ميعرفهمش ويحكى عن جيرانه شويه ويشتمهم ، ويحكى عن نفسه كتير اوى ويشكر في نفسه ، كل ده ومرتضى بيسمع غصب عنه ، عم ناصر مدلوش فرصه يمشى من جنبه .

فى وسط الكلام عم ناصر قال ل مرتضى : انت تعرف البيت الكبير اللى على اول البلد ، اللى كان مهجور وواحد اشتراه .

مرتضى سعتها عرف انه بيتكلم على بيته فقاله : اه ماله ؟

عم ناصر : البيت ده حكايته حكايه ، ناس كتير يعرفو انه كان مهجور ، بس مش كلهم يعرفو حكايه البيت .

مرتضى : وانت تعرف حكيته طبعا ؟

عم ناصر : طبعا ، شكلك عاوز تعرفها احكيلك .

بص يا سيدى وما سيدك الا انا ، البيت ده كان بتاع راجل مبسوط ، كان عايش فيه هو ومراته ، كان راجل مقتدر بس مكنش بيخلف ، وجاب بنت صغيره كده تساعد مراته فى شغل البيت ، قعد الراجل ده مع مراته سنين ومفيش خلفه ، قوم اراده ربنا تحصل ان مراته تبقى حامل ، وسعتها حاله اتبدل ، كان فى الاول سخى وايدى فرطه وكريم اوى ، بس بعد لما خلف بقى بخيل اوى ، بقى بيموت على القرش .

بعد فتره حصلت حاجه غريبه فى البلد صبحنا الصبح ملقناش الراجل ومراته ، ساب البلد ومشى ، وبعد كده عرفنا انه كان واخد فلوس كتير من اهل البلد كل واحد واخد منه مبلغ كبير بحجه انه بيشغلهملهم وهيديهم ارباح كل شهر ، ده حتى البيت بتاعه باعه قبل ما يمشى واللى اشتراه مقعدش فيه وسافر كام سنه .

كل ده ومحدش خد باله ان الراجل كان سايب فى البيت البت الخدامه وكانت محبوسه فى اوضه ومعرفتش تخرج منها ، ناس قالت ان حبسها علشان خاف تفضحهم وهو بيهرب مع مراته وابنه .

مرتضى : والخدام هديه راحت فين ؟

عم ناصر : محدش يعرف لغايه دلوقتى ، بس البيت من سعتها كان مقفول وفى ناس قالت كلام كتير انهم بيسمعو صوت حد بينادى من جوه البيت كل يوم وكل الناس قالت ان البيت ده مسكون .

وكان البيت مقفول لغايه لما اشتراه واحد من كام يوم من صحاب البيت .

مرتضى ابتسم لما سمع الكلام ده لانه كان متأكد ان كل الكلام ده مجرد خرافات ، هو كان عايش فى البيت بقاله كام يوم ومشفش حاجه غريبه .

مرتضى اخير قدر يمشى ويسيب عم ناصر ، وكان مروح لبيته بس سمع صوت تليفونه ، فطلعه من جيبه وكان المتصل عم فوزى .

اجاب مرتضى على الاتصال : ايوه يا عم فوزى ، انت كنت فين ، اتصلت عليك اكتر من مره بس مرديتش عليا ليه ؟

عم فوزى : ايوه يا مرتضى بيه ، معلش اصل انا حصلى حادثه .

مرتضى : حدثه ايه ؟

عم فوزى : اليوم اللى اتفقت معاك فيه انى اروح البت ومعايا البت الشغاله ، العربيه الاجره عملت حادثه واتقلبت بينا ، ولولا ستر ربنا كنا قابلنا وجه كريم .

مرتضى : الف سلامه عليك ، طيب هى ملك مقلتليش ليه ؟

عم فوزى : ملك مين يا مرتضى بيه ؟

مرتضى : ملك الشغاله .

عم فوزى : البت الشغاله اللى جيبها نايمه ومتجبس اديها ورجليها يا مرتضى بيه ، دى حتى اسمها نعمات .

اتصدم مرتضى لما سمع كلام عم فوزى ، كل حاجه جواه اتلغبطت ، لو عم فوزى والشغاله مجوش اصلا للبيت ، اومال مين ملك اللى قعده فى البيت ديه .

بعد ما خلص مرتضى كلامه مع عم فوزى راح للبيت بسرعه علشان يفهم ايه اللى حصل ، وكل اللى قادر يفكر فيه انه يربط كلام عم فوزى بكلام عم ناصر عن البيت بتاعه المسكون زى ما عم ناصر قاله قبل كده .

مكن شده بس اللى منتظر مرتضى ، كانت فى مشكله اكبر ، او ممكن نقول انها مصيبه اكبر .

مرتضى زى ما قولتلكم قبل كده كان ليه علاقات كتير بدول كتير ، كان من ضمن علقاته معرفته باميره من بلد عربى ، وللاسف كانت متجوزه وعرف جوزها بعلاقتها مع مرتضى ، وفضل مده طويله يدور على مكانه ، واخير وصل لمكانه ولعنوان بيته ، وسعتها بعت مجموعه علشان يقتلوه .

وفى الوقت اللى كان مرتضى رايح فيه للبيت بتاعه ، كان المجموعه ديه رايحه للعنوان اللى عرفوه .

وصل مرتضى للبيت ، كان على اخره من كل حاجه ، فضل يدور على ملك وينادى عليها بصوت عالى وزعيق ، فلقاها وقفه وراه وبتقوله : مالك عمال تجعر ليه ، هى الدنيا اتهدت ؟

مرتضى : انا استحملتك كتير اوى ، تصرفاتك غلط واسلوبك زفت واقول لنفسى يا عم فوت دى بنت غلبانه ، واكراما لعم فوزى كنت بفوتلك ، بس دلوقتى عرفت انك مش تبع عمى فوزى ، انتى مين يا بت انتى ؟

ملك : اولا متزعقش ، انا مش الجاريه اللى جبتهالك المحروسه امك ، تانى حاجه انا مقولتلكش ان تبع عمك قرد ده اللى بتقول عليه ، انت اللى افترضت الكلام وصدقته وانا سبتك علشان بحب اشترى دماغى ، ثالث حاجه بقى والاهم ، هتطاول عليا هتطاول على اللى خلفوك ، انت فاهم ولا افهمك .

مرتضى : انتى انس ولا عفريته ؟

ابتسمت ملك وقالتله : يفرق معاك يعنى ؟

مرتضى : طبعا يفرق ، انا مينفعش يعيش معايا عفاريت ، لو انتى عفريته يبقى اخرجى من بيتى احسلك .

لما ملك سمعت كلام مرتضى اللى قاله بعصبيه سعتها زى ما يكون هتتحول ، شعرها الجميل المتسرح فجأه بقى منكوش وعيونها احمرت وصوتها بقى غليظ وطخين وقالت بصوت عالى رج المكان : ده بيتى اناااااااااااااااااااااااا.

سعتها بس اترعب مرتضى ، ملك شافت فى عيونه وتصرفاته الرعب ، والمكان اللى كانت وقفه فيه كان متعلق على الحيطه مرايه كبيره ، سعتها بصت ملك لنفسها لقت نفسها شكلها فعلا يخوف ، هي عمرها ما كانت متخيله انها هتتحول للشكل المرعب ده ، سعتها هديت ملك ورجعت لطبيعتها ولاول مره تتكلم بهدوء وبأدب وقالت : انا اسفه انى خوفتك ، انت عندك حق ده بيتك وانا لازم امشى منه ، وفجأه اختفت ملك من قدام عيون مرتضى .

 الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda