الهالكـــــون 2 ( الجزء الاول )

 الهالكـــــون 2 ( الجزء الاول )

جميع احداث هذه الروايه من وحى خيال المؤلف ولا صله لها بالواقع .

كلنا عرفنا فى اواخر الجزء الاول من روايه الهالكون ان نوح لسه عايش وممتش ، وقبل ما نبداء احداث الجزء التانى لازم نوضح ازاى نوح لسه عايش .

كلنا عرفين ان نوح كان مترحل من السجن الاحتياطى للمحكمه ، بس موصلش المحكمه ووصل خبر موته نتيجه حادث حصل .

التحقيقات انتهت واتقفلت القضيه على انها حادث بس الحقيقه كانت حاجه مختلفه .

نوح كان فى عربيه الشرطه وفى وسط الطريق ظهر شخص غريب ملثم راكب على دراجه ناريه ، كان معاه مسدس ، وقرب من عربيه الشرطه اللى فيها نوح ووجه مسدسه نحيه كاوتش السياره وضربه بالنار .

كان طبيعى سعتها ان العربيه تنقلب بسبب السرعه اللى ماشيه بيها وانقلبت السياره اكتر من مره ، ولسوء الحظ ان الطريق كان على منحدر علشان كده اتعلقت السياره على حافه المنحدر فى احر الامر .

نتيجه قلبان السياره حدث كسر فى تانك السياره ، واتسرب البنزين من العربيه ، وكان فى شرارات خرجه من العربيه ، ولو وصلت اى شراره للبنزين اللى كان بيتسرب سعتها العربيه هتنفجر .

اما نوح وباقى قوه شرطه الحراسه اللى كانو فى العربيه اتعرضوا لعده خبطات كتير وكلهم اغمى عليهم وفى حاله خطر ، اما نوح فكان فى حاله بين الاغماء والافاقه ، كان حاسس بدوغه شديده ومش قادر يشوف بشكل سليم ، وحركته صعبه جدا ، بس فى وسط ده نوح شاف شخص ملثم بيقرب من العربيه ، طبعا نوح مكنش يعرف سبب انقلاب العربيه ، ومكنش يعرف ان الملثم ده هو السبب ، وانه جاى يخلص عليه قبل ما يوصل للمحكمه .

قرب الشخص الملثم من العربيه ، وبص على نوح لقاه بيتحرك فعرف انه لسه عايش ، سعتها اتفحص الملثم العربيه وعرف انها بتسرب بنزين ، وسعتها قرر يفجر العربيه ويضرب رصاصه فى تنك العربيه اللى فيه تسريب وسعتها العربيه هتنفجر طبعا وكل اللى فيها هيولع .

رجع الملثم كام خطوه للخلف علشان الانفجار ميوصلهوش ، ووجه مسدسه نحيه تانك العربيه ، وصبعه على زيناد مسدسه ، وسعتها سمع نوح صوت الرصاص ، نوح افتكر ان العربيه هتنفجر بس ده محصلش ، وبص نحيه الملثم اللى واقف بعد مسافه لقاه وقع على الارض ، سعتها عرف ان الرصاصه اللى انضربت مكنتش من الملثم ، كانت من حد تانى وقتل بيها الملثم .

فى الاول نوح افتكر ان حد من الشرطه اللى عمل كده بس هو مقدرش يصمد اكتر من كده علشان يعرف ايه اللى حصل ، اخيرا اغمى على نوح من الحبطات اللى خدها والعربيه بتتقلب .

بعد يومين فاق نوح ولقى نفسه فى مكان غريب ، مكنتش زنزانه فى سجن مثلا ، لا ده كان نايم على سرير مريح ، ومش سرير فى مستشفى حتى ، لا سرير فى اوضه فى بيت .

قام نوح وكان جسمه فيه كدمات نتيجه انقلاب العربيه ، بس اتحامل نوح على نفسه وقام ، وكان باب الاوضه مقفول ففتحه وخرج منه .

نوح بص لقى فى شخص جيله ، هى كانت وحده ولما شفها نوح عرفها ، هى حد قبلها قبل كده ، كانت الدكتوره ليلى ، دكتوره الطب الشرعى واول وحده قدرت تكلمه عن عقار او زهره السراب اللى بعدها عرف منظمه الهالكون .

نوح اتفاجيء لما شاف ليلى قدامه وكان سعتها لازم يسألها : انا فين وايه جبنى هنا ؟

ليلى : لازم ترتاح يا نوح ، انت لسه مرتحتش من الصدمات اللى حصلتلك .

نوح : انا فين بالظبط ؟

سعتها صوت جوبه على سؤاله وقاله : انت فى مكان امان متخفش .

وسعتها ظهر شخص ووقف قدامه وقاله : انت هنا فى بيت متأمن كويس ومحدش هيوصلك فيه .

نوح بصله بس مكنش يعرفه وسأله : انت مين ؟

فرد عليه وقاله : اسمى يونس المهدى .

نوح حاول يركز فى الاسم وقال : انا زى ما يكون سمعت الاسم ده قبل كده .

ابتسم يونس وقاله : عوزك تركز اكتر وقولى سمعت الاسم ده فين ؟

نوح حاول يفتكر سمع الاسم ده فين وفى الاخر افتكر ، نوح شاف الاسم ده فى مقاله الصحفى مروان قدرى لما كان بيتكلم عن الهالكون وذكر اسم يونس فى المقال بتاعه .

نوح : انت يونس المهدى اللى قتل عيلته بسبب عقار السراب صح ظ؟

ابتسم يونس وقاله : ايوه انا ، كنت ضابط شرطه ذيك بالضبط ، احنا ممكن نقول ان قصتك نسخه طبق الاصل من قصتى ، وعدوى وعدوك واحد هما المسئولين عن قتل عيلتنا يا نوح ، وعلشان كده كان لازم انقذك ، انا محتجلك يا نوح ، انت وانا هنقدر ننتقم من الهالكون .

نوح : انا عاوز افهم ايه اللى حصل فى الاول ، وازاى انا هنا ، وايه علقتك بالدكتوره ليلى ؟

يونس : طيب اقعد وهحكيلك كل حاجه .

قعد نوح مع يونس وليلى ، وابتدى يونس يجاوب على اسأله نوح وقال : علشان تفهم ايه اللى حصل معاك وازاى بقيت هنا لازم تعرف الحكايه من الاول ، من ساعت ما كنت انا فى الخدمه ، اسمع يا نوح ، زى ما قولتلك حكيتك زى حكايتى بالظبط تقريبا نسخه كربونيه ، انا كنت ضابط ، ولسوء حظى حصلت جرائم وكنت بحقق فيها والجرائم دى هى اللى عرفتنى ان فى منظمه اسمها الهالكون بتتحكم فى مصير العالم كله ، كنت بتتبع الادله فى الجرائم وكل شويه اكتشف حاجه عن المنظمه ديه ، بس اكبر غلطه عملتها انى وقفت قدمهم وقررت افضحهم ، بس بمجرد انهم عرفو اللى انا عاوز اعمله سعتها كان لازم يتخلصو منى باسرع وقت .

فجأه لقيت نفسى بقتل مراتى واولادى من غير ما اعرف ازاى عملت كده ، طبعا كان بسبب زهره السراب ، وكان تفكيرى انى افضحهم فى المحكمه ، زى ما انت فكرت بالظبط بس سعتها قرارهم انهم يتخلصو منى ، وفعلا دبرو حدثه اموت فيها واتنقلت للمستشفى وهناك ليلى اتكفلت بالموضوع ، صحيح نسيت اعرفك ليلى تبقى بنت اختى ، انا اللى مربيها ، وهى اللى قدرت تتلاعب فى تقرير الطب الشرعى وتثبت انى مت ، زى ما عملت معاك انت كمان يا نوح ، هى اتلعبت بتقارير الطب الشرعى واثبتت ان القاتل الملثم اللى حاول يقتلك هو انت يا نوح ، وساعدها على كده ان كل الجثث كانت متفحمه ، يعنى انت دلوقتى فى نظر الحكومه ميت .

بص نوح ل ليلى وقالها : يعنى لقائى بيكى فى مكتبى مكنش صدفه ؟

ليلى : لا يا نوح مكنش صدفه ، لما عرفت ان طارق بيدور على دكتور بصفات معينه فى الطب الشرعى سعتها ظهرت قدامه وخلته يقابلنى بيك ، طبعا هو مكنش يعرف اى حاجه عنى ، بس كان سهل اقنعه انى العبقريه اللى انت بتدور عليها .

نوح : وانتى اللى وصلتيلى فكره السراب .

يونس : كان لازم توجهك للطريق الصحيح .

نوح : هما عرفو ازاى للى انا وصلتله ؟

يونس : سؤال مايطلعش من ضابط زكى ذيك يا نوح ، الهالكون ليهم ناس فى كل مكان ، كل قطاع عام او خاص او حكومى ليهم ناس وخصوصا فى الاماكن السياديه زى الدخليه مثلا .

وبخصوص الموضوع ده حابب اقولك ان اللواء ممدوح اسعد مات .

نوح وهو متفاجيء : مات ، امتى حصل الكلام ده ؟

يونس : من كام ساعه ، ودى حاجه كانت متوقعه ، لانه كرت واتحرق ، وطبعا الموت كان بطريقه طبيعيه ومفيش اى شبه جنائيه .

نوح : يعنى اللواء ممدوح كان معاهم ؟

يونس : طبعا كان معاهم ، واحد من اللى مجندنهم لشغلهم ، مكانه مهم جدا ليهم .

نوح : طيب انت تعرف الناس اللى هم مجندنهم ؟

يونس : دلوقتى لاء كنت اعرف اللواء ممدوح والدكتور كمال اللى كان بيعلجك فكره طبعا .

نوح : يا خساره كان ممكن نستفاد منهم بمعلومات عن الهالكون .

يونس : مكنش فى حد فيهم عنده حاجه تفدنا ، كل اللى شغلين مع الهالكون مجرد تابعين بيخدو تعليمات وميعرفوش مين اللى بيدهلهم واللى فيهم بيفكر يسأل بس بيبقا مصيره القتل .

نوح : انت تعرف ايه عن المنظمه ديه ؟

يونس : دى منظمه كبيره ومتأسسه من بعد الحرب العالميه التانيه ، وهما اللى بيسيطروا على مجريات الاحداث فى العالم كله ، واعضاء المنظمه ديه خمس اعضاء ، كل واحد فيهم مسئول عن مجموعه كبيره من الدول واللى بيحصل فيها ، واللى مسئول عن موت عيلتك وعلتى هو اللى متحكم فى الشرق الاوسط والدول العربيه وقاره افرقيا كلها ، وده اللى تارنا معاه ولازم نخده يا نوح .

نوح : انت تعرفه ؟

يونس : لا لسه معرفهوش ، بس اكيد هنوصله قريب .

المهم دلوقتى لازم تعرف ان كل واحد ارتبط بالقضيه بتعتك هيتخلصو منه زى ما اتخلصو من اللواء ممدوح واكيد الدور دلوقتى على طارق صحبك .

نوح : عندك حق ، انا لازم الحقه باى شكل ، طارق مش بس صحبى ده زى اخويا الصغير .

بعد كده كلنا عرفين اللى حصل من احداث الجزء الاول وازاى نوح نقذ طارق من القتل وابتدى مشواره مع يونس للانتقام من منظمه الهالكون ، نوح كان عارف ان الموضوع مش سهل ، بس الاحداث اللى حصلت بعد كده هتقلب كل الموازين مره تانيه ويدخل نوح فى متاهه جديده .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda