الشغاله الجديده ( الجزء الثانى )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا فى الجزء السابق لما اتصدم مرتضى من كلام ملك المستفز عليه ، بس فى الاخر كان مضطر انه يتقبل وجودها .

اسلوب ملك كان فظيع جدا بالنسبله لشغاله ، بس رغم ده كله مرتضى كان قابل ومستحمل ، خلال اليومين اللى فاتو مرتضى لاحظ ان البيت نضيف اوى اوى ، تقريبا مكنش بيشوف ذره تراب وحده رغم انهم سكنين فى الارياف ، وكمان الاكل كان فوق الممتاز ، وكل حاجه فى البيت منظمه جدا ، والهدوء اللى كان مرتضى عيشه وده اهم ميزه مرتضى لحظها لان الرسام ديما بيعشق الهدوء .

كل المميزات اللى قولنها مرتضى حسها وعلشان كده تقبل انه يخلى ملك وميحولش يتخلص منها ، بس هو عرف مميزتها وعرف عيب واحد بس فيها وهو لسانها الطويل بس اللى معرفهوش عنها كان كتير وهيظهر بعدين .

ومن اهم عيوب ملك انها كانت كل يوم بتصحى مرتضى الصبح بدرى حوالى الساعه 7 صباحا لازم تصحيه ، ومكنتش بتقبل منه اى اعذار ، لدرجه انه كان بيتحايل عليها علشان تسيبه ينام بس بردو مكنتش بتوافق وتفضل تزعجه لغايه لما يصحى ، محدش فاهم هى ليه بتصمم تصحيه بدرى ، والموضوع ده كان مرهق ل مرتضى خصوصا انه كل يوم بينام متأخر .

فى يوم صحى مرتضى قبل ما تصحيه ملك ، وكمان لبس هدومه علشان يخرج ولما سألته سبب النشاط ده والحيويه قالها ان جيله ضيف ورايح يستقبله وطلب منها انها تحضر اكل يليق بالضيف ، وفهمها ان الضيف ده مهم اوى اوى .

بعد كام ساعه رجع مرتضى للبيت ، كان معاه وحده اسمها نسرين .

مرتضى كان يعرف نسرين من فتره ، هى بنت مصريه كل هوايتها انها تلف بلاد العالم وكانت بتحب تتفرج على لوحات رسم الرسامين ، وفى معرض كان معروض فى احدى الدول الاوربيه اتعرفت على مرتضى ، وعلشان هى جميله الى حد كبير مرتضى مكدبش خبر ووثق علقته بيها واتحولت العلاقه الى قصه حب ، بس كان من طرف واحد ، مرتضى مكنش مهتم بالحب والكلام ده ، هو شايف البنات زى الزهور يشمها شويه وبعدين يشم غيرها ، لانه ميقدرش يفضل مع زهره وحده طول الوقت ، وعلشان كان معاه فلوس كتير فكان بيصرف على اى وحده يعرفها ببزغ ، وعلشان اسلوبه فى الكلام حلو وجذاب فكان سهل عليه يوقع اى بنت ، وعلاقته مع نسرين زى علقته باى بنت تانيه هى بتحبه وهو بس مستلطفها ، حب من طرف واحد زى ما قولنا .

اول لما شافت ملك اللى اسمها نسرين مرتحتش نهائى ، بس مكنتش تعرف هى تقرب ايه ل مرتضى يمكن اخته او بنت عمه او عميله معاه ، فى مساميات كتير ، ونسرين كانت لسه جاى من السفر هتقضى اسبوع فى مصر واصر مرتضى انها تقعد عنده فى البيت فكانت نسرين جايه بيت مرتضى بشنطه سفرها وده خلى ملك تشك فيها ومكنتش مرتحلها .

ملك كانت محضره الاكل ، وقعدت نسرين تاكل هى ومرتضى وطبعا الاكل عجبها جدا ، كانت مبهوره بطعمه بصراحه ، وكل ده وملك وقفه بعيد تبص عليهم ، مكنتش مرتاحه للموضوع ، واللى خلها هتجنن طريقه المعامله اللى بين نسرين ومرتضى ، علشان اوصفلكم الطريقه ممكن نقول زى ما قالت ملك ان نسرين مسهوكه زياده عن اللزوم .

ملك فضلت مراقبه مرتضى ونسرين وتصرفاتهم لغايه لما سمعت من مرتضى كلام قاله لنسرين فهمت سعتها ملك طبيعه العلاقه اللى بنهم ، ولما مرتضى طلع اوضه علشان ياخد دوش يستحمى سعتها ملك اتصرفت بسرعه قبل ما يرجع ، وكان تصرفها مجنون .

ملك من غير مقدمات ومن غير حتى ما تتكلم راحت لنسرين اللى كانت قاعده مستنيه مرتضى فى الدور الارضى وراحت ملك مسكت نسرين من شعرها بايديها والايد التانيه مسكت شنطه السفر وسحبت الاتنين فى ايديها ، نسرين كانت مسحوله فى ايد ملك ومش فاهمه هى بتعمل كده فيها ليه ، وفضلت تصرخ من الوجع وتنادى على مرتضى بس ولا حياة لمن تنادى مرتضى تحت الدوش مستجم بالمايه وبيغنى كمان ولا سمع حاجه .

نسرين يا عينى بقى خدت علقه انما ايه من اللى قلبك يحبها ، نص شعرها طلع فى ايد ملك المفتريه ، بصراحب البت كانت زى العسل ماتستهلش كل اللى حصلها ، ما علينا خلينا فى المهم ، نسرين مكنتش تقدر تعمل حاجه غير انها تنفد بجلدها من ملك المفتريه ، وطلبت عربيه وخدتها ومشيت ، مش بس هتروح مكان تانى ، دى قررت انها تسافر بره البلد كلها ، صعبان عليا يا مرتضى يا ابنى لما تخلص الدوش بتاعك وتسأل على نسرين .

ملك بعد ما عملت اللى عملته قعدت زى الهانم قدام التليفزيون تتفرج زى الحمل الوديع .

خلص مرتضى الدوش بتاعه وخرج حبيب عين امه من الحمام ونزل يقعد مع نسرين بس ملقاش نسرين ، فكان طبيعى يسأل ملك ويقولها : نسرين فين ؟

ملك : مين نسرين ديه ؟

مرتضى : الضيفه اللى جت معايا .

ملك بكل براءه واستعباط : هو انت كنت معاك ضيفه ؟

مرتضى : نعم يا روح خلتك ؟

ملك وهى رفعه حاجب ومنزله حاجب : خلتى دى لو شافتك وانت داخل بوحده غريبه البيت كانت شبشبتك يا ننوس عين امك .

مرتضى : ايه شبشبتك دى ؟

ملك : ايه متعرفش الشبشب ، متضربتش بيه وانت صغير .

مرتضى : انتى عملتى ايه فى نسرين ؟ وديتيها فين ؟

ملك : وغلوتك عندى معرفش هى فين ، واكيد مش هشلها معايا فى البوك .

مرتضى بعصبيه : انتى مستفزه على فكره .

راح مرتضى مسك تليفونه واتصل على نسرين ، اول مره نسرين مرضتش عليه ، يا عينى مفحومه من العياط .

طبعا مرتضى محلهاش ، فضل يتصل اكتر من مره لغايه لما نسرين اخيرا رضت عليه .

يدوب مرتضى بيقول : الو .

وسمع كلام مش مفهوم ، البت متشحتفه من كتر السحل اللى حصلها ، معظم كلمها عياط ومش مفهوم ، وكل اللى فهمه مرتضى منها انها مش عوزه تشوف خلقته تانى وهى غلطانه انها حبه واحد زيه ، وقفلت تليفونها وحطت رقمه فى الحظر .

اقولكم يا جماعه ، مرتضى صعبان عليا ، البت ملك بوظلته يومين حلوين مع نسرين .

سعتها كان لازم مرتضى يعمل رد فعل مع ملك يكون على قد غلطها ، الموضوع مش لازم يعدى بالساهل كده ، دى نسرين يا جدعان ، مهو لو هو مش هيتصرف انا مش هسكت ، مهو بروح اهله مش يفضل عامل فيها زى البطه البلدى كده ، انا ممكن اخرجه من الروايه كلها ، ولا انتم رأيكم ايه .

يوووه يلا نرجع لموضوعنا ، مرتضى كان متعصب على ملك ، زعيق وشخت ونتر وتجعير وكل الكلام اللى ممكن تتخيله ، ده كله طبيعى وعادى ، لاء يا جماعه اقل من العادى كمان ، انا لو مكانه كنت علقت ملك على باب البيت ، بس نقول ايه الله يرحمك يا رجوله .

يووووووه بطلو تخرجوا عن الموضوع ، الغريب بقى فى الموضوع كله ان فى الوقت اللى مرتضى بيزعق وينادى ويوجع قلب امه والست ملك ولا هيا هنا ، سيبه الراجل يحاتى وينادى وهى مسكت علبه زبادى وعماله تشد وتاكل الزبادى .

مرضى مخيبش ظنى فيه ، فعلا طلع بطه بلدى ، معرفش ياخد مع ملك حق ولا باطل ، يا عين امه حسن ان السكر والضغط هيجيله ، فمكنش قدامه تصرف غير انه يسيب البيت فى الوقت الحالى ويمشى ، خرج مرتضى يلف فى القريه اللى مكنش يعرف فيها حد اصلا ، ماشى يا ولداه تايه يتحصر على نسرين ، هى الدنيا كده لما بتدى ضهرها لحد بتسويه ضرب على قفاه ، انا بقول حكم يا جدعان .

 الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda