البخيل ( الجزء الاول )
 |
البخيل ( الجزء الاول ) |
قصتنا النهارده حاجه مختلفة ، نوع جديد من القصص محولتش اكتب عنه قبل كده ، وعلشان
تفهموا انا اقصد ايه ، لازم اعرفكم الاول بابطال القصه ، ولا اقولكم هخلي كل واحد
من ابطال القصه يتكلم عن نفسه ، علشان مبقاش ظلمت حد فيهم .
الاول معانا الاب ، الاستاذ حريص : اتفضل يا استاذ حريص اتكلم عن نفسك
.
حريص : انا حريص ، اسمى حريص ، وفى كل حاجه في حياتى بعملها بحرص اوى
، انا شايف نفسى راجل طيب ، محترم ، على خلق ، يعنى تقدر تقول ......
( المؤلف ) فقاطعته انا عن الكلام وقولتله : يا عم حريص اخلص ، هتكتب
قصايد فى نفسك ، متقفلنيش من نحيتك من اول القصه بدل ما اموتك فى الاول الاحداث
واخلص منك .
حريص : خلاص يا استاذ ياسر ، متخليش خلقك ديق كدا ، احترم سنى حتى .
مؤلف : حاضر ، اتفضل كمل وبطل تضيع وقت .
حريص : تمام يا استاذنا ، زى ما قولتلك ، انا معملتش حاجه وحشه فى
حياتى ، علشان كدا ربنا كرمنى اخر كرم ، انا كنت من اسره فقيره شويه ، هو بصراحه
فقيره شويتين تلاته ، من الاخر اسره معدومه ، تسمع عن المثل اللى بيقول محدش بينام
من غير عشا ، متصدقش الكلام دا ، احنا اصلا مكناش نعرف يعنى ايه عشا ، ابويا طفش
من امى وسبها لما مقدرش يصرف عليها وعليا ، وانا كنت بسرح فى اشاراة المرور بمنادل
علشان اصرف على نفسى وعلى امى ، ولما امى ماتت صممت اكمل تعليمى وصرفت على نفسى
لغايه ما اتخرجت ، وانا عندى 25 سنه اتجوزت وحده ، كانت اكبر منى بكام سنه ، وماتت
وهى بتولد بنتى ، ومراتى كانت يعنى غنيه شويه ، وانا حفظت على فلوسها وكبرت الثروه
بتعتها .
مؤلف : تمام يا عم حريص ، بعد اذنك اركن على جنب ، لانى بصراحه
مرتحتلكش ، ونشوف بنتك هتقول ايه ، اتفضل يا انسه اتكلمى .
انا رودى ، بس اسمى الحقيقى راضية ، وعلشان الاسم قديم شويه سميت نفسى
رودى ، عندى 25 سنه ، متخرجه من كليه تجاره ، انا شخصيه بحب الحياه ، وبحب يكون
معايا فلوس مستقله ليا ، وعلشان نبقى بنتكلم بصدق ، عوزاك يا استاذ ياسر تنسى كل
الكلام اللى قاله بابا ، ايوه انساه ، دا انا الدمعه كانت هتنزل من عينه وانا
سمعاه بيتكلم ، تصدق بالله كنت هصدقه .
مؤلف : هو بيكدب ؟
رودى : لا بيكدب ايه ، دا الكدب اتعمل علشان بابا ، عاوز تعرف بابا
على حق ، اسئلنى انا وهجوبك .
حريص : يعنى فى حد بيتكلم كدا على ابوه ، اخص عليكى ، شكلى معرفتش
اربيكى .
رودى : بلاش الدور دا يا بابا ، لازم الاستاذ ياسر يعرف كل حاجه .
مؤلف : اتكلمى يا راضيه .
رودى : اسمى رودى ، وبلاش راضيه دى علشان مطولش لسانى .
مؤلف : من الواضح كد ان البنت وابوها شبه بعض ، ما علينا اتفضلى يا
رودى اتكلمى .
رودى : بابا اتجوز ماما زى ما قال هى كانت اكبر منه ، بس هو موضحش
اكبر منه بكام سنه ، كانت اكبر منه بعشرين سنه ، هو كان عنده 25 وهى كانت 45 سنه ،
وطبعا اتجوزها مش علشان بيحبها ، لا علشان هى غنيه وعندها عمارات وفلوس كتير .
المهم ماما كانت ست كبيره وطبعا موضوع الخلفه دا مكنش المفروض يفكروا
فيه ، بس بابا اقنعها ان هو نفسه يبقى عنده طفل منها علشان يفضلوا مرتبطين مع بعض
طول العمر ، طبعا هو مكنش يقصد كدا ، هو لما عرف ان الخلفه خطر على حيتها اقنعها
تخلف علشان يخلص منها وياخد كل حاجه .
مؤلف : وانتى عرفتى كل دا ازاى ؟
حريص : ايوه الله ينور عليك يا استاذ ياسر ، السؤال دا بصراحه عجبنى ،
افحمتها ، على شان تعرفى بس ان الكدب ملوش رجلين ، جوبى يا ام نص لسان على الاستاذ
؟
رودى : اهدى يا بابا ، اهدى يا حبيبى انت عندك السكر والضغط ، اهدى
وبطل تطبله ، هو مش هيديك فلوس زياده لما تقعد تمدح فيه كدا .
حريص : صحيح يا استاذ ياسر ، هو انا هاخد كام فى القصه دى ؟
مؤلف : ابقى حاسب المتابعين يا عم الحج ، انا هصرف كمان من جيبى ،
واركن بقى خلينا نكمل صدعتنى .
قولى يا رودى ، عرفتى منين ؟
رودى : ظلمنى انت يا استاذ ياسر ، بس انا هقولك ، ماما كانت بتحب تكتب
كل حاجه بتحصلها ، مذكراتها يعنى .
حريص : وانتى وصلك المذكرات دى ازاى ؟
رودى : صحيح منتا نسيت ، فاكر لما كان عندى عشر سنين ، وفى يوم عيد
ميلادى قولتلك فى هديتى ، روحت انتا مدينى مذكرات ماما علشان توفر حق الهديه ،
وقلت ان ماما كتبت هنا كل واصفات الطبيخ .
حريص : هى طلعت مذكراتها ؟
رودى : ماما مكنتش بتعرف تطبخ يا بابا ، هتعمل ملاحظات للطبيخ ازاى .
مؤلف : كملى يا رودى ، وانت يا عم حريص خلينا نسمع .
رودى : ماما ماتت فعلا ، بس من حظه ان الطفله عاشت اللى هو انا ،
وطبعا كانت صدمه ليه ، بس هو مابيغلبش ، وعمل حاجه مفيش اب فى الدنيا ممكن يعملها
فى بنته .
مؤلف : عملت ايه يا حريص ؟
حريص : لا بجد لا ، انا زعلان منك يا استاذ ، انت هتصدقها ، دى عيشه
فلم هندى وقديم كمان ، بتفترى عليا ، انت عارف قلبى غضبان عليها ، حد يعمل فى ابوه
كدا ، حد يقول على ابوه كدا ؟
مؤلف : تصدق انا غلطان انى سألتك ، قولى يا رودى عمل ايه ؟
رودى : بص يا مبدع ، طول عمرى عيشه فى حرمان ، تصدق كان بيحسب عليا كل
حاجه ، انا مكسوفه اقولك والله ، بابا الراجل الغنى المحترم دا عنده اجنده كاتب
فيها كل جنيه صرفه عليا من ساعت ما أتولدت لغايه النهارده .
فنظر المؤلف الى حريص وقال له : هو فى كدا ؟
حريص : بص يا استاذ الحق حبيب الله ، وان كنتم اخوات أتحسبوا .
مؤلف : بس هى مش اختك يا مفترى ، دى بنتك وواجب عليك تصرف عليها ، ولو
حتى من فلوس امها يا بخيل .
رودى : اصبر يا ياسو دا انا مأهوره .
مؤلف : هى وصلت لياسو ، اتلمى شويه مراتى هتقراء القصه .
رودى : حاضر يا سطا ، وسيبك من الشكليات دى خلينى اطلع اللى جوايا .
مؤلف : طلعى ياما طلعى .
رودى : انت عارف هو كتب كل حاجه اتصرفت عليا ليه ........ هعتربك قولت
ليه واقولك : هو يا سيدى كتب كل حاجه علشان لما اوصل لسن ال 21 واطالب بميراثى من
امى ، يطلعلى بالاجنده دى ويقولى خلاص ملكيش حاجه عندى وميراثك اتصرف عليكى .
مؤلف : هو انتى ميراثك من امك حوالى كام ؟
رودى : ميقلش عن خمسه مليون جنيه .
فنظر المؤلف الى حريص ، وجده وضع يداه على قلبه ، وكانه يتعرض لازمه
قلبيه ، فقال له : والله ما مصدقك ، انت واحد طبيعى وعادى زينا كدا ، ولا انت حجر
، وبعدين شيل ايدك من على قلبك ، هو انت عندك قلب اصلا علشان يوجعك ؟
حريص شال ايده من على قلبه وقال له : فى ايه يا ياسو ، دول 21 سنه ،
اكل وشرب وتعليم وعلاج ، تصدق انا صرفت عليها اكتر من الخمسه مليون اللى بتقول
عليها البت دى .
مؤلف : حتى انت بتقول يا ياسو .
رودى : يا بابا بطل كدب ، دا انت كنت بتجبلى طقم لبس واحد فى السنه ،
وبناكل وجبتين فى اليوم ، وكل ما اتعب هى الاسبرين اللى كنت بتجبهولى ، دا انا شفت
معاك المرار الطافح كله .
الى هنا يكون نهايه حديثنا اليوم
ولكن لم تنتهى قصتنا بعد ، ارجوا ان تنال اعجابكم ويسعدنا مشاهده تفاعلكم
وتعليقاتكم .
لو اى حد حابب ينشر القصه بصفحته او باى جروب يتفضل ، بس فضلا
انسبهالى لانها مجهودى .
اترككم فى رعايه الله
yasser oda