احـــــــــــــــــــــلام ( الجزء العاشر والاخير )

احـــــــــــــــــــــلام ( الجزء العاشر والاخير )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا قبل كده لما اتجوزت احلام ايمن وعاشت معاه ايام سعيده .

بعد جواز احلام بفتره حبت تاخد جوزها وتروح معاه عند ابوها الشيخ صالح ، وتحاول تراضيه يمكن يسامحها لما يشوفها قد ايه نجحه ومشهوره ، وكمان انها متجوزه من شخص ناجح ومتميز .

راحت احلام مع جوزها لقريتها ، واول لما دخلت القريه وشفوها الناس الدنيا اتلمت حوليها ، مهى اشهر ممثله دلوقتى ، وكان الناس نسيت مين هى احلام وانها بنت الشيخ صالح ، كل اللى فكرينه ان ممثله مشهوره زيها جت القريه المتواضعه بتاعتهم .

وصلت احلام بيت ابوها بصعوبه لان الناس محوطاها هى وجوزها والحرس بتوعهم ، ودخلت بيت ابوها ولما شافتها امها نسيت كل حاجه غلط عملتها احلام ، خدتها في حضنها وهى بتعيط مهو هو ده قلب الام ، وطبعا احلام حضنت اختها وبعديها سألت على ابوها ، وسعتها امها قالتلها : ان ابوها بمشوار وزمانه راجع .

لما قرب الشيخ صالح من بيته لاحظ حاجه غريبه ، في ناس كتير ملمومه عند بيته وقدام البيت ، طبعا الشيخ صالح قلق ، خاف ان يكون حصل حاجه لمراته او بنته الصغيره ، سعتها مشى الشيخ صالح بسرعه ووصل للبيت ، ولاحظ ان في عربيات غريبه وشكلها غالى اوى واتنين حراس وقفين قدام بيته بيمنعوا الناس من الدخول .

في الاول مفهمش الشيخ صالح حاجه من الموضوع ، وحاول يدخل البيت بس الحراس منعوه لغايه ما قالهم انه صاحب البيت سعتها فهموا انه اكيد ابو الممثله احلام وسبوه يدخل البيت .

لما دخل الشيخ صالح بيته فهم اللى بيحصل لما شاف احلام بنته ، اول لما شافها دخل في حاله غضب شديده ، ويدوب لسه احلام بتجرى عليه وعوزه تبوس ايده وقبل ما تتكلم وتقوله سامحنى ، كانت ايد الشيخ صالح سابقه احلام وضربها بالالم على وشها ، وهو في حاله غضب شديد مسك دراع احلام وفتح الباب وزقها وطردها من البيت وهو بيقولها : البيت ده طول عمره نضيف ، جيه بعد العمر ده كله تعوصينى وتعوصى بيتى ومراتى وبنتى الصغيره .

طبعا كل الناس كانت واقفه قدام بيت احلام وشافوا اللى حصل ، واحلام جريت ركبت العربيه ووراها جوزها ومشيت بعيد عن القريه .

دخل الشيخ صالح اوضته وهو في حاله زعل شديد ، قعد على كرسى وطفى كل الانوار وقعد يفتكر كل اللى حصله من ساعت ما هربت بنته احلام من البيت ، وعلشان نفهم هو ليه عمل كده لازم تعرفوا ايه اللى حصل مع الشيخ صالح بسبب احلام .

بعد ما هربت احلام والناس عرفت ، مكانه الشيخ صالح اتغيرت في القريه ، مبقاش حد بيقدره وبيحترمه زى الاول ، ورغم كده حاول يتعايش مع الوضع الجديد ، بس لما اتعرض فيلم سراب وبعديه اشتهرت احلام الوضع اتغير ، الشيخ صالح مبقاش بيخرج من بيته غير للضروره بس ، وده بسبب اللى كان بيسمعه طول الوقت ، لو ماشى في الشارع يلاقى شباب من القريه بيتكلمه عن الممثله احلام بشكل مينفعش يسمعه الشيخ صالح ، وطبعا كان معظم الشباب وحتى الراجاله الكبار بيتعمدوا يتكلموا عن احلام لما يكون الشيخ صالح معدى او قاعد ، وطريقه كلامهم بشكل مفيش راجل يستحمله على اهل بيته ، وميقدرش يقول ويتخانق معاهم ، مهو مش هيتخانق مع القريه كلها ، كل الفتره اللى فاتت كان ضغوطات وقهر على الشيخ صالح اللى استحمل كتير من الناس بسبب بنته احلام .

قهر الشيخ صالح زاد لما شاف بنته احلام وكل اللى عمله انه يدوب يضربها بالالم ويطردها مهو مش هتهون عليه انه يعمل فيها اكتر من كده مهو في الاخر هو اب ، وبعد ما طرد احلام كل ذكريات الوقت اللى فات كانت بتمر بعقل الشيخ صالح اللى مقدرش يستحمل اكتر من كده ، مات الشيخ صالح في اللحظ هدى ، مات وقلبه موجوع من بنته احلام .

يدوب احلام وصلت بيتها وجالها تليفون من امها تعرفها ان ابوها مات ، وقالتلها انها سبب موته ، وكانت منهاره طبعا وفى حاله صعبه ، اما احلام لما سمعت خبر موت ابوها وقعت مغمى عليها .

اكيد كلنا سمعنا عن المرض اللى بيسبب بزياده الوزن بشكل مفاجيء بيسموه ( مرض الغده الدراقيه ) في ممثلين كتير اتصابوا بالمرض ده ربنا يحفظنا ويحفظكم منه ، وده اللى حصل مع احلام ، بشكل مفاجىء وفى وقت قصير اوى اصيبت بالمرض ده ، ووزنها زاد بشكل كبير لدرجه ان ملامح جسمها وشكلها اتغير ، وطبعا كلنا عرفين ان اهم حاجه يمتلكها الممثل شكله بوجه عام .

لما اتصابت احلام بالمرض ده وعرفت طبيعه المرض من الاطباء دخلت في حاله احباط شديده ، وحالتها النفسيه بقت سيئه جدا ، رغم ان المرض ده ليه علاج بس بياخد وقت ، بس طبعا وحده زى احلام متعوده على الاضواء والشهره مش سهل عليها يتغير شكلها بالشكل ده ، وكانت بتحاول تستخبى من الصحفيين ووسائل الاعلان بوجه عام .

ايمن شاف الحاله اللى وصلتلها احلام ، وكمان شاف ان احلام انتهت كممثله ، مش بس بسبب المرض ده ، لانه عرف ان المرض ده ليه علاج ، بس هو شاف ان اللى وصلتله احلام من انهيار نفسى وعصبى خلاه مقتنع انها خلاص انتهت وعمرها ما هترجع النجمه احلام مره تانيه ، وسعتها بس كشف ايمن عن شكله وشخصيته الحقيقيه ، وان كل معملته الكويسه مع احلام كان مجرد تمثيل علشان المكاسب الكتير اللى كان بيكسبها من شغله معاها .

في الاول لحظت احلام اهمال ايمن ليها ، وطريقته السيئه وتجاهله ليها باستمرار ، ولما حولت تواجهه باسلوبه اللى اتغير معاها مردش عليها وسبها ومشى .

بعد كده عرفت احلام علاقات جوزها النسائيه اللى كان بيتعمد انها تتكشف قدام احلام ، وانه كان بيكلم ممثلات في التليفون قدمها بطريقه مش محترمه نهائى ، ولما اتخنقت معاه احلام ، كان رد فعله اسوء مما تتخيل ، لدرجه انه عايرها بمرضها وشكلها ، وقالها انها تحمد ربنا انها لسه مراته بشكلها اللى بقت عليه وانها متفتكرش نفسها انها لسه نجمه ومطلوبه ، وانه بقا يستعر ويتكسف منها ومن شكلها .

فهمت احلام ان جوزها كان متجوزها علشان اسمها ونجوميتها ، وان خلاص مبقاش ينفع تكمل حياتها معاه ، ويمكن دى الحاجه الكويسه الوحيده اللى عملها ايمن في احلام ، لانها ابتدت تفكر بشكل مختلف ، وقررت انها تصلح من حياتها باى شكل .

بعد ما اتطلقت احلام من ايمن ، طلبت من ايهاب الصحفى ينشر خبر اعتزالها للفن والتمثيل وانها هترجع لقريتها تعيش هناك ، احلام طبعا كانت مكونه ثروه كبيره من افلامها اللى عملتها ، علشان كده كان سهل عليها انها تعيش باقى عمرها متيسره الحال ، بس هى كانت عوزه تصلح اخطاء عملتها .

رجعت احلام القريه بس امها رفضت تستقبلها في بيتها وطردتها اكراما للشيخ صالح ، ومحدش تقبلها في القريه غير شخص واحد بس ، خطبها السابق حاتم ، رغم الوقت الطويل اللى مر ده الا انه متجوزش والوحيد اللى كان بيزور ويود الشيخ صالح ، وديما يزور قبره بعد ما مات ، ولما راح يزور قبره لقا هناك احلام بتعيط على قبر ابوها وبتطلب من ابوها انه يسامحها ، وسعتها خدها حاتم وراح بيها لبيت الشيخ صالح وطلب من امها تسمحلها ترجع بيت ابوها ، وعلشان حاتم كان غالى اوى عند الشيخ صالح الست ام احلام سمعت كلامه .

احلام كان كل همها انها ترجع اسم الشيخ صالح زى ما كان في القريه ، علشان كده بنت مسجد باسم الشيخ صالح ومستشفى واتكفلت بكل المصاريف بتاعتهم ، كانت بتعمل اعمال خير كتير باسم ابوها ، وكمان درست تمريض علشان تشتغل ممرضه وتساعد الناس في القريه علشان الناس تذكرها هى وابوها بالخير .

عدى حوالى خمس سنين من ساعت ما رجعت احلام ، حاجات كتير اتغيرت ، الناس كلها بتذكر الشيخ صالح بكل خير وحتى بنته احلام محدش بيقول عليها الممثله ، كلهم بيفتكروا بس الخير الكتير اللى عملته في القريه من ساعت ما رجعت ، كان طبيعى ان الشيخ حاتم يتجوز احلام لانه منساش حبها ، وهى كمان بقت تحبه لموقفه معاها ومع ابوها لما عرفتها ، ومعاهم طفل صغير عمره سنتين وطبعا اسمه صالح ، وشكل احلام رجع طبيعى بعد ما خفت من مرضها ، وبقا عندها حلم جديد مش حلم النجوميه والشهره ، حلم شبه حلم ابوها زمان ، ان تخلى ابنها صالح يبقا دكتور ويساعد الناس ويخلد ذكرى واسم ابوها الشيخ صالح .

الى هنا يكون نهايه روايتنا ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda