احــــــــــــــــــــــــلام ( الجزء الثامن )
 |
احــــــــــــــــــــــــلام ( الجزء الثامن ) |
سمعت احلام كلام ايهاب ، واتصلت فعلا بشريف باشا ، اللى لما سممع
صوتها مكنش مصدق نفسه من الفرحه ، ولما طلبت منه احلام انه يبعد عنها المخرج سامح
، عمل في سامح اللى ميتعملش ، سامح اتخطف من بيته حوالى اسبوع ، شاف فيه الويل ،
كانوا مش مخليونه يعرف ينام ، وبعد اسبوع لما انطلب منه انه يسيب البلد ويسافر
وميرجعش تانى سعتها سامح نفذ الاوامر فعلا ، ومن ساعت ما سافر سامح ومرجعش البلد
مره تانيه ومسببش لاحلام اى مشاكل ، هو فعلا زى ما قال ايهاب ، اختفى نهائى من
حياه احلام .
علاقه احلام بشريف بقت قويه من ساعت الموضوع ده ، احلام كانت محتاجه
واحد يقدر يحميها زى شريف ، وشريف علشان بيحب احلام فضل جنبها وينفذ اى طلب ليها
من غير اعتراض ، وكل اللى كان طلبه منها انها تعتبره صديق مش اكتر .
الايام كانت بتعدى واحلام بتزداد شهره ونجوميه ، هى تربعت على قمه
التمثيل ، اى فيلم او مسلسل يتحط فيه اسم احلام كان بيحقق نجاح كبير اوى ، وكان
حلم اى منتج او مخرج ان احلام توافق انها تشتغل معاه .
في الوقت ده كان في منتج شاب اسمه ايمن ، معملش غير فيلمين بس قبل كده
، وكان عاوز يشتغل مع احلام ، وفعلا طلب معاد يقابل فيه احلام في بيتها ولما راح
بيتها شد انتباه احلام ، هو ذكى ووسيم وبيعرف يتكلم حلو اوى ، وبيعرف يمدح في
احلام طول الوقت .
ايمن كان بيتقرب من احلام بسرعه اوى ، كان مكرس حياته كلها لاحلام ،
طول الوقت معاها او على الاقل بيكلمها في التليفون ، واكتر حاجه شد احلام ليه انه
كان رومنسى جدا معاها .
في خلال ست شهور اتقدم ايمن لخطبه احلام وهى وفقت بدون تفكير او تردد
، واتعملت حفله خطوبه ضخمه اوى مصر كلها اتكلمت عنها ، رغم ان شريف حظرها من
الارتباط بايمن وقالها انه طمعان في شهرتها وكل اللى عوزه اسمها وجمهورها ، بس
احلام مسمعتش لشريف ، كانت مقتنعه ان كلام شريف مجرد غيره من ايمن مش اكتر ، ولما
رفضت احلام كلام شريف سعتها شريف ابتعد عن احلام نهائى لانهم كنش قادر يشفها بتدمر
نفسها بايديها قدامه ، وكمان مكنش قادر يبعد ايمن لان احلام سعتها مكنتش هتسمحه
ابدا ، علشان كده اختفى شريف من حياه احلام .
احلام مش بس اتخطبت لايمن لا وكمان مضت احلام عقد مع ايمن لمده 3
سنوات كان من شروط العقد ده ان احلام ماتشتغلش غير مع ايمن وشركه الانتاج بتعته بس
، تقدروا تقولوا كده عقد احتكار لاحلام ، رغم ان ايهاب كان معترض على العقد ده
ونصحها متمضهوش بس هى كانت واثقه في ايمن اوى ومسمعتش لكلام ايهاب خالص .
عملت احلام اول فيلم مع شركه ايمن للانتاج وفعلا الفيلم نجح وحقق
ايرادات ضخمه ، وكانت احلام عايشه اجمل ايام سعادتها مع ايمن ، خصوصا انه طلب منها
انهم يتجوزوا بسرعه ، وفعلا وفقت احلام على الجواز .
حددت احلام مع ايمن ميعاد الفرح وكان فاضل على الفرح شهر واحد بس
وكانت مشغوله في تجهيزات فرحها ، مهى مينفعش وحده زى احلام تتجوز كده عادى من غير
ما تعمل رجه في البلد كلها .
في يوم كانت احلام ماشيه بعربيتها رايحه لحفله تكرمها ، ولما خلصت وهى
راجعه ولما وقفت في اشاره مرور لمحت وحده تعرفها راكبه عربيه اجره ، ولما اتفتحت
اشاره المرور مشيت احلام بعربيتها ورا العربيه الاجره لغايه لما نزلت الوحده اللى
تعرفها من العربيه ، وفضلت احلام ماشيه وراها من بعيد علشان تعرف بيتها فين ولما
وصلت بيتها دخلت احلام وراها البيت وخبطت على شقتها ، الوحد هدى كانت اسراء صديقه
احلام واللى سرقت منها الدهب بتعها قبل كده .
فتحت اسراء باب الشقه لقت احلام قدمها ، مكنتش مصدقه نفسها وعنيها ،
وطبعا سكتت اسراء نهاء ، اما احلام فدخلت الشقه من غير استاذان ، وفضلت تلف بعنيها
في الشقه زى ما بتكون بتتفرج عليها ، الشقه كانت فقيره اوى ، تقريبا مفهاش عفش غير
حاجات قليله اوى .
احلام بابتسامه وشماته : ازيك يا اسراء عمله ايه ، اسفه وأسألك ليه
عمله ايه ، مهو كل حاجه باينه قدامى اهيه ، وحده عيشه في القرف ده هتكون عمله ايه
يعنى ؟
اسراء حست بالزل والكسره من كلام احلام ، وكانت حطه وشها في الارض ومش
بترد على احلام وسكته ، هترد تقولها ايه يعنى .
احلام قربت من اسراء وعيونها مليانه فرح وشماته وقالت : شفتى انتى
وصلتى لفين ، وانا وصلت لفين ، انا لما شفتك في الطريق فضلت ماشيه وراكى علشان
عاوزه اوصل لبيتك عرفه ليه ، علشان اعرف انتى عايشه ازاى ووصلتى لايه ، وزى ما كنت
متوقعه عيشه في زباله ، مهو انتى اصلا زباله زى المكان اللى عايشه فيه .
اسراء حولت تتماسك قدام احلام ، مهى احلام لو عرفت ان اسراء بعد ما
هربت بدهب احلام واتجوزت الشاب اللى كانت بتحبه وبعد جوازها بسنه اكتشفت انه مدمن
وصرف كل فلوس دهب احلام على الشرب وبعديها طلقها ورماها لغايه لما اتمكن منها
المرض وبقت عايشه على الصدقات ، لو احلام عرفت ده كله هتشمت فيها اكتر وتزلها اكتر
، علشان كده كان لازم تتماسك .
اسراء : متشمتيش يا احلام ، كل واحد بياخد نصيبه .
احلام : لاء تقصدى كل واحد بياخد جزاته ، وده جزاتك انك سرقتينى رغم
انى كنت بحبك ومأمنالك .
اسراء : مش اوى كده يا احلام ، انتى مش قدام الكاميره علشان تمثلى دور
الملاك ، انتى زى ويمكن اسوء منى بكتير .
احلام اتعصبت وانفعلت من كلام اسراء وقالتلها بصوت عالى : انا النجمه
اشهر ممثله في مصر والوطن العربى كله زيك انتى يا جعانه ، وكمان اسوء منك ، ليه
كنت سرقتك وانتى مأمنالى ، ده انتى خسيسه ووطيه اوى .
اسراء : انا وطيه وخسيسه كمان ، اقولك انا زباله واسوء وحده في الدنيا
، بس يا نجمه يا مشهوره ، يا عالميه والكون كوله بيحبك تقدرى تقوليلى رأيك ايه في
وحده تهرب من بيت ابوها وتمرمغ سمعته في الارض ، وتسرق دهب خطبها وتهرب بيه ،
زعلانه اوى انى خنت ثقتك ، منتى خنتى ثقه ابوكى واهلك وخطيبك ، متعشيش دور الشرف
والضحيه اوى كده يا نجمه ، لو انا زباله ، فانتى ازبل من الزباله ، بس انتى اللى
مش شايفه نافسك كويس .
كلام اسراء حط احلام قدام نفسها ، خدت بالها ازاى ابوها شايفها ، ومش
بس ابوها وكمان باقى اهلها وقريتها ، وكمان حاتم اللى كان خاطبها وخدت دهبه وهربت
بيه ، احلام زى ما تكون فقدت النطق ، مقدرتش تنطق باى كلمه ترد بيها على اسراء .
اسراء شورت على باب الشقه وقالت لاحلام : روحى ارجعى من مكان ما جيتى
، كلنا زى بعض محدش فينا احسن من التانى ، يمكن اللى حصلى ده عقاب من ربنا على كل
اللى عملته معاكى ، بس قبل ما تفكرى تشمتى ، خافى من عقابك انتى كمان ، مهو زى ما
انا خدت عقابى ، اكيد انتى كمان هتخدى عقابك .
كلام اسراء خوف احلام اوى ، متكلمتش وجريت خرجت من شقه اسراء بسرعه
ومشيت ورجعت بيتها وهى بترتعش من كلام اسراء .
الى هنا يكون نهايه حديثنا اليوم
ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم
وتعليقاتكم .
لو اى حد حابب ينشر الروايه بصفحته او باى جروب يتفضل ، بس فضلا
انسبهالى لانها مجهودى .
اترككم فى رعايه الله
yasser oda