المساخيط ( الجزء الثانى )

المساخيط ( الجزء الثانى )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا فى الجزء السابق لما كرم قال ل ضاحى ولابنه سليم انه ابن الشيخ خلف .

 كان رد كرم مفاجيء لضاحى وابنه سليم لانهم يعرفوا كويس ان الشيخ خلف مكنش مخلف لانه من الاساس مكنش متجوز ، او على الاقل ده اللى كانوا يعرفوه .

سليم : انت كداب ، الشيخ خلف عمره ماكان متجوز ولا مخلف .

كرم : انا مش كداب ، انا ابن الشيخ خلف .

ضاحى : استنا يا سليم لما نفهم .

وانت يا كرم كنت فين كل السنين اللى فاتت مشفنكش ليه ، الشيخ خلف كان صحبى ولو متجوز ومخلف اكيد كان قالى ؟

كرم : انا معرفش هو خبى عليكم ليه ؟ بس انت بتقول كان ؟ هو ابويا فين حصله حاجه ؟

سليم : انت مالك انت حصله ولا محصلوش ؟ انت مين اصلاً ؟

ضاحى : قولت بالهداوه يا سليم ، لازم نسمع من كرم ، يمكن فعلا يكون عنده حاجه يعرفها احنا منعرفهاش .

وبص ضاحى ل كرم وقاله : الشيخ خلف مات يا كرم من حوالى خمس سنين تقريبا .

اتصدم كرم لما سمع خبر موت الشيخ خلف ، وبعدين قال : مات ازاى ؟

سليم : وهيا الناس بتموت ازاى ؟ اجله خلص وفحرنا فى الارض وحطناه ودفناه ، فهمت ولا عاوز شرح تانى .

ضاحى بصوت عالى وبنبره وعيد : انا قولت قبل كده يا سليم اسكت خالص يبقى مسمعش نفسك طول ما انا موجود فاهم ؟

سليم حط وشه فى الارض وقال : حاضر يا كبير .

ضاحى بص ل كرم وقاله : كمل يا كرم انا سمعك .

كرم : اكمل ايه ما خلاص خلصت ، اللى كان ليا فى الدنيا راح وحتى محضرتش لحظه موته ، كل اللى طالبه منك يا كبير تعرفنى قبره فين ازوره واقرء عليه الفاتحه .

ضاحى :طبعا يا ابنى حقك ، بس الاول تاخد واجبك ، وكمان بعد ما تزور قبر ابوك انا عوزك .

كرم : اللى تشوفه يا كبير .

ضاحى : انت ترتاح الاول وبعدين هبعت معاك اللى يوصلك لقبر ابوك .

كرم : حاضر يا كبير .

مشى كرم مع واحد من الرجاله يوريه غرفه الضيوف علشان يرتاح فيها وكانت غرفه مش جوه البيت بس جنبه وكانت غرف مريحه وكويسه .

لما مشى كرم سليم قال ل ابوه : قبر ابوه ايه اللى عاوز تورهوله يا كبير ، ما انت عارف الشيخ خلف اتدفن فين ، وبعدين الواد ده شكله وحكيته مش داخله دماغى ، وانت بكل سهوله تصدقه وتأمنله وتدخله بيتنا كمان طيب ازاى انا مش فاهمك يا كبير ؟

ضاحى : لسه قدامك كتير يا ولدى تتعلمه ، وللاسف العلام مش بالساهل ، احنا عرفين ان الشيخ خلف مكنش متجوز ولا مخلف وجالنا واحد قالنا انه ولده نعمل ايه ؟ نطرده ولا نخلص منه من قبل ما نعرف وراه ايه ولا مين بعته ؟

ولا نسمعه ونعرف وراه ايه ولو طلع عدو يبقى الصح انك تحطه قريب منك وتحط عينك عليه احسن ما يبقى بعيد ومش شايفه ومتعرفش بيدبرلك ايه ؟

وبعدين يمكن يبقى ابن الشيخ خلف صح ، محنا كلنا عرفين ان الشيخ خلف ديما كل سنه بيسافر شهر كامل ومنعرفش بيروح فين مش يمكن كان فعلا متجوز ومخلف فى مكان بعيد ومنعرفش عن الموضوع ده حاجه .

ولو طلع ابن الشيخ خلف يمكن سعتها يفتح لنا باب اتقفل من زمان .

سليم : باب ايه يا كبير مش فاهم ؟

سعتها بص ضاحى لبنته رحاب وقالها : سبينا لوحدنا شويه يا رحاب .

رحاب : حاضر يا بابا .

لما مشيت رحاب سعتها ضاحى قال : من ساعت ما مات الشيخ خلف واحنا شاربين المرار الطافح بسبب عميلك وتهورك ، وكل مره تجيب واحد علشان يساعد ويعمل اللى كان بيعمله الشيخ خلف ويلاقى مقابر فيها مساخيط واما تطلع مقابر عمال فقيره او اللى جايبه يطلع دجال ونصاب او يكون مابعرفش فى الشغلانه ، بقالنا خمس سنين ملقناش غير مقبره وحده ويدوب بتاعت واحد موظف عادى ولقينى تمثالين بس من المساخيط .

مش يمكن كرم يكون ورث ابوه او اتعلم منه علمه وشغلانته ويمكن يعوضلنا اللى ضاع مننا بعمايلك المتهوره .

سليم : هى الشغلانه دى بتتورث يا كبير ؟

ضاحى : ايوه يا فهيم ، زى ما انت هتورث مكانى وتبقى كبير البلد يمكن هو ورث شغلانه ابوه وعلمه ويعوضنا .

سليم : وحكايه قبر ابوه اللى قولتله هتورهوله هتعمل فيها ايه يا كبير ؟

ضاحى : الموضوع سهل للى بيفكر ، انت هتبعت لاى واحد من رجالتنا يروح ينقى قبر عليه القيمه ويحط عليه لوحه مكتوب عليها هنا يرقد المغفور له باذن الله الشيخ خلف وخلاص خلصت مهشم عضله يعنى .

سليم : انت دماغك دي ايه يا كبير سكنها شيطان .

ابتسم ضاحى : شيطان ايه يا ابنى اللى يسكن دماغى ، انا لو الشطان ظهر هقعده واعلمه ازاى يشوف شغله .

المهم عوزك تهدى شويه على اللى اسم كرم ده لغايه لما نشوف مايته ايه ولو جواه خير لينا هنردهوله ولو جواه شر لينا هنقلبه عليه اضعاف .

سليم : تمام يا كبير هعمل اللى انت عوزه .

طبعا خلال الخمس سنين من بعد موت الشيخ خلف حصلت امور كتير هى اللى خلت ضاحى عنده امل ان كرم اللى ظهر ده يعرف يعمل اللى عمله ابوه الشيخ خلف قبل كده وده بسبب ان الناس اللى جت بعد الشيخ خلف كانو السبب فى خسائر فى الفلوس وفى الوت بدون فايده زى ان واحد منهم كان بيطلب كل يوم يدبحوا خمس عجول ويرموهم ومحدش ياكل منهم حاجه لمده عشر ايام وفى الاخر اتحجج ان الاسياد مش راضين عنهم ورفضوا يفتحوا المقبره ، طبعا الاخ ده كان دجال وهو الان يسكن تحت التراب بعد ان اتقطعت ايده ورجليه عقاب على اللى عمله معاهم .

وواحد تانى كان بيطلب منهم انهم يحفروا خمس امتار تحت الارض لحفره وسعها خمس امتار ولما بيعملوا كده يقولهم لسه شويه ويطلب منهم يحفروا كمان خمس امتار وبعدين يقولهم مش كفايه ويطلب منهم يحفروا كمان خمس امتار لغايه لما فى يوم الحفره العميقه طلعت مايه كتير وسعتها اتأكدوا انه مجرد نصاب وهو دلوقتى مدفون فى البئر العميق اللى كان بيطلب منهم انهم يحفروه .

وزى دوول ناس كتير لدرجه ان سليم نفسه ندم انه قتل الشيخ خلف ده غير الكلام اللى كان بيسمعه من ابوه ضاحى كل مره يطلف فيها الناس اللى بيجبهم سليم نصابين .

تانى يوم راح كرم مع واحد من رجاله ضاحى يزور قبر ابوه الشيخ خلف ، طبعا ده القبر اللى كانوا محضرينه وفعلا راح كرم ووقف قدام قبر ابوه المزيف وفضل يبكى على ابوه ويقراءله الفاتحه ويدعيله ويتكلم قدام قبر ابوه على اساس ان ابوه اللى جوه القبر هيكون سمعه وميعرفش ان ابوه اصلا مش مدفون هنا .

بعد كده رجع كرم لبيت ضاحى واستأذن منه انه يسمحله انه يجى البلد يزور قبر ابوهكل فتره وسعتها ضاحى اقترح عليه انه يقعد فى البلد علشان يكون جنب المكان الى اتدفن فيه ابوه وكمان عرض عليه انه يشتغل عنده ويكون واحد من رجالته ووافق كرم على الاقتراح واستقر كرم فى البلد .
الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda