المزواج ( الجزء الاول )
مزواج ( الجزء الاول )
بدايه حكايتنا بتبتدى
لما جه اتصال من مجهول للشرطه بيبلغهم فيه ان فى شنطه سفر صغيره ملقاه فى حاويه
قمامه فى احدى الشوارع وفيها جزء من جثه شخص ما .
اتحركت الشرطه بالفعل
لمكان البلاغ وفعلا لقت شنطه سفر سوده صغيره ولما فتحوها لقوا فيها بعض اجزاء
متقطعه من جثه وكانت الاجزاء ديه من ايد ورجل شخص .
حضر ضابط المباحث
الجنائيه المسئول وكان اسمه رمزى .
راح رمزى وقف قدام
الشنطه وشاف اللى فيها وكانت فرقه الطب الشرعى بتعاين اجزاء الجثه وسعتها وجه رمزى
سؤاله للمعاون المباحث وكان اسمه محمد وقاله : ايه الاخبار يا محمد وصلت لاى
معلومه من الجيران اللى ساكنين فى المنطقه وفرغت اى كمرات قريبه للمكان ؟
محمد : فرقه البحث
شغاله يا رمزى باشا ، بس للاسف زى ما انت شايف المكان اللى لقينا فيه الشنطه فى
شارع فاضى تقريبا مفهوش ال اكام بيت بعيد بحوالى 100 متر عن الشنطه ، وكمان انا لاحظت
ان مفيش اى كاميرات مراقبه قريبه فى المكان .
رمزى : عرفتم مين
اللى بلغ ؟
محمد : رقم مش متسجل
باى شركه اتصلات وكمان التليفون اللى اتعمل منه المكالمه مقفول واحتمال يكون اتخلص
منه .
رمزى : يعنى المتصل
مشترك فى الجريمه ؟
محمد : باين كده يا
رمزى باشا .
رمزى : مش مرتاح
للجريمه ديه ، حاسس ان فيها حاجه مش طبيعيه .
فى الوقت ده قرب منهم
الطبيب الشرعى وقال : احنا كده خلصنا تقريبا المعاينه المبدئيه واخدنا العينات
اللى محتجنها يا رمزى باشا .
رمزى : طيب ايه يا
دكتور مفيش معلومه نمشى عليها لغايه لما تجهزو تقرير الطب الشرعى ؟
الطبيب وهو مبتسم :
فى يا رمزى باشا ماتقلقش .
الاول لقينا مع بواقى
الجثه البطاقه الشخصيه ديه احتمال تكون بتاعه المجنى عليه .
مسك رمزى البطاقه
وقراء الاسم المدون عليه وكان مكتوب فريد فهمى الصاوى منتج سنيمائى .
بص رمزى ل محمد وقاله
: روح للعنوان اللى فى البطاقه وابتدى شغلك من هناك ، صور صوره البطاقه على
تليفونك وابتدى البحث فى العنوان عن صاحب البطاقه .
محمد : اعتبر الموضوع
اتنفذ يا باشا .
رمزى وهو مبتسم قال
للطبيب الشرعى : شكر يا دكتور ورجعله البطاقه الشخصيه لانها من الادله الجنائيه .
بعد كام ساعه كان
رمزى فى مكتبه مستنى ان محمد يجمع المعلومات اللى عوزنها للتحقيق فى الجريمه وفعلا
دخل محمد مكتب رمزى وبعد ما قعد قاله : جبتلك اصل الحكايه يا باشا .
رمزى : الله ينور
عليك احكى .
محمد : روحت للعنوان
وقابلت مراته ، هى تونسيه الجنسيه متجوزه واحد مصرى واللى هو فريد فهمى الصاوى
واللى وصلتله انه سايب مراته من اكتر من سبع سنين وهى متعرفش عنه حاجه .
رمزى : مراته اسمها
ايه ؟
محمد : ريم يا فندم
وهى بره مستنيه .
رمزى : خليها تدخل .
قام محمد وفتح باب
المكتب وندى على ريم وطلب منها تدخل .
دخلت ريم وطلب رمزى
منها انها تقعد وبعدين قالها : بصى يا مدام ريم احنا بنحقق فى جريمه قتل ، ومحتاج
انك تكونى صريحه معايا وتحكلنا كل اللى تعرفيه ده علشان تروحى بسرعه .كان واضح على
ريم الخوف والتوتر .
رمزى لاحظ كده فحب
يستغل خوفها وقالها ابتدى حكايتك من الاول خالص ، قوليلى صحيح انتى بتشتغلى ؟
ريم : ايوه .
رمزى : شغاله ايه ؟
ريم : فنانه
استعراضيه .
رمزى : يعنى ايه مش
فاهم ؟
ريم : رقاصه حضرتك .
ابتسم رمزى وقال :
ماشى يا فنانه ، احكيلى بقى حكايتك من البدايه .
ريم : انا كنت زى اى
بنت عيشه فى بلدى وكان عندى حلم نفسى احققه انى ابقى نجمه افلام ومسلسلات ، طبعا
اى حد فى تونس نفسه يبقى ممثل بيحلم انه يجى مصر وتجيله الفرصه ويمثل ويشتهر ، وفى
يوم شفت اعلان على النت عن منتج سنمائى عاوز وجوه جديده للعمل فى عمل ضخم فى مصر
ومن شروط التقديم للعمل ده يكون من خارج مصر .
لما شفت الاعلان ده
وقدمت عليه وكنت مستنيه النتيجه وكل يوم بحلم بانى هبقى نجمه من نجوم السينما .
فى الاخر نجحت فى
الاختبارات اللى طلبوها .
رمزى : ايه نوع
الاختبارات ديه ؟
ريم : مشاهد تمثي
وكمان فقره استعراضيه بغنى وارقص فيها .
رمزى بضحكه : انتى
فنانه شامله بقى .
ريم : ممكن تقول كده
.
رمزى : ماشى يا فنانه
كملى .
ريم : اهلى رفضوا انى
اسافر وحدى مصر ، رفضوا فكره السفر كلها ، ولما صممت هما كمان عندوا معايا ومش بس
كده حددوا موعد لجوازى على واحد قريبى علشان انسى اللى بفكر فيه .
لما اتكلمت مع المنتج
صاحب الاعلان وحكتله اللى حصل معايا لقيته بيشجعنى انى اختار طريقى بنفسى ولازم
اصمم عليه وان هى حياتى وانا اللى لازم احدد اعشها ازاى ولازم ما استسلمش للامر
الواقع اللى اهلى عوزين يفرضوه عليا .
كلامه عجبنى وشجعنى
انى اخد القرار ، اكبر قرار خده وهفضل ندمانه عليه طول عمرى ، انى اهرب واجى على
مصر ادور على حلمى .
فعلا هربت من اهلى
وجيت على مصر وقابلت المنتج اللى وعدنى وعود كتير ووفرلى مكان اسكن فيه وبهرنى
باسلوبه والاحلام اللى عيشنى فيها .
وبعد فتره صغيره اوى
طلب منى الجواز بعد ما اعترفلى بحبه ووعدنى انه هيخلينى اكبر نجمه فى مصر كلها .
رمزى : وطبعا وفقتى
على الجواز .
ريم : مكنتش اقدر
ارفض الطلب بتاعه ، انا مكنتش بحبه ومكنتش بكرهه بس لو رفض الجواز منه سعتها ممكن
كان يرفض يساعدنى ومكنش ينفع افشل ومستحيل احاول ارجع لبلدى لاهلى اللى عمرهم ما
كانوا هيقبلونى بعد اللى عملته ، وهو المنتج كان عارف كل ده كويس وكان متأكد انى
هوافق .
وفعلا وفقت ، والايام
عدت وكل ما اطلب منه ينفذ وعوده كان بيتحجج بحجج كتير لغايه لما فى يوم جبلى لبس
غريب وقالى اقيس اللبس ده ولقته بدل رقص .
ولما سألته ايه اللبس
ده قالى دورى الجديد ، وقال ان الفنان لازم يقبل اى دور لغايه لما يشتهر ، وفقت
وخدنى كباريه وفهمنى انى لازم اكتسب خبره دور الرقاصه الاول قبل ما اجسد الدور
بتاعى ، رغم ان كلامه مكنش مقنع بس عملت نفسى مصدقاه ونفذت كل طلباته لغايه لما
لقيت نفسى بقيت الرقاصه ريرى .
رمزى : وبعدين حصل
ايه ؟
ريم بنظره حزن قالت :
مفيش يا باشا ، فضلت على الموال ده شهور وجوزى المنتج فجأه اختفى واتفاجئت انه
ماضى عقد بالتوكيل العام اللى كنت عملهوله عقد احتكار للكباريه لمده عشر سنين باجر
رمزى مقابل انه ياخد منهم مبلغ ضخم .
طبعا ده مجرد مسى
الحقيقه انه بعنى يا باشا للكباريه واللى لسه شغاله فيه لغايه دلوقتى .
رمزى : وجوزك راح فين
؟
ريم : معرفش عنه حاجه
من ساعتها حضرتك .
رمزى : طيب يا فنانه
مش شايفه ان اللى عمله معاكى جوزك سبب كافى انك تنتقمى منه وتقتليه مثلا ، وبصراحه
بينى وبينك هو يستاهل .
ريم : هو فريد اتقتل
؟
رمزى : احنا جزء من
جثه ومعاها بطاقته الشخصيه .
ريم : انا مقتلتهوش
حضرتك ومكنتش اعرف انه اتقتل الا من حضرتك دلوقتى .
رمزى : هو انتى لسه
على زمته لغايه دلوقتى ؟
ريم : ايوه انا لسه
مراته .
رمزى : ليه ايه السبب
؟ ليه مطلبتيش الطلاق منه ، كان سهل انك ترفعى قضيه عليه وتطلقى ؟
ريم : علشان الاقامه
الدايمه فى مصر طول ما انا مراته اقامتى دايمه فى مصر .
ولسه رمزى هيتكلم بس
صوت التليفون خلاه مايتكلمش ورد على الاتصال وسعتها اللى سمعه فى التليفونه خلاه
قام من مكانه وهو بيقوله انا جاى حالا .
بص رمزى ل محمد وقاله
: يلا بينا هنتحرك دلوقتى .
محمد : على فين يا
باشا ؟
بص رمزى ل ريم وقالها
: تقدرى تتفضلى يا مدام ريم بس هنتقابل تانى ، وكمان حضرتك ماينفعش تخرجى من البلد
وكمان هتغيرى محل سكنك لازم نعرفه الاول .
ريم : تمام حضرتك
ومشيت .
بص رمزى ل محمدوقاله
: جه بلاغ عن شنطه تانيه فيها جزء من جثه .
الى هنا يكون نهايه حديثنا اليوم
ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم
وتعليقاتكم .
لو اى حد حابب ينشر الروايه بصفحته او باى جروب يتفضل ، بس فضلا
انسبهالى لانها مجهودى .
اترككم فى رعايه الله
yasser oda