الهالكون ( الجزء الثالث عشر والاخير )

 الهالكون ( الجزء الثالث عشر والاخير )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا فى الجزء السابق لما نوح قتل اولاده ومراته نتيجه تأثير السراب عليه ولما فاق قرر انه ينتحر .

ولسه بيضغط نوح على الزيناد بس لقه اللى مسك ايده وخد منه المسدس بقوه ، ولما التفت لقاهم قوه من الشرطه .

الموضوع حصل لما نرجع لاول طلقه ضربها نوح على ابنه ، صوت الرصاص كان مرعب للسكان ، وسعتها بلغ واحد من الجيران ان فى صوت طلق نارى خارج من شقه الضابط نوح ، ومن حسن الحظ ان كان فى ورديه شرطه قريبه من الحدث لما اتبلغو من القسم راحو للشقه اللى خرج منها الصوت واقتحموها وطبعا لحاله نوح فى وقتها منتبهش للشرطه اللى اقتحمو الشقه وقدرو ينقذوه قبل ما ينتحر .

نوح دخل حاله هيجان وعلشان كده استدعى قوات الشرطه دكتور من العماره اللى ساكن فيها نوح وطلبو منه انه يديله حاجه مهدئه وفعلا ده اللى حصل ونام نوح .

اتحجز نوح فى مستشفه تابعه للشرطه ، طبعا خبر قتل ضابط شرطه لعائلته رج البلد كلها ، الصحافه والاعلان اتكلم وسعتها اعلنت الشرطه ان نوح ضابط سابق لانه فعلا قدم استقالته قبل الحادث بيومين تقريبا .

فاق نوح ولقى نفسه فى مستشفى وكان حتى متكتف فى السرير ، الطبيب كان خايف انه يحاول ينتحر مره تانيه علشان كده كان واخد احتياطاته .

جت الشرطه والنيابه اكتر من مره تتكلم مع نوح علشان تحقق فى الجريمه اللى عملها بس نوح التزم الصمت نهائى ومتكلمش باى كلمه .

مع الوقت نوح ابتدى يفكر فى حاجه تانيه غير الانتحار ، نوح فكر فى الانتقام ، هو ميعرفش مين اعدائه كل اللى يعرفه انهم منظمه بس ده كل اللى يعرفه ، ميعرفش اشخاص ولا حتى مكان المنظمه ، بس رغم كل ده نوح قرر ينتقم منهم بالشكل اللى فكر فيه بطريقته .

راح طارق يزور نوح فى المستشفى ودى كانت اول مره طارق يروح لنوح بعد اللى حصل .

طارق : اذيك يا نوح باشا ؟

نوح : زى ما انت شايف .

طارق : البقاء لله يا باشا .

نوح : ونعم بالله ، بس انا مش بقبل العذاء يا طارق .

طارق : يعنى ايه يا باشا ؟

نوح : لازم اخد حق مراتى وعيالى الاول .

طارق : كل اللى حصل مفهمكش انك عمرك ما هتقدر تقف قدمهم .

نوح : وايه اللى يخوفنى منهم دلوقتى يا طارق ، انا مخفتش منهم وكان عندى اللى اخاف عليه ، بس دلوقتى معنديش اللى اخاف عليه .

طارق : طيب خاف على نفسك وفكر ازاى تخرج من القضيه اللى انت واقع فيها .

نوح : هيعملو ايه يعنى ، انا مش خايف من الموت يا طارق .

طارق : تعرف يا نوح باشا ، انا مجتلكش ازورك ولا مره لانى مش قادر اشوفك بالشكل ده ، انا متأكد انك مستحمل كتير ، انا وانت عرفين انت قتلت مراتك واولادك ازاى ، انا نفسى اسعدك يا نوح باشا ، بس مكدبش عليك انا خايف ، خايف اوى ، انا عندى اللى اخاف عليه ، ومش عاوز امر باللى انت مريت بيه .

نوح : انا عارف يا طارق ، انت لازم تخاف ، وانا مش هورطك معايا فى اى حاجه ، متجيش تزورنى تانى ، ده لمصلحتك .

طارق : حاضر ، بس ممكن اسألك اخر سؤال ؟

نوح : اسأل .

طارق : انت ناوى على ايه ؟

نوح : هعمل اكتر حاجه هما بيخافو منها ، انا هفضحهم ، انا مرضتش اتكلم فى التحقيق او فى النيابه علشان هتكلم فى المحكمه ، هقول كل حاجه ، هقول انهم منظمه بتتحكم فى مصير العالم كله وازاى بيغتالوا اللى عوزينه من غير دليل وهقول الجرائم اللى حصلت دى حصلت ليه وازاى وانهم معندهمش مانع يقتلوا كتير علشان يخبو نفسهم وجرائمهم .

طارق : تفتكر المحكمه او حد هيصدق يا نوح باشا ؟

نوح : حتى لو معظمهم مصدقش كلامى ده هيسبب قلل وهيخلى جهات كتير تحقق وسعتها اكيد هيتفضحوا واكيد حد هيوصل للحقيقه .

طارق : وانت يا نوح باشا .

نوح : انا مش مهم ، مش هدافع عن نفسى او محتاج محامى ، انا ميهمنيش حتى لو خدت اعدام ، المهم اخد حق مراتى وعيالى .

طارق قام علشان يمشى وقبل ما يمشى قال : عمرى ما قبلت او هقابل راجل عظيم زيك ، طول عمرى نفسى ابقى زيك بس للاسف مستحيل ، ربنا يوفقك يا نوح باشا ، وسعتها طارق نفذ تحيه الشرطه ل نوح لاخر مره ومشى .

فى الوقت دهم كنش يعرف نوح ولا حتى طارق ان فى حد بيسمعهم ، شخص مجهول كان حاطت ميكات فى غرفه نوح ، وسمع كل الكلام اللى دار بين نوح وطارق ، وطبعا كان تبع الهالكون وبلغهم بكل حاجه واستنى اوامرهم .

جه اليوم اللى انتظره نوح ، النيابه حولت القضيه للمحكمه .

جت عربيه مخصوص علشان تنقل نوح من المستشفى للمحكمه علشان يحضر اول جلسات محاكمته .

فى نفس الوقت المحكمه اتملت انواع مختلفه من الناس ، منهم ضباط شرطه واعلاميين كتير جدا ، من جوه البلد ومن خارج البلد ، قضيه الضابط اللى قتل علته كانت قضيه رأى عام والناس كلها منتظرها لدرجه انه هتتذاع على احدى القنوات التليفزيونيه .

فى الوقت اللى كان جميع الناس منتظر وصول نوح بس نوح موصلش ووصل خبر هز ارجاء المحكمه كلها ، صاحب الخبر فرد من افراد الشرطه وقال بصوت عالى عربيه الشرطه اللى كانت جايبه نوح اتعرضت لحادثه وكل افراد الشرطه ماتو وكمان نوح مات .

الخبر رج ارجاء المحكمه ، وسائل الاعلام والصحافه نقلت الخبر بسرعه وحتى مواقع التواصل انتشر فيها الخبر .

كان فى تسأولات كتير اوى حولين الحادث ، كانت قضيه رأى عام لوحدها ، والنيابه العامه كلفت اشهر الضباط ووكلاء النيابه علشان يحققو فى الحادث .

بعد يومين خرجت النيابه العامه ببيان بتعلن فيه ان عربيه الترحيلات تعرضت لمحاوله اغتيال للمتهم نوح الذى كان يعمل ضابط سابق بالشرطه ، تمت المحاوله من شخص مجهول الهويه ، واسفرت المحاوله على قتل جميع افراد الشرطه المكلفين بنقل المتهم نوح وحراسته ، وتم قتل المتهم نوح نتيجه عده طلقات ناريه اصابت رأسه ووجه مما ادى الى تشوه وجهه بالكامل ، ونتيجه المعمل الجنائى والطب الشرعى تعرفت على جثته .

وتنعى النيابه العامه ببالغ الاسى كل الشهداء نتيجه الحادث الاليم وسوف تظل التحقيقات حتى الوصول للفاعل .

بعد شهر من الحادث تم غلق القضيه باكملها لعدم وجود دليل على مرتكب الحادث .

يمكن الناس فكره ان الموضوع انتهى بس ده مش الحقيقه ، لسه فى شخص يعرف عن الهالكون لسه عايش ولازم يتم التخلص منه الشخص ده يبقى طارق .

حتى طارق نفسه كان عارف ان هو وعيلته فى خطر ، علشان كده من ساعت لما قتل نوح عيلته سعتها طارق سفر مراته وعياله عند اهل مراته وفضل هو لوحده فى شقته .

وفى يوم بعد ما خلص طارق شغله ورجع لشقته ، ومكنش يعرف ان فى شخص مستنيه فى شقته ، واحد من منظمه الهالكون قاتل محترف واخد تعليمات انه يصفى طارق بطريقه تبان انها طبيعيه بدون شبهه جنائيه ، وكانت اسلم طريقه هى انه يموته عن طريق تسريب غاز او ماس كهربائى .

طارق مكنش عارف ان القاتل فى شقته مستخبى ، ودخل طارق ينام وبعد ما اتأكد القاتل ان طارق نام راح للمطبخ وفتح الغاز وبعدين راح يتلاعب بوحده الكهربا علشان لما يضغط طارق على اى كبس كهرباء سعتها تحصل شراره وتنفجر نار بالشقه كلها .

بس علشان طارق كان خايف ان هو يتعرض لمحاوله قتل كان نومه مش منتظم وحريص علشان كده صحى على صوت حركه القاتل فى الشقه .

فى الوقت اللى القاتل كان بيتلاعب فى لوحه الكهرباء جاله طارق ووقف وراه ووجه مسدسه ليه وطلب منه ميتحركش ويسيب اللى بيعمله .

القاتل : لو ضغط على الزيناد هنولع احنا الاتنين ، الشقه مليانه غاز .

طارق انتبه سعتها لريحه الغاز ، وسعتها حاول يكتف القاتل بس القاتل هجم عليه وقدر ياخد منه سلاحه ، ووجه نحيه طارق .

طارق : مش هتقدر تعمل بيه حاجه .

القاتل : انا هخرج من باب الشقه لو حولت تيجى ورايا هقتلك .

وقف طارق مكانه وفتح القاتل باب الشقه بس قبل ما يمشى قال : انت غبى دلوقتى اقدر اضغط على الزيناد وسعتها شقتك هتولع بيك .

ولسه هيضغط القاتل على الزيناد ، بس فجأه ظهر واحد ملثم وراه ، وكان معاه سلك لفه حول رقبه القاتل ، ودخله جوه الشقه مره تانيه وخنقه لغايه لما مات .

طارق بص للملثم وقاله : انت مين ؟

سعتها شال الملثم القناع من على وشه وكانت المفجأه لطارق ، الملثم يبقى نوح اللى مفروض مات من فتره .

طارق : نوح باشا ، انت لسه عايش ، طيب ازاى ، وكنت فين ؟

نوح : مفيش وقت يا طارق ، انا بقالى شهر مراقبك علشان كنت متأكد انهم هيحولو يقتلوك ، هبقى اعرفك انا ازاى عايش بعدين ، انا خلاص يا طارق عرفت هدفى اللى هعيش علشانه ، انا هخلص الناس من الهالكون للابد ، وهبقى على اتصال بيك ، ومعايا ناس تانيه بتساعدنى هعرفك بيهم بعدين ، المهم مش عاوز اى حد يعرف انى عايش ، علشان اقدر اتحرك برحتى ، اتخلص انت من الجثه ديه وخلى بالك من نفسك .

لسه طارق هيتكلم بس نوح مدلوش فرصه ومشى بسرعه .

والى اللقاء مع الجزء الثانى من روايه الهالكون ( شبح نوح ) .

الى هنا يكون نهايه الجزء الاول من روايتنا ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda