اختفاء زوجه ( الجزء الخامس )

اختفاء زوجه ( الجزء الخامس )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا قبل كده لما قرر حازم انه يسافر السعوديه علشان يقابل امير ومراته عبير .

حازم وضب اموره وخلال يومين بالظبط كان راكب الطياره ورايح للسعوديه .

فى الطياره حازم مكنش لوحده كان معاه زكرياته الكتير اللى عماله تتصارع فى دماغه ومن ضمن الزكريات دى انه افتكر حاجه حصلت بينه وبين مراته عبير .

فى يوم كان حازم قاعد بيتفرج على مسرحيه فى التليفزيون ، مسرحيه قديمه بس ممتعه اسمها سك على بناتك ، كان حازم عمال يضحك بصوت عالى وفطسان من الضحك وهو شايف فؤاد المهندس بيضرب الممثلين اللى معاه بالعصايه ، والتفت حازم لعبير اللى كانت قعده جنبه ومكنتش بتبتسم حته رغم ان المشهد كوميدى اوى ، استغرب حازم خصوصا انه عارف ان عبير بتحب المسرحيه دى وبالاخص مشاهد الضرب ، سعتها التفتلها وقالها : مالك يا عبير ، غريبه انك تشوفى المسرحيه دى وتبقى سكته كده ومتضحكيش ، وخصوصا المشهد ده انتى كان صوت ضحكتك بيسمع اخر الشارع وكنتى بتفضحينا ، سكته ليه ايه مزعلك ؟

عبير : مفيش .

سعتها عرف حازم ان فى حاجه مزعله عبير ومزعلاها اوى كمان ، سعتها طفى التليفزيون والتفت وقعد قصاد مراته وقالها : مالك بجد فى ايه ؟

عبير : مفيش يا حازم ، هقوم انام .

لسه عبير هتقوم ، سعتها حازم مسك ايديها وقعدها وقالها مدام هتهربى للنوم يبقى زعلانه اوى اوى كمان ، وانا مش هسيبك الا لما تحكيلى .

عبير : سعتها دموع عبير نزلت واتكلمت وقالت : تصدق يا حازم ، كنت مع اتنين جيرنا ستات ، واطفالهم بيلعبوا وانت عارف انا بحب الاطفال قد ايه ، واحد منهم وهو بيجرى وقع ، فامه سبته بس انا مقدرتش اسيبه وقمت جرى عليه اشيله واصلحه لما عيط ، وسمعتهم وحده بتقول للتانيه : عبير طيبه ربنا يرزقها .

فردت عليها التانيه وقالتلها : المفروض نخاف على عيلنا منها ، شفتى عنيها على العيال ازاى ، دى مش بتخلف يعنى ممكن تحسدهم .

اتفحمت عبير من العياط وهى تحكى لحازم وقالتله : انا عملت نفسى مش سمعه كلامهم مع ان صوتهم كان واضح ، اصلى كنت هقولهم ايه ، بقى انا هحسد عيالهم يا حازم ، هو فعلا ربنا مكرمنيش بالخلفه ، بس انا والله بحب كل الطفال ، بحب اولاد خواتى وبحب اطفال جيرنا وبحب اى طفل اشوفه وبفضل اسمى باسم الله عليه وعمرى ما عينى تشيل منهم ابدا ، والله يا حازم عمرى ما احسدهم انا ببصلهم علشان بحبهم واخاف حاجه تحصلهم فببقى منتبهه عليهم خصوصا ان امهم مش وخده بالها منهم خالص .

سعتها فضل حازم يواسى عبير ودموعه نزلت هو كمان لانه سبب عدم خلفه عبير ، واكتر حاجه فكر فيها سعتها ان ممكن عبير تطلب منه الطلاق علشان تتجوز وتخلف وده من حقها بس سعتها حس بالرعب لما فكر بس ان عبير ممكن تفكر تسيبه .

طول الوقت حازم بيفتكر زكرياته مع عبير وخصوصا الزكريات اللى ممكن تخلى عبير تسيب حازم وتمشى ، ومفيش حاجه رحمته من ان الزكريات تنهش فى تفكيره غير وصول الطياره الى السعوديه .

استقبله هناك صاحب رامى اللى اكرم حازم اوى ووفرله مكان فى بيته شقه مخصوص ليه وكمان لما عرف المكان اللى عاوز يروحه حازم طمنه بانه يعرف المكان ده وهيوصله بنفسه وهيستناه لما يخلص مشواره ويرجعه للبيت تانى .

وصل حازم للمكان اللى بيشتغل فيه امير ، لما وقف بره المكان سعتها اتردد يدخل ، هو مش عارف هيعمل ايه لما يشوف امير ده ، هيمسك اعصابه ازاى ، وهيتعامل معاه ازاى ، طيب لما امير يعرف ان حازم يبقى جوز عبير سعتها هيتكلم بصدق ولا هينكر وجود عبير اصلا ، ولو نكر وجود عبير سعتها حازم هيتصرف ازاى ، فلازم التعامل معاه الاول يكون بحكمه وبهدوء علشان يتكلم ويقول كل حاجه ، هو فى بلد غريبه وميعرفش القوانين هنا عمله ازاى ، واخيرا خد حازم الخطوه ودخل المكان .

وصل حازم ل امير وقعد معاه .

حازم : انا اسمى خالد ، انا ابقى ابن عم عبير طبعا عرفها .

امير : اه تقصد مدام عبير اللى من مصر صح ؟

حازم : ايه هى ، بص يا استاذ امير انا جيلك بصفه شخصيه ، اهل عبير قلقانين عليها اوى ، وعرفنا انها جتلك هنا ، انا عاوز اشوفها واتكلم معاها لو سمحت .

امير : انا هكلمك بكل صراحه ، انا ومدام عبير فعلا اصحاب ، بس عبير مجتش السعوديه اصلا .

حازم اتفاجيء من كلام امير ، بس شك انه بيكدب وبيخبى عبير علشان كده قاله : بص يا استاذ امير ، كلنا عرفنا بالعلاقه اللى بينك وبين عبير خلاص ، واللى انت بتقوله مبقاش ليه لزمه ، خلينا اقعد معاها لو سمحت ، انا مش ناوى على مشاكل .

امير : انا عارف انك مش مصدقنى ، بس دى الحقيقه ، ثانيه واحده هجيب حاجه واجيلك .

مشى امير ومغبش دقتين ورجع وكان ماسك معاه مصحف وحطه وحلف عليه وقاله : كل كلمه هقولهالك دلوقتى صدق .

انا هقولك كل حاجه حصلت بينى وبين مدام عبير ، انا اتعرفت على مدام عبير عن طريق جروبات على النت ، انا بنشر بيوت شعر وهى عجبها شعرى واتكلمت معايا ومن هنا عرفتها ، مع الوقت انا اهتميت بيها وهى كمان اهتمت بيا وبقينا نحكى لبعض كل حاجه عن حياتى وحيتها .

انا متجوز ومخلف ، ومش هنكر انا غلطت ، مكنش لازم اخلى الشيطان يضحك عليا واستغل ان مدام عبير بعيده عن جوزها واحساسا بالوحده وقربت منها ، هى كمان غلطت ومحدش يقدر ينكر ده ، بس انا غلطى اكبر منها ، يمكن لقيت معاها الاهتمام اللى ملقتهوش فى بيتى ، وهى لقت معايا الونس من الوحده بتعتها ، موضوع الخلفه عند عبير فارق معاها اوى ، وخصوصا جوزها اللى بيغيب لمدد بعيد عن البيت ، كل ده كان سبب للعلاقه اللى حصلت .

انا ومدام عبير مش بنتكلم من اكتر من ست شهور وده علشان احنا الاتنين ندمنا وقررنا نتوب ، انا عارف ان ذنبى كبير بس املى فى ربنا اكبر انه يسامحنى ويسامحها ، عبير بنت ناس طيبين ومش من طبعها الخيانه ابدا ، بس كلنا بنغلط بس ربنا كرمنا وتوبنا .

حازم كان مصدق امير فى كل كلمه قالها ، من جواه مستحيل يسمحه طبعا ، بس كان جواه حاجه مصدقاه ، واتاكد ان عبير فعلا مجتش عنده ، علشان كده قرر حازم انه يقوم وينسحب من غير ما يسبب اى مشاكل .

قام حازم وقاله : شكرا على صرحتك .

ولسه حازم هيتحرك بس سعتها قام امير من مكانه وقاله : استنى يا استاذ حازم .

اتفاجيء حازم سعتها لما لقى ان امير عرفه ، والتفتله وهو ساكت .

سعتها امير قاله : ايوه انا عارف انك استاذ حازم جوز مدام عبير ، انا شفت صور ليك كتير على صفحتها قبل كده وعارف شكلك ، دور على مراتك يا استاذ حازم هى تستاهل انك تدور عليها وتسامحها ، انا اسف طبعا على الغلط اللى غلطته فى حقك ، بس مراتك بنت اصول وتستاهل انك تسامحها .

حازم متكلمش اى كلمه ، كان حاسس انه عاوز يضرب امير ، بس مسك نفسه ، والتفت ومشى بدون اى رد فعل او بدون اى كلمه نهائى .

مشى حازم وسافر من السعوديه على اول طياره ورجع لبيته ، بس كان جواه حاجه متغيره ، مبقاش فى شك ان مراته كانت تعرف واحد عليه ، حتى لو عن طريق النت ومقبلتهوش بس بردو عرفته ، حازم انكسر حاجه جواه خلته استسلم فى انه يدور على مراته وقرر انه يكمل حياته فى غيبها .

الموضوع مكنش سهل على حازم ، بس هو حاول بصراحه وكان خلاص هيتعود على الامر بس الصدفه اللى حصلتله شقلبت حياته مره تانيه .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda