اشتباه ( الجزء الثالث )

اشتباه ( الجزء الثالث )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا فى الجزء السابق لما فاقت نورا من حاله الاغماء اللى حصلتلها وكانت محتاره تعرف جوزها مجدى بشكها نحيه عماد او لاء .

بعد تفكير كتير نورا خدت قرارها ، وراحت لجوزها وقالتله : بقولك ايه يا مجدى ، ما تيجى نعزم الدكتور عماد عندنا على الغدا بكره علشان اللى حصل امبارح ؟

مجدى استغرب من كلام نورا ، هى اول مره تتخطى الموضوع بسرعه ، طبعا كلامه فرحه علشان كده قالها : يا ريت ، انا هعزمه حالا يجى بكره على الغدا .

نورا : ايوه واكد العزومه وقوله نورا بتأكد عليك تيجى ومش هتقبل اعذار .

فعلا مجدى اتصل بالدكتور عماد وعزمه ، والدكتور عماد وافق .

نورا كانت بتستعد للموضوع ، طبعا الاكل الفندق اللى هيعمله بس نورا كانت بتستعد لحاجه تانيه خالص .

تانى يوم حضر الدكتور عماد في معاده ، واتجمعوا كلهم على ترابيزه السفره وكانت نورا المرادى مختلفه ، كانت بتهزر مع عماد بشكل كبير زى ما تكون شالت التكاليف ، اللى يشوفهم يفتكرهم اصحاب من زمان .

بعد الاكل نورا راحت جابت العصير وقدمه كوبايه للضيف طبعا اللى هو عماد ، وكوبايه لجوزها مجدى ، وكوبايه لنفسها ، وبعدين استأذنت انها تعمل حاجه وجايه .

نورا كان معاها ديما دواء مخدر علشان يساعدها على الاسترخاء والنوم ، ده كان علاج دائم معاها ، وحطت منه على العصير ، وعلشان ميبقاش في احتمال للخطأ حطت في العصير كله مخدر ولما قدمته استأذنت علشان يشربوا هما بس .

نورا كانت بتراقب عماد من بعيد ، وفعلا شرب كوبايه العصير ، وحتى جوزها مجدى شرب كوبايه العصير .

بعد كام دقيقه عماد ابتدى يحس انه دايخ ودماغه بتلف وعلشان هو دكتور جراح عرف انه اتخدر ، ولما حاول يقوم مقدرش ، الوقت فات وفقد الوعى .

ومجدى نفس الحكايه فقد وعيه ونام هو كمان .

هنا نورا ابتدى دورها الاول راحت على عماد اللى كان قاعد على كرسى وجابت حبل كانت محضراه وراحت ربطاه في الكورسى باحكام وربطت ايده ورجله وجسمه كله تقريبا وبقا مستحيل انه يفك نفسه .

نورا مش بس ربطت عماد هى حتى ربطت جوزها ، وطبعا اى حد هيستغرب انها تربط جوزها هو كمان بس هى عملت كده علشان جوزها مايستعجلش ويفك عماد من غير ما يسمعها ، علشان كده ربطته علشان تقدر تثبت اللى هى بتفكر وحسه بيه ان عماد هو الجانى .

بعد ما نورا عملت تجهيزتها ونقلت جوزها لاوضه النوم قبل ما تربطه وبعدين ربطته في اوضه النوم علشان مايصحاش على صوت كلمها مع عماد .

وبعد كده رجعت لعماد اللى كان نايم في سابع نومه ، وابتدى يفوق على وجع ضرب نورا ليه على وشه بالالم وهى بتقوله : اصحى ، بقولك اصحى .

ابتدى عماد يفوق وهنا نوره رمت على وشه ماييه ساقعه علشان يفوق لان كان اثر المخدر لسه موجود عليه .

عماد اول لما فاق لقى نفسه متكتف زى ما شرحتلكم وكمان نورا كانت حطه لزق على بوقه علشان مايتكلمش .

عماد لما فاق ولقى نفسه بالشكل ده استغرب من اللى حصله وحاول يفك نفسه وهو بيحاول يزعق ويصرخ بس بدون فايده .

نورا سعتها ضربته على وشه تانى بالالم وقالتله : انت تخرص ومسمعلكش صوت غير لما انا اسألك انت فاهم ؟

والمفروض انك اكتر واحد عارف انك مهما تصرخ محدش هيسمعك ، انا في شاليه على جزيره واقرب جزيره مننا على بعد 500 متر تقريبا يعنى احنا معزولين نهائى ، مش انا اللى هقولك كده دا انت اللى عزمنا ولا ايه .

سعتها عماد هدى شويه علشان يشوف نورا عوزه ايه .

نورا : ايوه اهدى كده واسمعنى كويس .

انا وانت عرفين ان دى مش اول مره نتقابل فيها ، انت اللى خطفتنى من اكتر من عشر سنين واعتديت عليا صح ؟

سعتها عماد هز دماغه برفض كلام نورا .

سعتها نورا اتعصبت وضربته تانى على وشه وقالتله : انت كداب ، انت اللى عملت فيا كده .

وسعتها عماد هز راسه بالرفض مره تانيه ، وكل مره عماد يرفض فيها اتهامات نورا سعتها نورا كانت بتتعصب اكتر واكتر وتزيد ضربها ليه ، بس كان بدون فايده لان عماد كان بيرفض كلمها وهى كانت محتاجه انه يعترف بالجريمه اللى عملها في حقها .

الوقت كان بيمر ، وبعد فتره مش طويله ابتدى مجدى يفوق من التخدير لغايه لما صحى ولقى نفسه نايم متكتف في اوضه النوم ، وسعتها مكنش عارف ايه اللى بيحصل وفضل ينادى على مراته نورا علشان يطمأن عليها .

نورا لما سمعت صوت جوزها سابت عماد ورحتله ، نورا كان معاها سكينه في ايديها بتهدد بيها عماد ، ولما شاف مجدى مراته نورا دخله عليه ومعاها سكينه اتخض وسألها : حصل ايه ؟

نورا : انا عوزاك تسمعنى كويس يا مجدى ، انا اللى ربطك بالشكل ده ، وانا اللى حطتلك مخدر في العصير ونيمتك .

مجدى باستغراب : انتى بتقولى ايه ؟ وليه عملتى كده ؟

نورا : فاكر الحادثه اللى حصلتلى زمان ، انا عرفت مين اللى خطفنى وعمل فيا كل ده .

مجدى : انتى بتتكلمى عن ايه ؟

نورا : انا بقولك عرفت من اعتدى عليا من عشر سنين .

مجدى : عرفتيه ازاى ؟

نورا : عماد هو اللى عمل فيا كده .

مجدى وهو مصدوم : عماد ، تقصدى الدكتور عماد اللى عزمنا هنا ؟

نورا : ايوه هو عماد .

مجدى : لاء انت كدى بتخرفى يا نورا ايه جاب عماد للى خطفك ؟

نورا : صدقنى يا مجدى ، عماد هو اللى دمر حياتى .

مجدى : ازاى يا نورا ، هتيلى عقل يصدق اللى انتى بتقوليه .

طيب عرفينى عرفتى ازاى انه هو اللى عمل فيكى كده زمان ؟

نورا : من اول يوم شفته فيه وسمعت صوته سعتها قولت لنفسى ان صوته نفس الصوت اللى خطفنى ، ومش بس كده طريقه كلام عماد هى نفس طريقه الشخص اللى خطفنى .

مجدى : بصى يا نورا ، انا عمرى ما سألتك ايه اللى حصلك في الحادثه ديه ، علشان خفت عليكى لما تحكى تتعبى ، وكمان انا قولتلك سعتها انى بحبك مهما كان وضعك ايه ، وهفضل احبك طول عمرى ، بس اللى انتى بتقوليه ده مجرد تهيؤات في دماغك ، مستحيل لاء ده من رابع المستحلات ان الدكتور الكبير المشهور عماد اكبر طبيب جراح في اليونان ويمكن في الشرق الاسط يبقى مجرد مجرم مغتصب ، ده كلام مايصدقهوش عقل ولا يستوعبه حد .

كلام مجدى كان كلام العقل والمنطق ، بس اللى جوه نورا كان رافض كل ده ، ومش معنى كده ان نورا على حق ، يمكن رغبتها في الانتقام من اللى قضى عليها زمان هو سبب ان عقلها بيهيئلها ان عماد هو الخاطف ، ويمكن سعتها يكون ان كل اللى بتفكر فيه مجرد اوهام مش اكتر .

دموع نورا غلبتها ونزلت وبصت لجوزها كانها بتستنجد بيه وقالتله : انا عارفه انك انسان ماتتعوضتش ، انك راجل بمعنى الكلمه ، وانك تعبت منى ومن تعبى اللى مابينتهيش ، بس انا مليش غيرك يا مجدى ، وعوزك تكون سندى زى ما عودتنى ، وتقف جنبى المره دى كمان ، ساعدنى يا مجدى علشان ارجع حقى ، مليش غيرك اطلب منه المساعده .

مجدى : ماشى يا نورا ، انا معاكى .

نورا : اوعى تكون بتخدنى على قد عقلى ، انا هفكك ولو كنت بتضحك عليا اوعدك انى هموت نفسى .

مجدى : هو انا عمرى وعدتك وخلفت عهدى معاكى .

سعتها نورا حضنت مجدى وقالته : عمرك ما خلفت وعدك ليا ، وفكت نورا مجدى .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda