الوسيط ( الجزء الاول )

الوسيط ( الجزء الاول )

 

ابن ادم كائن غريب ،فاكر نفسه محور الكون كله ، وان الكون من غيره يخرب .

ومن طبيعه البشر انهم مختلفين ، في نوع يصدق اللى بيسمعه خصوصا لو كانت حاجه هو معتقد بيها ، يعنى في ناس لما تكلمها عن العفاريت والجن يبقوا مصدقين كل اللى بيتقال لانهم مؤمنين بوجودهم ، وفى نوع تانى رافض الفكره نهائى ومقتنع ان لازم فيه اى سبب علمى لاى حاجه تحصل ، ومينفعش يقتنعو بحاجه عيونهم مش شيفاها ، وممكن تقولو انى زيهم مش مقتنع بالجن والعفاريت رغمانى عايش طول حياتى شايفهم .

الاول اعرفكم بنفسى ، انا اسمى ياسر عوده ، عاطل عن العمل ، مليش وظيفه ، وعلشان اوفر لنفسى تمن الاكل والشرب فبكتب روايات وابعها بمقابل ، يعنى ممكن تقولى عنى كاتب روايات مغمور محدش يعرفه لان كل اعمالى الكتابيه منسوبه لاشخاص اخرين .

انا عايش في شقه لوحدى ، مليش حد ومحدش عايش معايا ، الشقه اللى قاعد فيها قانون قديم يعنى بدفعلها اجار ملاليم ، ممكن ناس متصدقش لو قولت بدفع الايجار خمسين جنيه بس ، طبعا صاحب البيت نفسه يخلص منى وياخد الشقه اللى ممكن تجبله على الاقل خمسه مليون جنيه لانها في وسط البلد وفى مكان عريق وجميل ، وهو حاول يعرض عليا مبالغ كبيره واسبهاله بس انا مردتش لانى بخاف من التغيير .

اللى اتعلمته من الحياه ان محدش بيستحمل حد ، انا قعدت عند قرايب والدى فتره وطردونى ونفس الحكايه قعدت عند قرايب امى وطردونى هما كمان ، لدرجه انى اقتنعت انى نحس على اى حد اقعد عنده ، قرايب ابويا بيقولو عليا مجنون اما قرايب امى فبصراحه قالو انى ملبوس .

بعد كده قررت اقعد لوحدى وده اللى حصل ، بس هما كان عندهم حق انا كنت بقولهم على حاجات غريبه ، كنت بقولهم انى بشوف ناس غريبه في بيوتهم ، لدرجه انى وانا في بيت عمى قولتله بشوف واحد غريب في البيت سعتها شك في مراته وكان هيطلقها رغم ان هي حلفت ان ده محصلش وفعلا هى كانت صادقه ، منا اكتشفت بعدين ان مش كل اللى انا بشوفه الناس تقدر تشوفه .

تخيل اكتر واحد مش مؤمن بوجود الاشباح او الجن ويكون بيشفهم من وهو لسه عيل صغير ، طبعا انا مكنتش اعرفهم انهم اشباح كنت فاكر انهم بنى ادمين زينا والناس كلها شيفاهم زى ما انا شايفهم ، بس الحقيقه انى انا الوحيد اللى كنت شايفهم .

انا حاطط لنفسى قواعد ماشى عليها ماينفعش اخالفها ، واول قاعده انا حاطتها لنفسى انى مينفعش احاول تكلم مع شبح او حتى اقرب منه ، لازم اتجاهله تماما او اعتبره مش موجود اصلا لغايه لما يختفوا لوحدهم .

تانى قاعده انى معرفش حد انى بشوف الاشباح ، مهو لو عرفت حد اما مش هيصدقنى وهيعتبرنى مجنون او يصدقنى ويعتبرنى ملبوس وفى كل الحالتين هشوف مرار طافح من تجاهل الناس وخوف منى وحجات تانيه كتير زى ما انتم عرفين .

القاعده الثالثه انى محولش ادخل اى علاقه مع اى وحده ، اولا لانها مش هتقبل بيا ودى لاسباب كتير منها انى عاطل وكسول ومهمل وحجات تانيه كتير ده طبعا انى بشوف الاموات يعنى تخيلى واحد بتحبيه بيقولك انا شفت شبح جدك اللى مات من سنين وبيقولك بطلى سرمحه تفتكرى رد فعلك معاه ايه ، علشان كده قولت احفظ كرمتى ومحاولش اتقرب من اى وحده .

وكان كل فتره بضيف قاعده جديده لما الحياه تحتاج ، وكنت عايش على كده ، مش هقولكم انى كنت عايش مبسوط والكلام ده ، لا كنت عايش وخلاص ومش فرقه اهى ايام بتعد وتعدى .

لما كنت بكتب روايات في الاول كنت بكتب روايات رعب وغموض بس مع الوقت اسلوبى مبقاش يعجب اللى بيشتريها بيقول عليا تقليدى وقديم وسعتها اضطرت اكتب نوع من الروايات انا ماحبوش نوع عن العلاقات والخيانه والحب والكلام اللى بياكل مع الرجاله والستات ده ، بس كل مره كنت بكتب فيها روايه من النوع ده بحس انى بخسر نفسى شويه شويه ، كل روايه بتتكتب بفقد معاها جزء من روحى لغايه ما وصلت لدرجه انى بقيت فاضى روحى فاضيه ياسر مبقاش موجود ومش ده وبس دا حتى افكارى للروايات الاسفاف خلصت ورجعت عاطل عن الكتابه مره تانيه .

واهوه قاعد بحاول اكتب روايه يمكن اقدر اجيب منها قرشين ينفعونى ، بس سعات بصبر نفسى واقول ان عقلى مخلصش منه الافكار كل الحكايه انى في ظروف ماينفعش تكتب وتألف فيها .

انا عوزكم تتخيلوا انا قاعد في مكان عامل ازاى ، انا قاعد على ترابيزه السفره في الصاله ، على الكرسى الوحيد اللى موجود مهو كل الكراسى التانيه بعتها علشان اقدر اعيش ، ولابس الترنج بتاعى اللى لما بيتوسخ بقلعه واغسله واستنى لغايه لما ينشف علشان البسه تانى ، وقدامى كوبايه الشاى اللى بشرب فيها بقالى اكتر من نص ساعه طبعا تلجت وسقعت بس حالف ما اسبها مهو مفيش ولا حبايه شاي في المطبخ ولا حتى معلقه سكر دخلت بيتى من شهر بشرب الشاى مر طيب اعمل ايه كيلو السكر وصل ل عشرين جنيه ، تخيلوا عمال اتحايل على كوبايه الشاى علشان ما تخلصش ، وفى ايدى الشمال السيجاره الوحيده اللى اللى معايا من يومين كل يوم اولعها اشرب نفسين واطفيها علشان ماتخلصش ، كل ده بالنسبالى عادى ممكن اتكيف معاه واكتب عادى بس اللى بيقطع حبل افكارى اللى بشوفه وانا قاعد .

عرفين المشكله فين ؟ المشكله في الافلام اللى بتبين ان الاشباح بيظهروا لحظات ويختفوا لو انتم مصدقين الكلام ده احب اقولكم عن ثقه انهم بيضحكو عليكم ، ايوه اسمعو كلام ، يعنى انا قاعد بقالى نص ساعه وقدامى نحيه المطبخ كده في بنت صغيره عمرها حوالى سبع سنين وقفه ومداريه في الحيطه على اساس انى مش شايفها مثلا او يمكن مكسوفه مع ان شكلها مش بس يخوف ده يرعب اى حد ، عوزكم تتخيلوا بنت عندها سبع سنين وقفه ولبسه جلبيه بيضا كلها دم وشعرها الاسود الطويل نازل مغطى نص وشها وحافيه وكل ده عادى اما اللى مش عادى لما بتحاول تتحرك الشعر بيبعد عن وشها وبيبان اللى مستخبى بيبان ان عندها عين من عيونها مش موجوده في مكانها زى ما تكون مخلوعه ، ايوه زى ما بقولكم كده عنيها مخلوها وعمله شكل مرعب ، ولما دققت النظر للبنت اكتر لقتها ماسكه حاجه في ايديها ، ومع الوقت عرفت هى ماسكه ايه ، ايوه اللى فكر فيكم في الموضوع صح ماسكه في ايديها عنيها المخلوعه .

تفتكروا واحد شاي فده قدامه هيقدر يكتب حاجه حتى لو روايه اسفاف حتى .

ممكن واحد من اللى قعدين حبايته ناصحه شويه على رأى واحد كنت اعرفيه يقولى بلاش تبصلها او بص في ناحيه تانيه ، احب اقوله يعجبنى فيك نباهه ونصاحه عقلك يا اذكى اخواتك ، انا فعلا لما بحاول اشغل مخى ذي حضرتك كده وابوص في اى اتجاه تانى مع ان ده صعب وابص مثلا نحيه باب الاوضه المعاكس للمطبخ القى ايه يا ناصح القى واحد عجوز واقف وملامحه كلها مش واضحه علشان مليها التراب ، دا حته لو فتح بوقه بينزل منها تراب ويقع على الارض ومهما احاول اكنسه مش بيتكنس عرفين ليه لان مفيش تراب اصلا انا بس اللى شايفه ولسه العلاماء العباقره مخترعوش مكنسه بتكنس تراب الاباح وحتى لو اخترعوها معيش فلوس اشتريها اصلا بلا وجع قلب .

ولو حبيت ابص في ناحيه تانيه زى ما فكرت الست اللى عماله تقرقض في صوابع ايدها دلوقتى فمبقاش قدامى حته تانيه ابصلها غير نحيه باب الشقه مثلا وهناك بقى هلاقى الدلع كله ، حته وحده انما ايه تحس من طريقه لبسها انها كانت هند رستم في عز مجدها ، او ملكه الاغراء غاده عبد الرازق ايام ما كانت بتعرف تعمل اغراء ، وحده لابسه لبس معرفش اوصفه ايوه زى ما انتم فكرتم بالظبط بس المصيبه انها لما مثلا بتعمل اغراء برجليها متلقيش حاجه تغريق بيها مش علشان هيا شبح لا علشان معندهاش رجلين اصلا ، هى عباره عن راس وتحتيه الرقبه وكتفين وفستان عريان مش مبين اى حاجه لان مفيش جسم ليها وعماله تطير في الهوا وخيلا اهلى معاها ومنشفه دمى .

شفتم اللى انا عايش فيه ، وكلهم وقفين حوليا ولما اسبلهم الشقه وامشى في الشارع اشوف اشباح تانيه واشكالها اغرب ، وقبل ما حد فيكم يستنصح ويقولى اتكلم معاهم انا كمان فكرت في كده قبل كده انى اتكلم معاهم واشفهم عوزين ايه ، بس لو عملت كده واتكلمت معاهم وحلتلهم مشاكلهم هيدفعولى المقابل ازاى دوول اموات يعنى الشغل معاهم هيجوع اكتر ، انا مش عارف اعمل ايه ، انا فاشل في كل حاجه ولا ايه ، ولا اكون نحس مثلا .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda