هلال ( عوده الغول ) الجزء الثانى

 هلال ( عوده الغول ) الجزء الثانى

قبل استكمال احداث قصتنا ، لمشاهده الجزء السابق ( اضغط هنا ) ، توقفنا قبل كده لما ضرب هلال الرجاله اللى بيحولوا يفتحوا عربيه البنت وهربوا .

 هلال التفت للبنت اللى في العربيه وقالها : انتى كويسه ؟

بس البنت كانت خيفه ومش مطمأنه في الاول ، وهلال فهم كده وعلشان كده حاول يطمنها على قد ما يقدر ، وعاد عليها السؤال فشورتله انها كويسه ، سعتها هلال طلب منها انها تتحرك بعربتها وهو هيمشى وراها بعربيته لغايه لما توصل لاقرب مكان تحس فيه بالامان .

اتحركت البنت بعربتها ومشى هلال وراها ، كانت حسه بالامان وفضلت ماشه لغايه لما وصلت للفيلا اللى عايشه فيها والتفتت علشان تشوف هلال وتشكره بس ملقتهوش ، كان هلال سبها لما لقاها ماشيه في شوارع امان فيها ناس .

رجع هلال لبيته وهو ميعرفش حاجه عن البنت اللى نقذها ، وهى كمان متعرفش اسمه او حتى شكله لان هلال فضل متلثم قدمها بعد ما ضرب الرجاله اللى حاولوا يطلعوها من عربيتها .

هلال دخل بيته وكان متأخر اوى ، كان كل اللى يهمه ان ابوه ميعرفش حاجه عن اللى حصل ، وفعلا دخل هلال وفتح باب اوضه ابوه لقاه نايم فقفل باب الاوضه ، وراح لاوضه بنته حبيبه ملقهاش في اوضتها سعتها راح لاوضته فلقى حبيبه نيمه في اوضته ، سعتها حضنها ونام جنبها .

نسيب هلال مع بنته ونروح لمكان تانى خالص ، هنروح لبيت واحد من الناس كان عايش عيشه هاديه ، يملك قطعه ارض زراعيه زارع فيها اشجار فكهه وبيرعاها وبياكل من محصولها ، هى عباره عن مزرعه فواكه صغيره ، الراجل صاحب المزرعه دى اسمه عم فوده .

الاول لازم ان عم فوده مايملكش في حياته غير بنته مراته ست كبيره وطيبه وبنته ايمان اللى خلصت دراسه ومستنيه ربنا يرزقها بابن الحلال اللى يستهلها ، وكمان عنده مزرعه اشجار الفاكهه اللى اتكلمنا عليها ودى كان وارثها ابن عن جد ورث عيله يعنى .

لو دخلنا بيت عم فوده في اى وقت هنلاقيه بيت كله فرحه وسعاده ، فيه حاله جميله من الرضى والحب ، حياه سهله وبسيطه ومفهاش خلفات ، كل ده هتلقيه في بيت عم فوده بس لو حبيت تدخله في الساعه المتأخره دلوقتى هتلاقى ان البيت متغير نهائى ، في ضيوف عند عم فوده ، جينله في الوقت المتأخر ده ودى حاجه مش طبيعيه ، خصوصا ان الضيوف دوول مش من اهل عم فوده او حتى من اصدقائه .

ناخد بصه بسيطه في بيت عم فوده هنلاقى ان عم فوده قاعد وجنبه مراته وجنبهم بنته ايمان ، وقصادهم قاعد راجل باين عليه كده انه غنى اوى ، واقف وراه اكتر من شخص شكلهم رجلته .

الراجل الغنى ده احب اعرفكم عليه ، اسمه علام اقصد علام باشا ، الراجل ده ممكن تقول عليه مليردير ، بنك متحرك يعنى ، صاحب مجموعه شركات مختلفه في صناعه الادويه ، عنده اسطول من الشركات وبيشتغل تحت ايده الاف من العاملين ، علام باشا يملك كل حاجه تقريبا ، فلوس ملهاش عدد ، نفوذ كبيره وعلاقات بسبب على اعلى مستوى مش بس في البلد لا وكمان بره البلد ، وعنده اخ اسمه علاء ، الغريبه ان علاء ده بيحب اخوه علام بشكل يخوف ، سهل عليه انه يرتكب جريمه لو حد حاول يضايق اخوه علام باى شكل حتى لو مكنش يقصد انه يضايقه ، وعلى فكره علاء كان من ضمن الرجاله اللى وقفه ورا علام ، كان دراعه اليمين وعلام بيثق في اخوه علاء اكتر من ثقته في نفسه .

علام عنده ابن واحد بس ، اسمه سيف وهو مثل حي للشاب الغنى الفاسد اللى الفلوس بوظه اخلاقه ، لا الحقيقه هو معندوش اخلاق اصلا علشان تبوظ ، سيف ميهمهوش حاجه في الحياه غير نفسه وانبساطه ومتعته وبس ، ميفرقش عنده اى حاجه تانيه ، وفلوس ابوه ونفوذه وكمان مسنده عمه علاء ليه خلت سيف عنده استعداد يدوس على رقاب الناس في مقابل انه ينبسط وبس .

زى ما قولتلكم علام كان عنده كل حاجه يتمناها اى واحد ، بس في حاجه وحده مكنتش عنده ، علام مكنش عنده قلب ، اللى جوه صدره وبين ضلوعه مينفعش نسميه قلب ، ممكن نقول عليه حجاره او صخر او معدن ، هو مكنش عنده قلب يحس بالاخرين او يعطف عليهم ، مفيش مره في حياته قلب رق لحد لاى حد حتى لو طفل او متسول او ست عجوزه ، علام مكنش يعرف حاجه اسمها احساس .

اللى زى علام مكنش يعرف حاجه اسمها لاء ، معندوش استعداد ان حد يقوله لاء على اى حاجه هو عوزها ، وده سبب زيارته لبيت عم فوده ، من سوء حظ عم فوده ان علام من سنه تقريبا بنى مصنع قريب اوى من مزرعه عم فوده ، والمصنع ده زى اى مصنع ليه مخلفات ، ومخلفات مصانع الادويه اخطر من اى مخلفات اى مصنع عادى لان فيها مواد كيماويه خطيره ولازم تتخلص منها بطريقه امنه وبنظام معين ، بس علشان التخلص منها مكلف جدا في النظام المتبع ، وطمع علام بانه مش عاوز يدفع مبالغ كبيره للتخلص الامن للمخلفات دى فكان متعود انه يتخلص منها بدفنها في اقرب مكان للمصانع بتعته ، وده اللى حصل مع عم فوده ، لما بعت علام راجل من رجالته علشان يشترى مزرعه عم فوده علشان يستخدمها في دفن مخلفات مصنعه ، وسعتها رفض عم فوده يبيع المزرعه لانها ورث ابوه وجده وحاجه عزيزه عليه اوى ، ورغم ان الراجل اللى بعته علام رفع سعر المزرعه لاكتر من الضعف بس عم فوده فضل مصمم على رأيه ورفض انه يبيع المزرعه بتعته ، وسعتها يأس الراجل وبلغ علام بكل اللى حصل ، سعتها علام مقبلش كلمه لاء والرفض اللى رفضه عم فوده وادى تعليمات لرجالته انهم يدفنوا مخلفات المصنع في مزرعه عم فوده غصب عنه .

نفذت رجاله علام باشا اومره ، وابتدوا يدفنوا مخلفات المصنع في مزرعه عم فوده في وقت متأخر اوى بدون علم عم فوده ، بس بعد فتره قصيره اكتشف م فوده ان في تغير في مزرعته ، حتى الاشجار دبلت ومبقتش كويسه زى الاول ، وعلشان المزرعه دى كل حياته وحافظها وعارفها زى ما هو عارف بنته ايمان بالظبط عرف ان في حاجه غلط في المزرعه وسعتها قعد عم فوده يدور في مزرعته ويحفر فيها في اماكن كتير لغايه لما وصل لمخلفات مصنع علام واتاكد سعتها ان شكه كان في محله .

عم فوده راجل مسالم بس شجاع ومش بيخاف ، علشان كده اول حاجه عملها انه راح وقد بلاغ بكل اللى حصل ، وبشكل مباشر اتهم مصنع علام بانه هو اللى عمل كده في مزرعته .

بس عم فوده مكنش يعرف ان نفوذ علام كانت كبيره اوى ، وجه اتصال لعلاء اخو علام بيعرفوه ان في واحد مقدم بلاغ في مصنع اخوه وان الموضوع ده لو اتعرف سعتها سمعه اخوه وسمعه شغله ومصانعه اكيد هتقع ويفتح عليهم ابواب هما في غنى عنها وطلب منه يتصرف بسرعه وهو هيعطل البلاغ اللى اتعمل ده على قد ما يقدر .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda