الست بدويه ( الجزء الرابع )

الست بدويه ( الجزء الرابع )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا فيما سبق حينما تفاجأت بطوط بوقوف الست بدويه خلفها حينما كانت تسأل زوزه عما شافته فى غرفه خالتهم بدويه ؟

فردت عليها الست بدويه : نعم يا روح امك ، هو انتى شفتى عفريت ؟

بطوط : يا خالتى مقصدش والله ، انا بس اتغضيت لما لقيتك ورايا ، انتى جيتى امتى ، ومسمعتش صوت مشيتك ، دا انتى لما بتمشى بتعملى فرح وازعرينه ، وبعدين عفريت ايه اللى تشبهى نفسك بيه ، هو فى حد بجمالك يا بدويه يا قمر ؟

الست بدويه : هما العفاريت وحشين يا هبله ، دا فيهم شباب موزز ، كتك وكسه ، المهم قومى حضرى الاكل يلا ، خلينا ناكل لقمه ، جعت يا منيله .

بطوط : الاكل جاهز هقوم احطه على الطبليه حالا يا خالتى .

قامت بطوط من على السرير ، وقبل ان تخرج من الاوضه ، اوقفتها زوزه وقالت لها : استنى يا بطوط هاجى اسعدك .

فقالت حينها الست بدويه : لا خليكى يا زوزه انا عوزاكى ، عوزه اتكلم معاكى شويه .

ثم نظرت الست بدويه الى بطوط وقالت : روحى انتى يا بطوط ، ولما تجهزى الاكل هنيجى .

بطوط : حاضر يا خالتى .

بعد ان ذهبت بطوط ، قفلت الست بدويه باب الغرفه ، وجلست بجانب زوزه ، وقالت لها : خيفه منى يا زوزه ؟

زوزه وهى متوتره للغايه : وانا اخاف منك ليه يا خالتى ؟

تبسمت الست بدويه وقالت : يا بت دا انتى قاعده بتترعشى ، ثم وضعت الست بدويه يداها على رأس زوزه ، وضمتها لحضنها وقالت : انا مش هكدب عليكى يا زوزه ، انا جوايا شر كبير اوى ، وانا بحاول على قد ما اقدر مطلعهوش لحد ، بس خليكى وثقه انى عمرى فى يوم ما هأذيكى انتى او اختك بطوط ، انتم متعرفوش انا بحبكم قد ايه ، حاولى تنسى اللى شفتيه ، انا عارفه انه صعب ، بس حطى فى عقلك ديما ان خالتك بدويه مستعده تخسر حيتها ولا انها تسمح لاى حد او لنفسها ان تتأذى شعره وحده من راسكم ، انتم بناتى ، فعلا انتم مش من بطنى ، بس انتم حته من قلبى .

توقف ارتعاش زوزه حينما سمعت كلام خالتها بدويه ، وحضنت زوزه خالتها وقالت لها : ربنا ما يحرمنا منك ابدا يا خالتى .

وبينما كان الاثنان يحتضنان ، دخلت عليهم بطوط ، كانت تريد ان تخبرهم ان الطعام جاهز على طبليه الاكل ، ولكن حينما وجدت خالتها تحتضن اختها ، قالت لهم : انتى بتوزعينى يا خالتى علشان تحضنى زوزه ، هو انا كده ديما محدش بيحضنى ليه ؟

تبسمت الست بدويه لبطوط وقالت لها : يا بطوط انت العسل والحب كله ، تعالى فى حضنى يا موزه .

فرغم قساوه الست بدويه فى بعض الاوقات ، الان ان ذلك لا يمنع انها سيده تتمتع بقلب قد احب فتاتان يتيمتان ، كانت لهم السند والعون فى كل وقت ، وكلنا نعرف ان الحب يقابله حب ، فالحب الصادق النابع من قلب تلك السيده ، قابله حب الاختين ، وقررت الاخت الكبيره زوزه ان لا تخبر اختها الصغيره عما شاهدته فى غرفة خالتهم بدويه ، واحتفظت بما شاهدته فى قلبها ، خافت ان تتغير بطوط مشاعرها باتجاه خالتها الست بدويه .

فى اليوم التالى لتلك الحادثه حصل شيء اخر ، جاءت الست انتصار ، ولكن هذه المره كانت تزغرط من الفرح ، دخلت انتصار شقه الست بدويه وهى تنادى عليها والفرح ظاهر فى كلامها وافعلها ، وحينما وجدت الست بويه اخذت تحضنها وتريد ان تقبل ايديها من الفرح ، منعتها بالطبع الست بدويه وقالت : ايه يا بت الهبل اللى انتى بتعمليه ده ؟

انتصار : فرحانه يا ست الكل وست الناس وستى انا .

كانت بطوط فى المطبخ فى ذلك الوقت ، وخرجت لتشاهد ماذا حدث حينما سمعت صوت انتصار وهى تزغرط .

الست بدويه كانت تضحك على فرحه انتصار ، وقالت : اهدى يا بت بدل ما الموكوس جوزك يقول هبله ويفكر يتجوز عليكى تانى ؟

انتصال : هو يستجرى يفكر يعملها تانى ، هو خلاص عرف ان الله حق ، وعرف ان انا ورايا الست بدويه على سن ورمح .

تبسمت الست بدويه وقالت : متقلقيش يا بت يا انتصار ، لو فكر يتجوز عليكى ، هقلبهولك قرد ، وانتى تسرحى بيه على الموالد ، هتلموا فلوس كتير ، واهو افيدلك منه بردو .

ضحكت انتصار وقالت : لا يا ست الكل ، ان شاء الله هو كده اتربى وبقى تمام .

لم تفهم بطوط ما فعلته خالتها الست بدويه ، لذلك سأله انتصار وقالت لها : هو حصل ايه مع جوزك يا انتصار ؟

ضحكت انتصار وقالت : الراجل بقى بيحلم بيا ، دا بقى بيحبنى اوى يا بطوط ، انا مش مصدقه اللى حصل ، الراجل بيحبنى لدرجه انه بيشفنى وهو صاحى ونايم كمان ، دا بيخطرف باسمى وهو نايم ، حتى اللى كان هيتجوزها عليا نداها باسمى وقالها يا انتصار .

بطوط : طيب يا ست انتصار مبروك عليكى رجوع جوزك .

انتصار : البركه فى حبيبتنا وبركتنا الست بدويه .

ثم اخرجت انتصار مبلغ من المال ، وتقدمت باتجاه الست بدويه ، وقدمته اليها .

الست بدويه : ايه دا يا انتصار ؟

انتصار : دا مبلغ صغير كده يا ست الكل ، حلاوه رجوع جوزى .

ذهبت الابتسامه من على وجه الست بدويه ، وحل الغضب مكان تلك الابتسامه ، وقالت لها : انتى بتهنينى فى بيتى يا انتصار ، بتدينى مقابل خدمتى ليكى ، انا عملت اللى عملته علشان انتى مظلومه ، وعوزه تحفظى على جوزك ، انا لو بعمل كده علشان الفلوس ، كنت هبقى زى الدجالين والنصابين اللى موجدين فى كل حته ، تصدقى ندمتينى على مسعدتى ليكى ، دا تقديرك ليا ، من امتى انا باخد حاجه من حد لما بسعده ؟

انتصار : يقطعنى يا ست الناس ، والله ما اقصد اهانه ولا حاجه ، انا فكرت انى ارد ولو جزء من جمايلك عليا ، انتى رديتى فيا الروح لما رجعتى جوزى ، انا وعيالى كنا هنضيع ، والله ماقصد يا ستى ، يقطعنى .

الست بدويه : خلاص يا انتصار حصل خير ، خدى فلوسك وروحى اشترى اكله حلوه ليكى انتى وجوزك والعيال ، وحاجى على جوزك يا انتصار ، شوفى نقصك ايه خلاه يدور عليه بره بيته ، خافى على بيتك وعيالك .

انتصار : حاضر يا ستى وتاج راسى .

خرجت انتصار من باب الشقه ، وهنا تحدثت بطوط لخالتها بدويه وقالت : بقوليك ايه يا خالتى ؟

الست بدويه : قولى يا روح خالتك .

بطوط : انتى عملتى ايه فى جوز انتصار خلتيه يرجع لمراته ويحبها كل الحب ده ؟

تبسمت الست بدويه وقالت : انتى لسه صغيره يا بطوط ، بس هفهمك ، الحب يا بنتى محدش يقدر يوهبه ، الحب دا مكانه القلب ، ومحدش يقدر يتحكم فى القلب ، القلب دا ملك لربنا ، هو اللى بيزرع الحب فى قلوب الناس ، فانا ولا حته الف واحده زى تقدر تخلى حد يحب حد غصب عنه .

بطوط : يا خالتى ازاى ، منتى خليتى الراجل يحب مراته اهوه ، وكمان انا سمعت ان فى ناس بتوع اعمال وسحر ، بخلوا الراجل يحب وحده بالاعمال والسحر والكلام ده .

الست بدويه : مش حب يا بطوط ، دا سحر ، زى ما تقولى كدا حاجه زى التنويم المغنطيسى ، او بيسحرو عقول الناس علشان يتوهموا انهم بيحبوا ، بس الحقيقه بتبقى حاجه مؤقته ، ومع الوقت بيزول ويرجع كل واحد لطبعته .

بطوط : اومال انتى عملتى ايه يا خالتى مع جوز انتصار ، عملتى زيهم يعنى ، وكلها شويه وقت ويرجع الراجل لطبعته ويبطل يحب مراته انتصار ؟

الست بدويه : منا قولتلك قبل كده ، مش انا اللى تعمل العمايل دى ، وبعدين الكلام دا بتاع الناس عديمه الحيله ، وانا عمرى ما كنت ضعيفه او عديمه الحيله .

بطوط : قلقتينى يا خالتى ، عملتى ايه فى الراجل ؟

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda