الهالكـــــــــــــون 3 " أختطــــــــــاف " الجزء الرابع
 |
الهالكـــــــــــــون 3 " أختطــــــــــاف " الجزء الرابع |
ياسين اتوصل لعنوان منزل انور ودى حاجه سهله
بالنسبه ليه طبعا وراحله زياره منزليه .
اول لما عرف ياسين عن نفسه طلب انور منه
الدخول ودخل ياسين بيته واول حاجه لاحظها شكل بيت انور اللى كان عليه انه مطوضب
بشكل كويس جدا جدا ، ورغم ان ياسين كان جامع معلومات عن انور ومن ضمنها انه من
اسره متوسطه الحال ومش غنيه بالشكل ده وسعتها كان لازم يجى على بال ياسين سؤال مهم
من اين جاب انور كل تكاليف توضيب منزله بالشكل اللى شافه ياسين ؟
طبعا ياسين مسألش انور السؤال ده كان عاوز فى
الاول اسئلته تبان وديه وطبيعيه ، وبعد ما سأل ياسين انور عن احواله واحوال اسرته
عرفه انه متولى تحقيق عن نسبه الخطف العاليه للاطفال ومن ضمن القضايا اللى بيحقق
فيها قضيه كان فيها انور لعمليه خطف فى احدى المولات المشهوره وكان معاه ادله وحصل
ليها ما يسمى بتلف او اهمال .
ياسين : ماتفتكرش اى حاجه فى الادله اللى
كانت معاك تساعد فى استرجاع الطفل المخطوف سعتها يا انور ؟
انور : انت عارف يا سعاده الباشا ان انا مليش
حق اتطلع على الادله اللى كنت شايلها ، دى امانه .
سعتها رد ياسين بطريق ساخره : يعنى انت
مطالعتش على الادله ورغم كده سلمت الادله ناقصه اهم جزء فيها .
انور : تقصد ايه حضرتك ؟
ياسين : انا عوزك تساعدنى علشان اسعدك يا
انور .
انور : انا مش محتاج مساعده حد ، انا غلطت
لما اهملت فى الادله وخدت جزاتى وتعرضت للجزاء وخلاص الموضوع خلص .
ياسين : والطفل اللى اتخطف ده راح نتيجه
اهمالك اللى بتقول عليه ، ده لو كان اهمال اصلا ؟
سعتها قام انور من مكانه واتكلم بعصبيه :
تقصد ايه حضرتك ، طريقتك فى الكلام مش عجبانى ، اسف اقول لحضرتك لو عندك شك فىحاجه
اعمل بلاغ او قدمنى للتحقيق ، واسف اتفضل لانى تعبان وعاوز ارتاح .
قام ياسين من مكانه وقبل ما يتحرك ويخرج من
بيت انور قال : هنتقابل تانى يا انور ، بس المره الجايه هتتكلم وتقول الحقيقه ،
وماتقلقش المقابله ديه هتكون اسرع واقرب مما تتخيل .
وخرج ياسين من بيت انور فعلا وهو بيفكر ازاى
يستجوب انور ده .
تانى يوم اجتمع ياسين مع حازم ومجموعه من
رجالتهم اللى بيثق فيهم جدا .
ابتدى يحكى ياسين للى توصله ومقابلته مع انور
وبعدين قالهم : لازم نستجوب انور باى شكل .
حازم : ناخد اذن من النيابه ونستدعيه
ونستجوبه .
ياسين : لا يا حازم انا عاوز استجوبه بشكل
غير رسمى .
حازم : ايه المطلوب يا ياسين باشا ؟
ياسين : انه يتخطف لمكان متطرف بعيد مفيش
حوليه سكان وينضرب لغايه لما يعترف .
حازم : بس ده هيعرضنا للمسؤليه ؟
ياسين : اللى هيقوموا بالخطف لازم يبقوا
ملثمين .
حازم : تمام حضرتك اعتبر اللى طلبته اتنفذ .
ياسين وهو مبتسم : اول مره توافقنى على حاجه
غير قانونيه من غير اعتراض حتى ؟
حازم : اصل انا هعترض وانت فى الاخر هتقنعنى
وهقتنع وحتى لو انا مقتنعتش انت هتنفذ اللى انت عوزه باى شكل ، فقولت اوفر وقت
ومجهود علينا .
ياسين : بقينا متفاهمين اكتر دلوقتى .
حازم والمجموعه اللى معاه نفذوا خطه ياسين
بالضبط ، جهزوا مخزن فى مكان بعيد عن السكان فى مكان شبه مهجور تقريبا ، وفى الوقت
اللى خرج انور من بيته بعربيته رايح فيها لشغله فجأه فى الطريق السريع لقى عربيه
ظهرت وحولت توقفه ، وفعلا بعد لحظات اجبرته انه يقف ونزل انور من عربيته وهو ثائر
وبيهدد اللى راكب العربيه ويقوله انه ميعرفش هو مين وشغال ايهوفجأه اتفاجيء انور
ان فى اشخاص ملثمين نزلوا من العربيه ومعاهم سلاح ورفعوه قبل ما يفكر يسحب سلاحه
حتى .
خضع انور للملاثمين فعلا ، وتم وضع غطاء اسود
على وشه وتم سحبه لعربيتهم وكل ده فى اقل من خمس دقائق تقريبا واتحركوا بعربيتهم
للمكان اللى كانوا مجهزينه .
بعد وقت انور مقدرش يحسبه لقى نفسه فى مكان
كبير وده طبعا بعد ما شالوا الغطاء اللى على وشه ولقى قدامه مجموعه ملاثمين وطبعا
فى الاول زعق وفضل يهددهم ويخبرهم انه شغال فى الشرطه وان الجهاز مش هيسكت على
اللى عملوه ده وهددهم بكلام كتير اوى .
وواصل انور الكلام والتهديد ومسكتهوش غير ان
لقى قدامه الرائد ياسين وكان من غير ما يخبى هويته ، وسحب ياسين كرسى وقعد قدامه
وقاله : سيبك من الكلام الفارغ اللى انت بتتكلم بيه ده وخلينا فى المهم لانى مش
فاضيلك نهائى ، هسأل اسأله جوبتها هتروح واعمل اللى انت عوزه لو مجوبتش هتشوف عذاب
ماشفتهوش وفى الاخر هتعترف وتقول الحقيقه ، فخد بنصحتى وجاوب على الاسئله وخلص
نفسك وخلصنا .
الادله اللى كانت معاك واتمسح منها شكل
المجرم اللى خطف الطفل مين طلب منك تمسحه وايه المقابل ؟
انور : انا ماتفقتش مع حد .
ياسين : اجابه خطأ وسعتها شاور للرجاله اللى
كانت واقفه واتقدم منهم واحد وكان معاه عصايه ضخمه وابتدى يضرب انور على ايده
ورجله وعلى ضلوعه ، وكان انور بيصرخ من الوجع وفضل انور يتضرب لغايه لما شاور
ياسين مره تانيه لغايه لما اتوقف الراجل عن الضرب .
وهنا قال ياسين : نعيد السؤال مره تانيه ، الادله
اللى كانت معاك واتمسح منها شكل المجرم اللى خطف الطفل مين طلب منك تمسحه وايه
المقابل ؟
انور وهو بيعيط : انا معرفش حاجه يا ياسين
باشا صدقنى .
ياسين بعصبيه : اجابه غلط مره تانيه وشاور
بايده سعتها اتحرك المرادى اتنين رجاله بعصيان وفضلوا يضربوا وانور يصرخ من الوجع
لغايه لما قال : هعترف بكل حاجه ، هقول بكل حاجه .
سعتها شاور ياسين للرجاله اللى اتوقفوا
ورجعوا لورا وسعتها ياسين قاله : مش قولتلك تريح نفسك وتقول من الاول ؟ قول كل
اللى تعرفه .
انور وهو بيبكى بحرقه : هيقتلونى يا باشا ،
مش هيقتلونى انا بس هيقتلو مراتى وعيالى ، ارحم عيالى وسبنى ابوس ايدك .
ياسين : مين دوول اللى هيقتلوك وهيقتلوا
عيالك ؟
انور : ابوس ايدك سبنى امشى يا باشا ماتحكمش
عليا بالموت .
ياسين بزهق : يووووووه كده انا زهقت وشاور
بايده .
ولسه هيتحرك المرادى 3 رجاله سعتها صرخ انور
خلاص خلاص هتكلم .
فى الاول عيط شويه وبعدين قال دوول ناس وصلين
اوى وهيعرفوا انى اتكلمت عليهم وسعتها محدش هيقدر يقف قدامهم حتى انت ، ومش انا بس
اللى هموت وعيلتى ، انت وكل اللى موجود هيموت مع عائلتهم ، افتكروا كلامى ده كويس ،
هى جماعه دوليه واسمها الهالك.................. وفى اللحظه ديه انطلقت رصاصه من
بندقيه قناص على بعد عدة كيلومترات اخترقت احدى جدران المخزن واصابة رأس انور
واخترقت الرأس ايضا وخرجت من النحيه التانيه ليموت انور فى تلك اللحظه على الفور
فى زهول من جميع اللى كانوا موجودين وعلى رأسهم ياسين نفسه .
بعد لحظات تقبل ياسين اللى حصل وجرى بسرعه بره المخزن باتجاه اللى جت منه الرصاصه يمكن يقدر يحدد مكان القناص اللى اطلق الرصاصه بس كان الامر مستحيل تقريبا ، اما باقى الرجاله فكل اللى شاغلهم كلام انور ان الجماعه اللى اتكلم عنها مش هيكتفوا بقتله وقتل عيلته حتى هما هيتعرضوا للقتل وعائلتهم كمان وسعتها امتلكهم الرعب خوف على نفسهم وعلى عائلتهم .
الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .
لو اى حد حابب ينشر الروايه بصفحته او باى جروب يتفضل ، بس فضلا
انسبهالى لانها مجهودى .
اترككم فى رعايه الله
yasser oda