ابليس ( الجزء الرابع )

 ابليس ( الجزء الرابع )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا قبل كده لما حط ابليس المطوه على رقبه الشيخ حسن علشان يدبحه وهو بيصلى .

الغريبه بقا ان الشيخ حتى متحركش او قاوم ، وفضل يكمل صلاته ، وكان مفيش حاجه بتحصل ، وده اللى خلى ابليس هيتجنن منه ، وخذلته ايده اللى مدبحتش الشيخ ، وخذله قلبه اللى مطوعهوش يقتل الشيخ .

ابليس ساب المطوه من ايده ، ورجع لوره كام خطوه ومسكته رعشه غريبه محسش بيها قبل كده ، فضل يرتعش ابليس وهو قاعد على الارض وقدامه الشيخ حسن بيصلى ، بعد شويه خلص الشيخ حسن صلاته ، وقام وراح للمكان اللى قاعد فيه ابليس ، وقعد قدامه وحط ايده عليه ، وحس بيه وهو بيترعش ، سعتها مسك الشيخ حسن ايد ابليس وفضل يقراء ايات من القرءان الكريم ، لغايه ما هدى ابليس .

الشيخ حسن : انا كنت عارف انك هتيجى تانى النهارده ، علشان كده سبتلك الباب مفتوح ، منا مش عوزك تخش زى الحرميه عوزك تدخل ضيف عندى .

ابليس : انا كنت هقتلك .

الشيخ حسن : كنت عارف ان انت مش هتعملها .

ابليس : وعرفت منين ؟

الشيخ حسن : انا اعمى البصر مش اعمى البصيره ، ومن اول يوم كلمتك فيه عرفت ان لسه فيك امل ، وطلع ظنى صح .

ابليس : انا كنت هاخد روحك ؟

الشيخ حسن : غريبه اوى البنى ادم ، بيعظم فى نفسه مع انه اضعف مخلوق ، يا ابنى مايخدش الروح الا اللى خلقها .

ابليس : منا لو كنت دبحتك ، كنت خدت روحك .

اتبسم الشيخ حسن وقال : هو انت غاكر نفسك ملك الموت ، مالك مغرور فى نفسك كده ، انت جاهل مش فاهم ، انت مجرد سبب ، ربنا لو كاتب انى اموت كان سابك تقتلنى ، بس علشان وقتى مجاش انت مقدرتش تعملها ، اتعلم ان كله بمشيئه ربنا لو ربك مش رايد حاجه لو مليون واحد زيك مش هيقدر يعمل حاجه .

ابليس : انا عاوز امشى .

الشيخ حسن : لا مش هتمشى ، انا علشان عارف انك جاى حضرت لقمه نكولها سوا ، والاكل جاهز ، وعاوز يبقى بينى وبينك عيش وملح .

ابليس : انا عمرى ما حد عاملى زى ما انت بتعاملنى ، هو انت ايه بالظبط .

تبسم الشيخ حسن وقال : انا واحد اعمى ، وضحك الشيخ حسن .

وقام ومسك ابليس واجبره انه ياكل معاه ، وبعد وقت قصير سمع الشيخ حسن صوت اذان الفجر ، سعتها قال لابليس : يلا علشان توصلنى للجامع .

ابليس : روح لوحدك ، انا همشى واوعدك انك مش هتشوفنى تانى .

الشيخ حسن : منا كده كده مابشوفش ، بس عارف انى هقابلك تانى .

ابليس : لا انا مش هحاول اقتلك ، ومش هاجى تانى .

خرج ابليس من بيت الشيخ حسن وهو مقرر انه ميحولش يقتل الرجل ده تانى مهما كان التمن .

عدى اسبوع من ساعه ما مشى ابليس من عند الشيخ حسن ، بس طول الوقت مش قادر ينسى اللى حصل بينه وبين الراجل ده ، ديما بيفتكر كلام الراجل ده ، كان بيحس انه عاوز يسمع كلامه تانى ويتكلم معاه ، مهو اول مره حد يعمله كويس رغم انه كان ناوى يقتله .

بعد كده جه لابليس التاجر اللى اتفق معاه انه يقتل الشيخ حسن ، وسأله عن التأخير اللى حصل وليه حسن عايش لغايه دلوقتى ، سعتها عرفه ابليس انه مش هيقدر يقوم بالمهمه دى لاسباب خاصه بيه ، ورجع للراجل ده الفلوس اللى خدها منه علشان يقتل .

بعد ما خد التاجر فلوسه قال : اى حد هياخد نص الفلوس دى هيعمل اللى انت مقدرتش تعمله .

سعتها رد عليه ابليس وقاله : منا نسيت اقولك ، محدش هيهوب من الراجل ده .

التاجر : يعنى ايه كلامك ده ، تقصد ايه .

ابليس : لو حد حاول يأذى الشيخ حسن يبقى يحضر كفنه الاول ، وقرب ابليس من التاجر ده وقاله : وامشى قبل ما ادفنك هنا .

خاف التاجر من كلام ابليس ، وفعلا اتحرك علشان يخرج من بيت ابليس ، بس وقف لما ابليس اتكلم تانى وقال : متنساش اللى هيقرب من الشيخ حسن يبقى عاوز يموت .

مشى التاجر وكان حاسس بانه اتزل ، وغروره منعه انه يرضا باللى قاله ابليس ، وراح يدور على مجرم تانى ينفذ اللى معملهوش ابليس .

التاجر لما سأل على مجرم يكون قادر ينفذ المهمه ، فسمع عن مجرم اسمه زهير ، وفعلا رحله التاجر واتفق معاه على قتل الشيخ حسن .

بس مين هو زهير ؟

زهير ده نقدر نقول عليه سفاح ، لا مش مجرد سفاح ، ده مختل عقليا ، هو شايف القتل ده مش مهنه او وسيله لجمع الفلوس ، لا هو بيستمتع بالقتل ، ديما بيحب يعذب اى ضحيه قبل ما يقتلها ، ومعظم ضحاياه بيموتو مشوهين وملامحهم مش وضحه من كتر التعذيب اللى بيحصلهم قبل ما يتقتلوا .

زهير جمع معلومات عن الشيخ حسن ، وعرف كل حاجه عنه ، وقرر يقتله فى بيته لانه انسب مكان خصوصا انه كفيف وعايش لوحده .

الساعه كانت حوالى 3 قبل الفجر ، راح زهير ودخل بيت الشيخ حسن ، فتح باب بيته بسهوله ، ودخل وكان الشيخ حسن بيصلى صلاه قيام الليل زى عدته .

لما دخل زهير البيت سمع الشيخ حسن صوت حركه حد داخل وهو بيصلى ، بس اتوقع انه يكون ابليس ، سعتها حس بفرحه ان ابليس رجعله وهيحاول معاه انه يتوب عن الطريق اللى ماشى فيه .

دخل زهير ولقى الشيخ حسن بيصلى ، سعتها جاب حبل وعمله زى المشنقه وحطه حولين رقبه الشيخ حسن اللى كان جالس على ركبه بيقول التشاهد الاخير فى الصلاه .

مسك زهير بايده الاتنين طرف الحبل الملفوف على رقبه الشيخ حسن ، وحط رجله على ضهر الشيخ حسن من فوق تحت رقبته علشان يتمكن من خنقه بدون رحمه .

الشيخ حسن حاول يبعد الحبل اللى ملفوف على رقبته بس مقدرش ، ولما عجز وقوته انهارت وعيونه غرغرت وكان خلاص روحه هتفارق جسمه سعتها ساب زهير الحبل علشان الشيخ حسن مايموتش .

طبعا اللى حصل ده مش علشان قلب زهير رق للشيخ حسن الاعمى ، لا علشان زى ما قولنا قبل كده انه شخص مختل عقليا وبيحب يعذب ضحياه ، هو ساب الحبل علشان مايموتش الشيخ حسن ويقدر يديله امل فى الحياه ، وبعد كده يخنقه تانى ، ويفضل على الحال ده لغايه ما زهير يستمتع بكل لحظه بيعذب فيها الشيخ حسن .

الشيخ حسن كان صوته رايح نهائى ، ولما ساب زهير الحبل رجع الشيخ حسن على ركبه علشان ينهى الصلاه اللى كان بيصليها .

طبعا التصرف ده اغضب زهير اوى ، خلاه زى المجنون ، سعتها مسك حبل الشيخ حسن وحط رجليه على ضهر الشيخ حسن مره تانيه وهو بيقوله : خلى الصلاه تنفعك .

وقبل ما يشد زهير الحبل مره تانيه ، لقا حد واقف وراه ولف حولين رقبه زهير حبل ، وفضل يشد طرفين الحبل .

سعتها ساب زهير حبل الشيخ حسن وحاول يشيل الحبل اللى على رقبته ، بس اللى كان ماسك الحبل كان مصمم ميسبهوش الا لما روح زهير تطلع .

زهير حس بكل حاجه حس بيها الشيخ حسن ، حس ان روحه بتخرج وعيونه غرغرت وعجز يقاوم الموت ، مكنش قادر يتنفس ، بس اللى ماسك الحبل مسبهوش زى ما زهير ساب حبل الشيخ حسن قبل كده ، وكل اللى سمعه زهير قبل ما يسيب الدنيا كلام واحد بيقوله : طيب هو صلاته نفعته وعاش ، انت ايه اللى هينفعك وينجدك من الموت .

وبعد كده اتكلم صاحب الصوت وقاله : قبل ما تموت لازم تعرف اسم اللى قتلك ، انا ابليييييييييييييس .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda