احــــــــــــــــــــــــــلام ( الجزء الثانى )

احــــــــــــــــــــــــــلام ( الجزء الثانى )

قبل استكمال احداث قصتنا ، لمشاهده الجزء السابق ( اضغط هنا ) ، توقفنا قبل كده لما فاتن رفضت ان احلام تمثل معاها فى الفيلم بتعها وطلب تتغير فورا .

الصدمه كانت للجميع وخصوصا لاحلام ، هى مش عرفه عملت ايه غلط علشان بطله الفيلم تطردها من الفيلم ، وعلشان كده راحت احلام لاوضه الممثله فاتن ، وفعلا بعد ما خبطت على باب اوضتها وفتحت مساعده فاتن الباب ودخلت احلام ووقفت قدام فاتن وقالتلها : حضرتك عوزه تمشينى من الفيلم ، هو انا عملت حاجه غلط وانا مش وخده بالى ، لو تمثيلى معجبكيش اوعدك هعيد المشهد وهعمله بالشكل اللى يعجبك .

فاتن نظرتلها بنوع من الاشمئزاز ، وكانها لا شيء وقالت : انتى مين اصلا ، انتى كلك على بعضك مش عجبانى ، يلا يا شاطره ، شوفيلك حاجه تعمليها ، التمثيل مش لعبه ، الحكايه شكلها لمت وكل اللى يسوى وميسواش عاوز يبقا ممثل .

كل كلام فاتن لاحلام اهانه ، واحلام وقفه ومسكه دموعها بالعافيه ، ورغم كل الاهانات دى بس فضلت تتوسل وتترجى فاتن انها تقبل تخليها في الفيلم ، بس فاتن رفضه الموضوع نهائى .

وفى الاخر فاتن قالت للمساعده بتاعتها : طلعى البتاعه دى بره مش ناقصه صداع .

سعتها مسكت المساعده دراع احلام ، وشدتها وخرجتها من الاوضه .

اول لما خرجت احلام من الاوضه لقت مخرج الفيلم قدمها ، طبعا كلمته وقالتله : يا استاذ انا معرفش عملت ايه غلط ، بس انا بتاسف على اى حاجه عملتها من غير قصد ، بس لو سمحت خلينى امثل في الفيلم .

المخرج : هشش متعكريش مزاج نجمتنا ، يلا اخرجى من الستديو عوزين نكمل الشغل ، دى فلوس ناس .

ومشى المخرج ودخل اوضه الممثله فاتن ، وسمعت احلام كلام فاتن مع المخرج وهى بتقوله : مشيت الزفته اللى جيبهالى دى ولا اروح ومفيش شغل النهارده .

المخرج : نجمتنا وقمرنا متعكريش مزاجك علشان بنت متسواش حاجه ، خلاص غورناها ولا تزعلى نفسك ، وجبنا وحده بدلها ، روقى واشربى حاجه دافيه علشان نكمل شغلنا .

سمعت احلام كل الكلام ده وهى وقفه قدام باب اوضه الممثله فاتن ، وخرجت من الاستوديو وهى مفحومه من العياط ، صعبانه عليها نفسها .

ولما خرجت قعدت على الرصيف وهى عماله بتعيط ومقهوره من الموقف ، من كام دقيقه بس كان كل الموجودين بيصقفولها على تالقها وموهبتها ، وبعديها بثوانى انطردت وكانها حشره مش اكتر .

في الوقت اللى كانت احلام قاعده وبتعيط ، بصت لقت قدمها مساعد المخرج ، كان اسمه محمود وقالها : متعيطيش ولا تزعلى نفسك ، ياما لسه هتقبلى مواقف زى دى .

احلام قالتله : انا بس عوزه اعرف عملت ايه غلط ؟

ابتسم محمود وقالها : انتى عملتى كتير .

احلام : عملت ايه ؟

محمود : انتى مثلتى حلو اوى .

احلام : واللى يمثل حلو ينطرد ؟

محمود : اه ينطرد ، هو بالساهل تيجى وحده تقف قدام بطله الفيلم وتمثل مشهد واحد وتبقى متالقه اكتر من البطله وتطلعها هى لا بتعرف تمثل ولا بتعرف تهبب حاجه .

احلام : انت بتقول كده علشان تواسينى ؟

محمود : لا طبعا انتى فعلا موهوبه ، وغصب عنهم هتبقى نجمه ، وكل اللى رفضك هيتمنى يشتغل معاكى بعد كده ، وابقى قولى سعتها محمود قالى .

احلام مسحت دموعها ، وابتسمت وقامت من مكانها .

محمود طلع كرت من جيبه ، وادهولها وقالها : ابقى اتصلى عليا في الرقم ده ، وانا هلقيلك دور في اى عمل .

احلام وهى مبتسمه : صحيح يا استاذ ؟

محمود : اه متقلقيش .

احلام : انا متشكره اوى .

سعتها تليفون محمود رن ، ورد على الاتصال كان واحد من اللى شغالين في الاستديو بيقوله ان المخرج عوزه ، فساب احلام ودخل بسرعه .

كلام محمود شجع احلام ، كانت وثقه انها في يوم هتوصل لحلمها ، واكيد هتقابل مشاكل كتير لغايه لما توصل للحلم ده .

نسيب احلام ونرجع للقريه بتاعتها ، تانى يوم من هروب احلام ، اتصلت بامها وعرفتها انها هربت وطلبت منها ان تقول لابوها انها مش عوزه حد يدور عليها وانها حره في حيتها ، ومسئوله عن تصرفتها واختيارها ، ومن وقتها الشيخ صالح اعتبر ان بنته ماتت .

بس الموضوع مكنش بالساهل كده ، دى قريه ومفيش حاجه بتستخبى فيها ، وطبعا الناس كلها عرفت باللى حصل ، وكانت فضيحه للشيخ صالح ، خصوصا انه ليه مكانته بين اهل القريه ، وطبعا المكان هدى اتدمرت بسبب هروب بنته من البيت .

كان في حاجه تانيه الشيخ صالح لازم يعملها ، لازم يدفع لحاتم خطيب بنته حق الدهب اللى خدته بنته احلام وهربت بيه ، وفعلا جمع الشيخ صالح مبلغ وراح بيه لبيت حاتم .

قعد الشيخ صالح مع حاتم واهله وقال : انا عينى منكم في الارض ، انا جاى اجبلكم حق الدهب اللى حاتم ابنكم كان مقدمه شبكه لبنتى .

ابو حاتم : هى بنتك هربت ليه يا شيخ صالح ، انت كنت غاصبها على الجواز ولا ايه ، ولا يمكن منكنش قد المقام .

الشيخ صالح : لا يا ابو حاتم ، انتم مقامكم فوق راسى ، حقكم عليا .

ابو حاتم : طيب ده حق الدهب ، تشكر يا سيدى ، ومد ايده وخد الفلوس ، وبعديها قال : والفضيحه اللى حصلتلنا بسبب بنتك عديمه الربايه ، هتعالجها ازاى يا صالح ؟

طبعا ابو حاتم مكنش يقدر يتطاول قبل كده على الشيخ صالح ، ولا حتى يقدر يقوله صالح زى ما حصل دلوقتى ، بس كل حاجه خلاص اتغيرت ، والشيخ صالح لازم يتعود على المعامل هدى من الناس ، علشان كده كان حاطت راسه في الارض ومش قادر يرفع عينه في وش ابو حاتم .

مردش الشيخ صالح على ابو حاتم ، بس اللى رد كان اخر واحد نتوقع انه يرد ، كان حاتم نفسه هو اللى رد على ابوه وقاله : اسمه الشيخ صالح يا ابويا ، كل البلد عرفه قمته ومكنته في البلد ، ونسبه شرف لاى حد ، وبنته مش عديمه الربايه ، احلام انا مشفتش في اخلاقها ، يمكن كانت كرهانى وعلشان كده مشيت شويه وهترجع لما تعرف ان مفيش جواز ، مهى بنت الناس الطيبين مابتغلطش يا ابويا .

رغم ان الشيخ صالح كان عارف ان بنته هربت علشان حاجه تانيه غير الجواز ، بس كلام حاتم طيب قلبه شويه ، وخلاه يعرف انه لما اختار حاتم لبنته مكنش غلطان ، علشان كان عارف من جواه انه راجل وهيصون بنته ، وعرف ان بنته هيجى اليوم وهتندم انها سابت شاب زى ده .

زى ما كل الناس مش زى ابو حاتم ، بردو مش كل الناس زى حاتم ، قليل لما تقابل واحد شهم ، والشيخ صالح من وقت هروب بنته والناس عرفت انها هربت كل حاجه اتغيرت ، واقربها ان الناس بطلوا يخلوه امام المسجد ، وكمان رفضوا انه يخطب بيهم في صلاه الجمعه ، وكمان بطلوا يحكموه في مشاكلهم زى ما كانوا بيعملوا قبل كده .

نرجع لاحلام اللى كانت مجتهده في دراستها في معهد التمثيل ، وكانت في نفس الوقت بتدور على اى فرصه تمثل فيها ، وعلشان كده اتصلت بمحمود مساعد المخرج تطلب منه انه يرشحها لاى عمل ان كان فيلم او مسلسل .

بعد فتره اتصل محمود باحلام وقالها انه عوزها في شغل ، وادلها عنوان مكتب عمل وقالها انها تروح وتقدم في المقابله اللى بيعملوها هناك ، وعرفها انهم هيمثلوا اعلان جديد وعوزين بنات وجه جديد .

فرحت احلام بالخبر ده ، حتى لو مجرد اعلان مش مهم ، المهم انها تبداء والناس تشوفها ، واكيد بعديها هيجلها شغل تانى .

تانى يوم راحت احلام للعنوان اللى ادهولها محمود ، ودخلت المكتب واستنت دورها زى معظم البنات اللى كانت موجوده وبتقدم في الاعلان ده ، احلام كانت فراحنه ومتفأله بموضوع الاعلان ده ، بس اللى مكنتش احلام تعرفه ان المخرج بتاع الاعلان واللى بيختار البنات مكنش بيخترهم لموهبتهم وبس ، لا كان مابعملش حاجه بدون مقابل ، والبنت اللى هيخترها للاعلان لازم تدفع المقابل ده واللى هو مش اى بنت تقبله .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .

اترككم فى رعايه الله 

yasser oda